گەلوو کوردی کە بە مەڵامەتوو هرووژمەکا دۆڵەتو تورکی ئەرەگیریوە نمەتاوۆ بلۆ سەر ۋنەو ڕەزو باخەکەیش بڎۆ و بەروبوومەکەیش چنۆوە و هەژاریش سەرەرە سەپیان، رووبەڕوو فشارو کۆچبەری و سیخوری مکریۆوە.
دۆڵەتو تورکی ئەرەگیری پەی ئانەی بتاوۆ مەرامەکاو ۋێش جە بارەو میساقی میللییوە بەدیبارۆ، گرڎ جۆرە ماف و یاسێوە پاشێل مکەرۆ و هرووژم مکەرۆ سەرو گەلوو کوردی و بەهاکاو گلێرگەو کوردەسانی.
جە پانیشتوو کوردەسانینە ئا پەشتیوانیەی کە هێزەکۍ پەدەکەی جە سوپاو تورکیش مکەرا پاسشە کەردەن کە ئەرەگیری بە شێوێوە رەوا و بێ سنوور سەرو گەلوو هەرێمەکەیرە پەیڕەو بکریۆ. ئا هرووژمە بە شێوۍ سیستماتیک سەرو ناوچە مەدەنی نشینەکارە ئەنجام مڎریۆ. ڕووانە بەدەیان هرووژمۍ ئاسمانیۍ، هرووژم بە کاتیۆشا و چەکی قورس مێنە ئاراوە. پی جۆرە تەرسی و تۆقنای وزا دلۍ دڵو گەلیوە. ئاڎۍ جە دەگا، جە باخ و زەمینەکاشا دوورۍ وزاوە و ناچار بە کۆچبەرییشا مکەرا.
ئەرەگیری دماو هرووژمەکا سیخوڕی سەرو گەلیرە سەپنۆنە
گەلوو ئی ناوچەیە کە بژێویشا ئینا سەرو کشتوکاڵی، بە مەڵامەتوو بۆردومانەکاو سوپاو تورکیوە نمەتاوا بلانۍ سەرو رەز و باخی و زەمینەکاشا و بەرو رەنجی و مانیایشا سەرو خاکو وڵاتەکەیشاوە چناوە. هەرپۊکەی سەڎان دارۍ دلۍ خاکو ئی ناوچەینە بەروبوومەکێشا پۊشاوە ڕێزانە. گەلوو پانیشتوو کوردەسانی جە ئەنجامو ئا هرووژمانە تووشو هەژاری کریان. ئەرەگیری تورکی پانەیچۆ نمەمردۆ پېسە درێژەو ئا سیاسەتە قڕکاریەیشە ئا ئاژەو هەژاریەو گەلی پەی پیلانە کۆلۆنیالیستییەکاش بەکار مارۆ. داواکاری چەپەڵ وزانە ۋەردەمو خەڵکی هەژاری، جە ۋەرا ۋەرو گەریلاکاو ئازادیی کوردەسانینە داواو خیانەتی و سیخوڕیشا ۋنە مکەرا.
