دەوڵەتوو تورکی شاروو دێرکیش بوردومان کەرد: ژەنێوە و زارۊڵێوە بریندارۍ بیێنۍ
دەوڵەتوو تورکی ئەرەگیری شاروو دێرکیش کانتۊنوو قامیشلۊینە بوردومان کەرد. ژەنێوە و زارۊڵێوە بریندارۍ بیۍ.
بە پاو ئا زانیارییا کەوتێنۍ دەس، دەوڵەتوو تورک دیسان هجوومش کەرڎەن سەروو یاگۍ ئەرەنیشتەو هاموەڵاتا.
دەوڵەتوو تورکی شاروو دێرکیش بوردومان کەرڎەن، جە ئەنجامنە ژەنێوە و زارۊڵێوە بریندارێنۍ.
بە دەیان کەسۍ کۊکوشی کریێنێ
دەوڵەتوو تورکی ٤ۊ پەی ١٠و تشرینوو یوەمی هجوومێوە وەرفراوانش سەرانسەروو سەرنیشت و وەرکەوتوو سوریاینە دەس پەنە کەرڎەن.
ئیدارەی وێڕاوەبەری و سەرنیشت و وەرکەوتوو سوریای سەبارەت بە تاوانوو جەنگەکاو دەوڵەتوو تورکی ڕاپۊرتێوەش پەی نەتەوە یۊگێرتەکا کیانێبۍ. ڕاپۊرتەکێنە ئاماژە پانەیە کریابۍ، کە ٣٠٤ هجوومۍ عاسمانیۍ و زەمینیۍ پەی سەروو ٢٢٤ هەرێما کریێنۍ. چا هجوومانە ٢٢١یاگۍ بە چەکی قورس، ٨٣ یاگۍ بە درۊن و فڕۊکەی جەنگی بوردومانۍ کریێنۍ. بۊنەو هجوومەکاوە ٧٤ کەسۍ گەشمەرڎی بیێنۍ، کە ٥ کەسێشا کۊبانێنە، ٥٥کەسێچ بریندارۍ بیێنۍ. هجووموو سەروو ناوەندە مەدەنییەکانە ٥٦ملوێن دۊلارۍ زەرەری ئابووری کەوتەن. بە ملوێنان کەسێچ جە پێویسییەکاو ڕۊی پێسە ئاوۍ و کارەبۍ بێبەشۍ بیێنۍ.
بە ملوێنان کەسۍ کاریگەرییشا سەرۊ وەش بییەن
ڕێکوستەی چەمداریی مافوو ئینسانی (HRW) ٢٦وو تەشرینوو یوەمینە سەبارەت بە هجوومەکاو دەوڵەتوو تورکی پەی سەروو سەرنیشتی و وەرکەوتوو سوریای ئەرەیاوناێوەش وەڵا کەرڎۊ، کە سەرچەمەکاو ژیوای هاموەڵاتا زەرەرشا لا یاوان.
ئەرەیاوناکەینە ئانەیچ باس کریا لاو کەمیوە ١٨یاگۍ بەرهەمئارڎەی ئاوۍ و ١١ یاگۍ بەرهەمئارڎەی کارەبۍ زەرەرشا وەر کەوتەن.
