بەمەڵامەتو بەشداریکەردەی جە چالاکی ٨و ئادارینە ٢ ژەنە چالاکۍ کوردی باران ساعیدیە و لەیلا پاشاییە زینانیۍ کریۍ و ئینەیچ ناڕەزایی جەماوەریش چنە کۊتۆ، دماتەر بەمەڵامەتو فشارەکاوە ئازاڎۍ مکریا، بەڵام دۆسیەی یاسایشا هەر مەنەن.
ڕێکوزیاو جەمەو مافەکا مرۆڤو کوردەسانی سەبارەت بە ئازادکەردەی دووۍ ژەنە چالاکا کوردی جە زینانو سنەینە پی جۊرە زانیاریشا وستەن ڕووە.
جە ئەرەیاۋناکەینە وچیان: " دووۍ ژەنە چالاکا کوردی بە نامەکا لەیلا پاشایۍ و باران سەعیدیۍ جە زینانو سنەینە بە بارمتەو ٥٩٩ میلیۆن تمەنا و چېرو فشارینە بەشێوێوە کاتی ئازاڎۍ کریۍ."
هەرپاسە ئاماژە پانەیچ کریان، دووۍ ژەنە چالاکۍ بە تۆمەتو "پیلانگێڵنی بە مەبەسو شێونای ئەمنیەتی نیشتمانی" دۆسییەی یاساییشا پەی کریانۆ.
جە بەردەوامی ئەرەیاۋناکەینە ئامان: " دووۍ ژەنە چالاکۍ جە لایەنو ئیدارەو ئیتلاعاتو سنەیۆ وزیێنۍ ژووری تاکەکەسی زینانو سنەی بە مەبەسو هۊرگېرتەی دڎانیایپۊرەی زۆرەملێ سەبارەت بە ڕێکوستەی مەراسیمەکاو ٨و ئاداری ڕۊو جەهانی ژەنا و جە مافو هۊرگێرتەی پارێزنەری و دیدارو بنەیانەکەیشا بێبەشۍ کریێبێنۍ".
جە دمادمایی ئەرەیاۋناکەینە ئاماژە پانەی کریان جە ڕۊو ٩و مانگەو ئادارو ئېساڵینە باران ساعیدیەی تەمەن ٤٥ ساڵە و خەڵکو سنەی و جە هەمان مانگەنە و جە ڕۊو ١٠و ئادارینە لەیلا پاشاییەی تەمەن ٤٥ ساڵەو خەڵکو سەقزی و ئەرەنیشتۍ سنەی جە لایەنو هێزەکاو ئیتلاعاتو ئا شارەیۆ بە مەڵامەتو بەشداریکەردەیشا جە مەراسیمو ٨و ئادارینە بە بەکارئاوردەی تنوتیژی و بە بێ ئەمرەو دادوەری باڵبەسۍ کریێبێنۍ و پەی زینانو سنەی فاڕیێوە و بە تۆمەتەو "هەرمانکەردەی دژو ئاسایشو نەتەوەیی" تاوانبار کریێنۍ.
