ئارۆ هۆڵوو تەوارینە شاروو سلێمانیینە بە دیبەیتێوە بە نامونیشانوو "عەفرین بەینوو ئەرەگیرکاریی تورکیای و وەڵێکەوتەی جە وەرنیشتوو کوردستانینە" لاو نوێنەرایەتیی وێڕاوەبەریی وەرنیشتینە بە هامبەشی چەنی بەرەو پەشتیوانیی وەرنیشتی بە بەشداریی ڕۆشنویرا و ئانداماو پارتە دیموکراتەکا و میدیاکارا و ئەنداماو ڕێکوزیایەکا کریا.

ئەوەڵوو دیبەیتەکەی خێرامای ئامادەبییا کریا و دماو مردای دەیەقێوە پەی گیانی پاکوو گەشمەردا، سروودەو 'ئەی ڕەقیب'ی پێشکەشە کریا

دماتەر ڕاپۆرتێوە ڤیدۆییە سەروو بارودۆخوو عەفرینی پێشکەشە کریا و دلێشنە باس جە هجوومەکاو دەوڵەتوو تورکی پەی سەروو عەفرینی و یارمەتیی گرووپە چەکدارە جیهادییەکا پەی دەوڵەتوو تورکی و بۆردومانەکا و حەرپاسە مدرامانەکاو گەریلای کریا.

حەر جە ڕاپۆرتەکێنە ئاماژە پانەیە دریا، کە دەوڵەتوو تورکی هجوومش کەردەن سەروو خەڵکی مەدەنی عەفریننە و 55 زارۆڵێ و 30 ژەنێ و بەگردی590 هاموەڵاتێ لاو دەوڵەتوو تورکیوە هجوومەکانە کوشیێنێ، حەرپاسە ئاماژە پانەیە دریا، کە هێزەکاو گەریلای مدرامانێوە تارێخییشا تۆمار کەرد بە هامکاریی گەلوو عەفرینی، جگە ئانەیە ڕاو جیهانی و مافوو ئینسانی وەراوەر پی هجووما بێدەنگێ بێنێ.

دلێشنە ئاماژە پانەیچە دریا، کە جگە جە قەراروو ئاویربەسی، وەلێ دەوڵەتوو تورکیای جە هجوومەکاشا نەمردێ و وەراوەرنە هێزە جەنگەوانەکێ بیێ بە خەتەو ئازادیی عەفرینی.

حەرپاسە باسوو ئانەیچە کریا، کە گەلوو عەفرینی بە حیچ شێوێوە نەلێ کەمپەکاو دەوڵەتوو تورکی و پلانەکێشا ورەشاناوە و دماتەر گردوو یاگەکای تەرینە خێرامایشا وەنە کریا و گورزێوە کەمەرماڕشا وەنەو دەوڵەتوو تورکی دا.

دماو ئانەیۆ وتارێوە ڤیدیۆیی لاو بەڕێز بەکر عەلۆی هامسەرۆکوو کانتۆنوو (عەفرین-شەهبا)ی پێشکەشوو ئامادەبییا کریا، دلێشنە هەڤاڵ بەکر ئاماژەش دا کە دۆز و دۆخ و چارەسەروو کوردی گردش یۆن و پەنەوازییشا بە یەک چارەسەرین و ئێمە لکی دریێنمێ یۆیۆ، حەرپاسە واتیچش:"خەڵکوو ئێمە پانیشتوو کوردستانینە پەنابەرێ نیەنێ و یاگێ وێشانە، لکەداێوە بەینوو خەڵکوو عەفرینی و پانیشتوو کوردستانینە وەش بییەن، کە هامبەشێنێ جە چارەسەری سیاسیینە پەی دۆزوو کوردی".

له پانێڵەو ئەوەڵینە، زەهیە ئەلڕاشییە ئەندامەو سەرنیشت و وەرکەوتوو سوریای جە پانیشتوو کوردستانینە سەبارەت بە هەوڵێ فاڕای دیمۆگرافیی عەفرینی قسێش کەردێ و ئاماژەش پانەیە دا، کە دماو ئانەیە 20و 1و 2018 کە دەوڵەتی فایشستوو تورکی عەفرینش ئەرەگیر کەرد، هەوڵێ بەتورککەردەی کورداش چاگە دا و واتیچش: "کەشوو کرمانجی و عەفرین جە حەوت مەنتێقێ و 366 دەگێنێ و 3705 کم چوارگۆشەن، ئاماژەش پانەیە دا، کە عەفرین وێڕاوەبەر بییەن و بەرەو وەڵیکەوتەی لوان، وەلێ هجوومەکێ پاسەشا کەرد، کە خەڵکەکەش ئاوارەو حەلەبی و یاگەکای تەری با، ئادێ تاواشا هەرمانە کەرا و دارێ بنیا و سابوون بەرهەم بارا و دووەبارە وێشا بەرا ڕاوە و سەروەریی وێشا بپارێزنا، چێروو سایێ وێڕاوەرەیی ئازادانەو عەفرینینە وانای سەرەتایی تا زانکۆش چەنە بێ، هەبوو، یوەم زانکۆ عەفریننە ساڵەو 2015 ئەرەمەرزیا و بەشوو کوردی و ئەندازیاری چەنەبێ، شش ساڵێن کە هجووم و ئەرەگیرکارییەکاو دەوڵەتوو تورکی فاشیستی سەروو عەفرینیوە بەردەوامێنێ و گەرەکشانە شناسنامەکەیش کەرا بە تورکی، دەوڵەتوو تورکی پلانە پەی عەفرینی منیۆرە وەروو کۆمەڵێ هۆکارا، یۆ چانیشا نزیکی عەفرینین بەحری چەرمەیۆ، کە دەوڵەتی فاشیستوو تورکی گەرەکش نیا کورد چانە بۆ، چونکوم تەرسۆ عەفرینیچ پێسە حەلەبی بۆ بە دڵوو بەرهەمئاردەی و وێڕاوەبەری و بازرگانی، پەوکای عەفرینش تاڵان کەرد و کۆمەڵێ سیاسەتێش چەنە یاونا یاگێ، پێسە کوشتەی خەڵکی سڤیلی، کە زیاد جە 500 هاموەڵاتا بیێ قوربانی و خەڵکوو عەفرینیش یاگێ وێشانە بەرێ کەردێو دەسش گێرت ملوو یانە و موڵک و خاک و هەرمانێشارە."

حەرپاسە باسیچش کەرد، کە وەڵێ ئەرەگیرکەردەیەکاو دەوڵەتوو تورکینە ڕێژەو سەدەنە ۹٥ خەڵکوو عەفرینی کوردێ ێنێ و ئیساتێ سەدەنە ۲۳ کوردێنێ.

ئاماژەیچش بە فاڕای نامێ دەگا کوردییەکا و قەدەغەکەردەی زوانی کوردی دا لاو دەوڵەتی فاشیستوو تورکیوە و واتش نمازا جەژنە نەتەوەییەکانیاشا پێسە نەورۆزی گێڵنا و گەرەکشا جە کوردیوە کەرۆشا بە تورکێ.

لە پانێڵوو دووەمینە جاویدان کەمال، نوێنەروو پەیەدەی پانیشتوو کوردستانینە، ئاماژەش دا، کە میکانیزموو ئادیشا پەی ڕووبەڕووبییەیوە هجوومە ئەرەگیرکارییەکا ئانەنە کە: یۆگێرتەی گردوو گەلاو کوردی و وێڕاوەبەردەیشانە گرد پێوەرە، یۆ چانیشا ئاوەدانکەردەیۆ مەنتێقەکاو عەفرینین و قەوەتکەردەی دەسوو هەرمانێن دلێ گەلاو عەفرینینە.

لە پانێڵوو یەرەمینە بەڕێز جەزا ئەحمەد فارس م/ زانکۆو سلێمانی بەشوو زانستە ڕامیارییەکا باسوو گرنگیی ئەرەگیرکەردەی عەفرینیش کەرد، جە ستراتیژیەتوو دەوڵەتوو تورکینە، کە پەنەش پاسنە بێ یۆ جە سەبەبە سەرەکییەکا هەرێموو کوردستانین و واتش:"دماو ئانەیە پەدەکە نەوتەش بە نرخێوە فرە هەرزان ڕوانەو تورکیای کەردە و ئابووریی تورکیایش قەوەت کەرد، حەرپاسە بەشێوەیچش سیاسەتوو وێشا بێ، کە ئابووریشا پەنە قەوەت کەرد و تاواشا ڕاو پەڕچەککەردەی گرووپە جیهادییەکا و یارمەتیدایشاوە عەفرینی ئەرەگیر کەرا."

دماتەر ئامادەبیێ پەرسێ و ڕەخنەکێشا ڕووەو پانێڵیستەکا کەردێ و یۆ جە ئامادەبییا واتش پەدەکە هۆکارێوە سەرەکیین پەی قەوەتکەردەی دەوڵەتوو تورکی و هەرمانەکێ پەدەکەیش شەرمەزارە کەردە.

ئاخروو دیبەیتەکەی پانەیە ئاما، کە جوابوو ڕەخنە و پەرسەکاو ئامادەبییا دریاوە و باس چانەیە کریا، کە تاکە چارەسەر کۆنگرێوە کوردیین، کە گردوو لایەنەکاش چەنە با و ستراتیژیەتما بۆ و دژوو ئەرەگیرکارییەکا.