چالاکاو پەکەکە-ڤێربۊت ئاوفەبن کامپاگنی (هەڵمەتەو قەدەغەکەرڎەی پەکەکەی ورگێرڎێ)شا دژوو قەدەغەکەرڎەی پەکەکەی، کە ٢٦و تشرینوو دووەموو ١٩٩٣ێوە ئەڵمانیانە ڕاش پەنە دریابۍ بەرڎەواما. ئێساڵ زنجیرێوە پانێڵۍ چالاکاو هەڵمەتەکۍ، بە بۊنەو ٣٠مین ساڵیادوو قەدەغەکەرڎەیۊ پەی ماوەو مانگێوە چالاکیی جیاوازشا ڕێک وستەن، جە شاروو زوریخوو سویسراینە بەرڎەواما. پانێڵەکەنە کە یانەو زانیاریی زوریخی بە سەرمەشقایەتیی لوجنەو وەرنیشتی لوا ڕاوە، هەردووە چالاکۍ فریدا گرتار و لویس زیلتۊن پانێلەکەشا پێشکەشش کەرد.

وتاروو ئەوەڵوو لوجنەو وەرنیشتینە ئەرەیاونیا، کە سەبەب و دەرئەنجامەکاو قەدەغەکەرڎەی پەکەکەی ئەڵمانیانە گرنگێنۍ و ئاماژەش پانەیە دا، کە فرەو کورڎەکا پاسە زەرەرشا وەرکەوتەن. هەرپاسە ئانەیچ وچیا، کە هجوومەکۍ پەی سەروو وەرنیشتی بەبۍ مرڎای بەرڎەوامێنی.

'قەدەغەکەرڎەیەکە بی بایسوو مەرڎەی و زەرەرمەندبییەێوە فرەی'

جە پێشکەشکەرڎەی فریدا گرتار و لویس زیلتۊنینە ئەرەیاونیا، کە پەکەکە سەرمەشقوو ئایدۊلۊژیای دیموکراتیک، ئیکۊلۊژیک و ئازادیی ژەنان.  واوەی ئاماژە پانەیچ کریا، کە بەرڎەوام هجووم دژوو جمیەری ئازادی  کریۊ و پەوکای فرەو کورڎا ناچارۍ بێنۍ با پەنابەرۍ ئەورووپای.  ئینجا باسوو ئانەیە کریا، کە جە ٢٦وو تشرینوو دووەموو ١٩٩٣ سەرڎەموو مانفرێد کانتر وەزیروو دلۍ ئەڵمانیاینە، پەکەکە قەدەغە کریا، دماو قەدەغەکەرڎەیەکەی ئەڵمانیانە، کۊشیاێوە دژوو قەدەغەکەرڎەکەی دەسش پەنە کەرد و حەلیم دەنەر پۊلیسی کوشت، هەرپاسە فێستیڤاڵوو نەورۊزوو گەلوو کوردی قەدەغە کریا و بێریڤانە و ڕۊناهییە دژوو ئا سنوورڎارکەرڎەیە وێشا سۊچنا. ئەرەیاونییا بە پاو یاسێوە بە نامۍ ١٢٩ دەیان کورڎۍ ئەڵمانیانە زیندانۍ کریۍ.  

' پێویست بە کۊشیاێوە وەفراوانی هەن'.

درێژەو پێشکەشکەرڎەکەینە ئەرەیاونییا، کە قەدەغەکەرڎەی پەکەکەی هەڵای بەرڎەواما و پێویسا کۊشیاێوە وەرفراوان کریۊ و داوایچ کریا "دژوو قەدەغەکەرڎەی بەشداریی چالاکییەکا کەرڎێ". بەشداریی چالاکییەکاو وەرگێریکەرڎەی کوردستاننە کەرڎۍ و پاڵپەشتییش کەرڎۍ. پەی بەشکەرڎەی  پێویستییەکاو هاگادارکەرڎەیوە دژوو قەدەغەی هامکاریی کەرڎۍ. پەی لایەنە پەیوەندیدارەکا نامە و ئیمەیڵ بکیاندۍ. بیدۍ بە ئەندامۍ مانگۍ سوورۍ و پەشتگیرییشا کەرڎۍ."

پەی ١٨و مانگۍ بەرەو بەرلین

جە پێشکەشکەرڎەکەینە ئاماژە پانەیە کریا، کە بۊنەو 30 ساڵەو قەدەغەکەرڎەکەیوە، مانگێوە پلانە نریێنەرە و  پانیشتوو ئەڵمانیاینە تا سویسرا و نەمسا زنجیرە پانێڵێوە ملا ڕاوە. چالاکۍ داواو بەشداریکەرڎەی دلۍ کۊبییەیوەکەینە کەرا، کە قەرارا ١٨و ئی مانگۍ بەرلیننە کریۊ.