فیلیز بوداکە هامسەرۆکەو ئەنجومەنوو دیموکراتیکی گەلوو مەخموری جە بارەو دما پەرەئەسایەکا ئی دماییەو مەخموریۊ قسېش پۍ ئاژانسەکەیماANFی کەرڎۍ.

"گەریلاکۍ ئازاڎیی کوردسانی ڕاشا جە ڕووەدای کۆکوشی جە هەرێمەنە گېرت

فلیزبوداکە ئاماژەش پانەی کەرڎ کە دماو دەسپنەکەرڎەو هجومەکا داعشی جە ساڵەو ٢٠١٤ پۍ سەروو چن مەنتیقېوە پېسە ۋەرنیشتی، شەنگال، مەخمور، پانیشتوو کوردسانی و عێراقی و ئەنجامدای چنڎین کۆکوشیا، سەروو داواو خەڵکوو مەخموری، حکومەتوو هەرێموو کوردسانی و بە رەزامەنڎی حکومەتوو عێراقی گەریلاکۍ هەپەگەی و یەژاستاری جە کەش و قەرەچوخینە بنەشا وستە و ڕاشا جە ڕووەدای کۆکوشی و پڕایۊ داعشی پۍ دلۍ هەرێمی و بەتایبەتی هۊلێری گېرت.

پەدەکە بیەو کوردی کوردسانەنە پېسە بەهانۍ هجوماکا منیۊرە

فلیزبوداکە باسش چانەیچ کەرڎ حەر ئا هېزۍ کە سوپاسوو  گەریلایشا کەرڎ، دماتەر بە مەڵامەتوو مەسڵەحەتە سیاسیەکاشاوە چنی دەوڵەتوو تورکی بەردەوام بیەو هێزەکا گەریلایشا پېسە مەڵامەتوو هجومەکا دەوڵەتوو تورکی نیشانەدان. بەتایبەتی جە دماو ساڵەو ٢٠١٧یۊ مەڵامەتوو هجومەکا دەوڵەتوو تورکی پۍ بیەو گەریلاکا هەپەگەی و یەژاستاری جە مەخمورنە گېڵنېنۍ، نەتەوە یۊگېرتەکۍ تائاستێوە جە کەمپوو پەنابەرا مەخمورینە کیشیېوە و حکومەتوو عێراقیچ ئەرکەکېش جابەجۍ نەکەرڎۍ و یانەو بارزانیچ  بیەو کوردیشا پېسە مەڵامەتوو هجومەکا سەروو کوردسانی نیشانە دا.

حزووروو هەپەگەی و یەژاستاری مەخمورنە گرەنتی ئەمنیەتی بۍ

فیلیز بوداکە واتش، "گەریلاکۍ کوردسانی ئەرکوو پارېزنایشا دان دەسوو ژەنا و گەنجا کەمپەکەیۊ و باسش چانەیچکەرڎ، حزووروو هەپەگەی و یەژاستاری گرەنتی ئاسایش و ئۆقرەییبۍ، بەڵام کیشیایۊشا بە تەمامی ۋەروو مەسڵەحەتوو خەڵکوو کەمپەکەی بۍ. گلېرگە تائیسەیچ رازی نییا پانەی، بەڵام جە هەمان وەختەنە مزانا کە چ وەختۍ پەنەواز کەرۊ هەمان ئا هێزۍ ۋېشا میاونا لاو ئاڎیشا و ئاماڎۍ با.

حکومەتوو عێراقی ڕاش جە هجومەکا دەوڵەتوو تورکی نەگېرت

فلیزبوداکە جە بەشېوەتەروو قسەکاشەنە واتش جە ساڵەو ٢٠١٧یۊ هجومەکۍ دەوڵەتوو تورکی پۍ سەر ووکەمپەکەیشا زیاڎشا کەرڎەبۍ، نە حکومەتوو عێراقی و نە هامپەیمانی میان نەتەوەیی حیچ هەڵوێسېوەشا پۍ ڕاگېرتەی چا هجوما نەبیەن و جە ئیسەیچنە مەتاومۍ واچمۍ بە کیشیایۆ هێزەکا گەریلای سەڎەنە سەڎ حکومەتوو عێراقی پارېزنای کەمپەکەی گېرۊنە ئەستۆ، چونکی وڵتەریچ هەپەگە دلۍ کەمپەکەینە نەبۍ و کەش و قەرەچوخینە بېنۍ، بەڵام دەوڵەتوو تورکی دلۍ کەمپەکەی و یانە و مزگی بۆردومان کەرۍ.

'پەدەکە گەرەکشا دەوڵەتوو تورکی جە کەش و قەرەچوخینە یاگەگیر کەرۊ '

فلیز بوداکە سەبارەڎ بە جەنگوو بەین و سوپاو عێراقی و چەکڎارا پەدەکەی واتش، "ئانەی هجومش کەرڎ پەدەکە بۍ. بەردەوام ئانەما وستەن ڕووە بیەو پەدەکەی جە دەوروبەروو مەخمورینە چ مەترسیېوەش ۋنەگنۊوە؟ رەنگە بڕۍ واچا کورد پۍ چی گەرەکش نیا کورد دەوروبەروو ئاڎیشانە بۊ، بەڵام ئا کوردە جلوبەرگوو ۋېش کەرۊنە وەروو ئەندامێوە میتی و مارۊش قەرەچوخ و چا منیۊشەرە. جە جەنگەکەو بەینوو سوپاو عێراقی و پەدەکەینە دلۍ سەنگەرەکا پێشمەرگەینە کەسێوە کوشیا کە ئەنداموو میتی بۍ و جلۍ پێشمەرگەیش وەرەنەبېنۍ. پۍ چی پەدەکە گەرەکشا کەش و قەرەچوخینە بنەوزۊ؟ ۋەروو ئانەی گەرەکشا چېروو نامۍ ۋېشەنە دەوڵەتوو تورکی چا یاگەگیر کەرۊ. پەدەکە جە ساڵەو ٢٠١٩ بەدمایۊ گەمارۊش وستەن سەروو مەخموری. پەدەکە ڕا مەڎۊ زارۊڵەکېمە دماو تەمامکەرڎەو ۋەنای ئاماڎەیی پۍ درێژەدای بە ۋەنای جە زانشتگەنە ڕووەکەرا هۊلێر، جە سەیتەریەکانە ڕا مەڎۊ نەوشەکۍ بیاوا هۊلێر و چن زارۊڵۍ دلۍ باوشەو ئەڎاکاشانە جە سەیتەریەکانە گیانشا جە دەسدان. پەدەکە سەروو خاکوو کوردسانیۊ ٧ کەمپېش بە ئێمە فاڕۍ. بە ۋیرکەرڎەیۊ ئانەی کە ملمۍ پانیشتوو کوردسانی، ئێمە پەناهەنڎۍ بېنمۍ، بەڵام پەدەکە بە زۆر ئێمەش جە ٧ یاگېنە هۊرتەکنایمۍ، خێمەکۍ ئێمەشا سۊچنۍ، گرچېوما تاڵان کریا، بە چەک هجومشا کەرڎ سەرما و خەڵکوو ئێمەشا کوشت. تەنانەڎ سەرەو دووۍ کەسا عمر ٦٠ ساڵانیشا بڕی و بە دەوڵەتوو تورکیایشا ورەتۍ. حەرپۊکەی گەرەکما نیا پەدەکە کەش و قەرەچوخینە بنە وزۊ. ئانۍ گرڎ ریزما کەرڎۍ، سەروو دەسوو یانەو بارزانی و پەدەکەیرە سەرمارە ئامان. ئەگەر پەدەکە قەرەچوخەنە بنەوزۊ ئانە بەماناو بنەوستەو میتی و دەوڵەتوو تورکین جە قەرەچوخ، پانەیچ مەخمور رووبەڕووی کۊکوشی بۊوە. جە ئاکاموو ئا جەنگانە چېش ڕووە بڎۊ تائیسە دیار نییا".

'بیەو پەدەکەی جە قەرەچوخەنە مەترسین پۍ سەروو ئێمە'

بوداکە واتش، "ئی یاگۍ بەپاو ماڎەو ١٤٠و دەستوری مەنتیقەی قۊرتدارا، جە ڕووانی ئاینڎەنە دیار نییا کێ چا بنەوزۊ، بەڵام بیەو پەدەکەی قەرەچوخەنە پۍ سەروو ئێمە مەترسیا، ئانەیچ کە وچیۊ حکومەتوو عێراقی بە شێۋېوە تەمامەتی پارێزناما ، ئانەیچ فرە راس مەبۊ، بەڵام دماجار ئېگە خاکوو عێراقین و ئانەی ڕاش بە مەنەیۊیما دان حکومەتوو عێراقین و حیچ پەیوەنڎیېوەش بە پەدەکەیۊ نییا. ئانەی ڕا مەڎۊ بلمۍ هەرێموو کوردسانی پەدەکەن. پاگیری پەدەکەی سەروو بنەوستەیش قەرەچوخەنە ئا پرسیارۍ وروژنۊ کە ئاخۆ دەوڵەتوو تورکی جە ڕاو پەدەکەیۊ گەرەکشا جە دەورووبەرو مەخمورینە چېش کەرۊ؟ تا ئیسە حیچ رێککۊتەیۍ نامان ئاراوە و ئاژەکە پسە ۋېش مەنەنۊ".

'مشۊم پارېزنای جەوهەری ۋېما بەقوەت کەرمۍ'

بوداکە جە دمادماینە واتش، "کە مشۊم پېسە گلېرگەی پارېزنای جەوهەری وېشا بەقوەت کەرا و قسەکېش پی جۆرە دمایی پنەئارڎۍ: "چېش بۊ با بۊ، مشۊم ئېمە پارېزنای جەوهەری ۋېما بەقوەت کەرمۍ. ئێمە جە قۆناغەو جەنگوو گەلی شۆڕشگێڵینە مژیومۍ. پۍ ئانەی هێزێوە کە مەترسیش نەبۊ پۍ سەریما چېگە یاگەگیربۊ، ئێمە گرڎوو لایەنە دیپلۆماتیکیەکا بەکار مارمۍ. بەتایبەتی گەل چا بارۊ گفتوگۆ کەرا. مشۊم نەتەوەیۊگېرتەکۍ خۊتانکەرڎەی جە ئەرک و ۋەرپرسیاری ۋېش کەرۊ. تائیسە واچېنۍ ئا یاگۍ مەنتیقېوە چەکڎارییا، ئێمە مەتاومۍ بەیمۍ، بەڵام ئا بەهانېچشا نەمەنە. ئەگەر حکومەتوو عێراقی هەنگامە بنیۊ ، واتە قۊرتەکا گلېرگەی چارەسەر کەرۊ، ئا وەختە متاویۊ جە بەینوو حکومەتوو عێراقی و مەخمورینە پەیوەندی عال سازکریۊ. چا روۆ گەل ئی داواکاریېشە هەنۍ؛ بەرئارڎەی و وەشکەرڎەو ئشناسنامەی، حاسڵکەرڎەی پەنەوازیەکا گلېرگەی و دەسەبەرکەرڎەی ئاسایشی و ئەمنیەتی".