حکومەتو فەرەنسای جە ئەرەیاۋنېۋەنە ئاشکراش کەرڎ کە جە راو وەزارەتو جبەرو وڵاتەکەیشاوە ٢٥ زارۊڵۍ و ١٠ ژەنیشا جە کەمپو ئا کەساۋە کە پەیۋەنڎیشا بە چەتەکا داعشیوە هەن جە سەرنیشتوو ۋەرکەوتوو سوریایوە گېڵنێنۍ.

 ئی هەنگامۍ دماین هەنگامەو فەرەنساینە پۍ گېڵنایۊ ژمارېۋە هامۋڵاتیۍ فەرەنسیۍ جە ئېساڵەنە جە وەختېنە کە نەتەوە یۊگېرتەکۍ داواشا کەرڎەن گرڎو ۋڵاتا حۊڵەکاشا پۍ گېڵنایۊ هامۋڵاتیا ۋېشا جە کەمپو هۆڵینە چڕتەر کەراۋە.

 یاگۍ ئاماژەینە کە وەزارەتو جبەرو فەرەنسای ئەرەیاۋنانش، ئا کەسۍ کە یاۋېنۍ بە عمری یاسایی جە ڕاو سیستمی داڎوەرییۊ مامەڵەشا چنی کریۊ جە وەختېنە زارۊڵەکۍ وزیا چېرو چەمڎاری خزمەتگوزارییەکا زارۊڵاۋە.

 کەمپو هۆلی کە ئینا چېرو دەسەڵاتو هەیمەنەو ئیدارەو ۋېڕاوەبەرینە جە سەرنیشتو و ۋەرکەوتوو سوریای زیاتەر جە ٥١ هەزار کەسېش چنەنۍ کە فرەیشا ژەن و زارۊڵېنۍ، جە وەختېنە بە پاو ئامارەو ۋڵاتە یۊگېرتەکا ئەمەریکای نزیکەو ١٠ هەزار کەسای تەری جە دلېشانە ٢ هەزار کەسۍ غەیرە عێراقی و سوریایۍ ئینۍ کەمپەکەنە.

  ئەنتۆنی بلینکن، وەزیرو جبەرو ئەمەریکای جە گلېرۊبیەی هامپەیمانانە مانگەو حوزەیرانی ۋیەرڎەی ئەرەیاۋناش، "گېڵنایۊ هامۋڵاتیا فرە گرنگا" پۍ کەمکەرڎەیۊ ژمارەو ئەرەنیشتا حەرڎۋە کەمپەکەی و ناوەنڎەکا دەسگېرتەی سەریرە، ئاماژەیچش پا مەترسییا کەرڎ کە چەتەکۍ داعشی بتاۋا جارێۋەتەر تفەنگ هۊرگېراوە و زارۊڵایچ بەکاربارا".

هـ . ش