دماو ئانەی دۆڵەتو تورکی ئەرەگیری و چەتەکاش جە ساڵۊو ٢٠١٨ی عەفرینشا ئەرەگیر کەرد، زېیاتەر جە ٢٠٠هەزار عەفرینیێ ناچارێ بییێ ڕوە جە شەهبای بکەرا. کۆچبەرا شەهبای کە جە یەرێ لێوە جە لایەنو چەتەکاوە گەمارۆدریێبێنێ و جە لێوە تەرۆ جە لایەنو دۆڵەتو دیمەشقیۆ گەمارۆدریێنێنێ، هەم پەی ژیواو وېشا جەنگشا کەرد و هەم جە دژو هجومو چەتەکا ئەرەگیری مڎرامانشا کەرد. دماو ئانەی جە ٢٧و نۆوەمبەری حەڵەب و ئیدلب جە لایەنو دۆڵەتو تورکی و چەتەکاشۆ ئەرەگیر کریا، ئینجارە شەهبا جە هەر چوار لېوە گەمارۆدریا. جە ئەنجامەنە جە ٢ی ئۆکتۆبەری هجومەکۍ سەرو تل ڕفعەتی و شەهبای چڕێبییێ و ناوچەکە ئەرەگیر کریا، گەلو عەفرینی پەی جاری دوەم ناچارێ بییێ کۆچبەرێ با. 

گەلو عەفرینی کە جە شەهباوە یاوێ شارو ڕەقەی چنی ئاژانسەکەیما قسێشا کەردە و ئەرەیاوناشا؛ هیواشا بە ئەرەکۆشای ئازادی و شناسنامەو وێشا هەن و قەد تەسلیمێ مەبا.

'چەکێ نەمەن کە جە دژو گەلەکەیما بەکارنێ'

مسەفا محەمەد سەبارەت پا عەفرینیا کە ناچارێ بېیېنې جە شەهباوە کۆچبەرێ با، واتش: "دماو ئانەی دۆڵەتو تورکی جە ساڵو ٢٠١٨ عەفرینش ئەرەگیر کەرد، ناچارێ بییەیمۍ بلمۍ پەی شەهبای. پەی ماوێ فرەی چا مڎرامانما کەرد، دیسان بەمەڵامەتو هجومەکا دۆڵەتو تورکی و چەتەکاشاوە ناچارێ بییەیمۍ کۆچبەرۍ بییەیمۍ، هجومەکۍ سەرو شەهبای دژو گەلەکەیما فرە چڕێ بېیېوە، چەکې نەمەن جەدژو گەلەکەیما بەکارنێ."

'دۆڵەتو تورکی حیچ پەیوەندیێش بە ئیسلامیۆ نییا'

مسەفا محەمەد ئاماژەش پانەیەدا، کە جەلایەنو ئیدارەو وێڕاوەبەری ڕەقایۆ پێشوازییێ خاسشا چنەکریا و واتش: "ئانەی خاوەنداریش جە گەلو عەفرینی کەرد، ئیدارەو وێ ڕاوەبەرییا، ئیدارەو وێڕاوەبەری بە گردو توانایشۆ، جوابو داواکاری و پەنەوازیەکا گەلو عەفرینیش داوە، دۆڵەتو ئەرەگیرو تورکی و چەتەکاش حیچ پەیوەندیێشا بە ئیسلامیۆ نییا. تەنیا پەی ئانەی زوڵم جە گەلی بکەرا هەنێ. ئێمە زوڵمما جە کەسی نەکەردەن و بە کەرامەتو وێماوە مژیومێ، سەڎان ساڵێن گەلو کوردی تەنیا یەک داواکاریشا هەن، ئاڎیچ ئانەن بە شناسنامە و زوانو وێشۆ بژیۋۆ، پەنەوازا گرڎ کەسێ ئی دڕندەییە بوینۆ."

'هجومێ قورسشا کەرد سەرو گەلی'                                       

ئیبراهیم کۆسە یۆتەرا چا هاموڵاتیا عەفرینی و واتش: "ئینە دووەمجارا ئاوارێ بیمێ، فرە ئێشما چەشت، تووشو سەختی و زەحمەتی فرەی بیەیمێ، چا کاتۆ لوێنمێ شەهبا زیاتەر جە ٦ ساڵا هجومەکۍ دۆڵەتو تورکی سەرماوە بەردەوامیشا بۍ، ئێمە جە ڕەوشێ پاجۆرەینە ژیوایما کەردەن، ئیتر بە مەڵامەتو چڕبیەیۆ هجومەکا ناچارێ بییەیمێ جارێوە تەر کۆچبەرێ بیمێ."

'عەفرین پەی دۆڵەتو تورکی نمەمەنۆوە'

هەرپاسە مەحەمەد حەنان چا بارۆ واتش: "هجومەکۍ دۆڵەتو تورکی پەی سەرو گەلو کوردی دڕندەییێ گەورەن، دۆڵەتو ئەرەگیرو تورکی بە ٧٢ فڕۆکێ جەنگیۍ بە هەزارانش جە گەلو ئێمە کۆمکوژێ کەردێ، خاکما ئەرەگیر کریا. یانە و مڵکو ئێمەشا تاڵان کەرد و باخە زەیتونەکێماشا کاولۍ کەردێ. ٦ساڵێن جە شەهبانە مژیومێ، بە هیواو ئانەینمێ گێڵمێ پەی ماواو وێما بەڵام دۆڵەتو تورکی و چەتەکاش بەدرێژایی ئی چن ساڵەی بۆمبوارانما مکەرا، کاتێ باس جە گەلو کوردی مکریۆ، دژمنا گەلو کوردی گرد یۆ گێرا، ئێمە جارێوە تەر جە شەهبانە ئاوارێ بیەیمێ، ڕاوە چەتەکێ سووکایەتیشا پنەکەردیمێ، دۆڵەتو تورکی و چەتەکێش خاس بزانا عەفرین پەی ئاڎیشا نمەمەنۆوە، ئێمە بەهیوێنمێ  گێڵمێوە پەی عەفرینی."