فەیلەسوف و کۆمەڵناس ئەدگار مۆرینی ١٠٤ ساڵ، پەیامێوەش پەی شاندو ئیمراڵی پارتو یەکسانی و دیموکراسی گەلا (دەم پارتی) کیاست و واتش: "پڕۆسەو ئاشتیی و دیموکراتیزەبیەو تورکیای پەی شکۆو مرۆڤایەتی پەنەوازا. ئەرەیاۋنوش کە لایەنگری جە یۆبیەی گەلاو کوردی و تورکی مکەرو."

بە پاو زانیارییەکا پەیەماکەو ئەدگار مۆرینی کە بە تورکی و فەڕەنسی کیاستەنش ئینەن:

"پېسە ڕۆشنۋیرێوە باوەڕیم چامنەن، فکری ئازاڎ و گفتوگۆی دیموکراتیک بەها هامبەشەکۍ مرۆڤایەتینۍ، تا دما نەفەس پەشتگیری جە پرۆسەو فاڕیای دیموکراتیکی و ئاشتی جە تورکیانە مکەرو. چی پڕۆسە تاریخیەنە کە دماو ئانەی سەرۆکو پارتی نەتەوەپەرەسی دەولەت باخچەلی سڵامش ۋنەو ڕامېیاریمەدارا کوردی کەرڎ و بە بانگەوازو ئاشتیی و گلېرگەو دیموکراتیکی ٢٧و شوباتی جە لایەنو ڕابەرو گەلوو کوردی عەبدوڵا ئۆجالانی جە زینانو ئیمراڵی بەردەوامبۍ، داوا جە گرڎ کەسۍ مکەرو ڕێز جە ئیرادەو گەلوو کوردی و تورکی پەی پێوەرە ژیۋای نیشانە بڎا.

پڕۆسەو دیموکراتیکبیەی و ئاشتیی جە تورکیانە پەنەوازش بە شکۆمەندی مرۆڤایەتییا. ۋەرو ئینەیچ جە ۋەران ۋەر بە دەسوەردای و هاندایە هەرێمیەکا ئیمپریالیزمی، ئەرەیاۋنووش کە لایەنگرو یۊبیەی گەلاو کوردی و تورکینا.

بژیۋۆ ئازادیی، بژیۋۆ دیموکراسی".