سەبارەت بە ڕووەدایەکا ئی دماییەو سووریای و هرووژمە ئەرەگیریەکا و بانگەزییەکا ئیدارەو ۋێڕاوەبەری پەی سەفەربەری پەی پارێزنای ئا سیستەمەیە و یەکڕیزی گەلاو هەرێمەکەی و نەتەوەو کوردی، هامسەرۆکو پارتو یۊبیەی دیموکراتیکی (پەیەدە) غەریب حەسۆ پەی ئاژانسوو هەواڵوو فوراتی (ANF)ی قسێش کەردۍ و جە هۊرسەنگنایەگا شەنە پەی مژارەکا ئاماژەش پانەی دا کە ئەزموونو ئیدارەو ۋێڕاوەبەری کە بە شۆڕشو ۋەرنیشتی سەرپا کۊتەن گرنگتەرین دەرفەتا پەی ئاراسەکەردەی ئایندەو سووریای تازەی بەرەو سوورییایۍ دیموکراتیکی.

'بانگەوازو سەفەربەریی پەی ئاماڎەکاری گەلان ۋەرا ۋەر بە پێشئامایەکا'

غەریب حەسۆ سەرەتاو قسەکاش بە سەرنج وستەی سەرو ڕووەدایەکا سووریای دەسپنەکەرڎ و ئاماژەش پانەی دا جە دماو وڕنای ڕژێمو سووریای بە ئەرەیاۋنای بانگەوازو سەفەربەریی ئیدارەو ۋێڕاوەبەری سەرو ئاستو گرڎو ئەرەمەرزیاکا پێوەس بە هەستیاری قۆناغەکۍ پېسە پەیەدەی خەباتی دیبلۆماسیشا زیاتەر کەردەن و واتش: "دماو وڕای ڕژێمو ئەسەدی پېسە پەیەدەی سەرو ئاستو گرڎو سووریای  بەشداری کۆنفرانسو پارتە سۆسیال مېیاننەتەوەییەکاما کەرد جە مەغریبەنە کە پارتە هەرێمی و مېیاننەتەوەیەکۍ جە کیشوەرکاو ئاسیا و ئەفریقاینە بەشدار بێنۍ چنەش. جە کۆنفرانسەکەنە سەرنجو گرڎی سەرو پەیەدەیۆ بۍ چونکی گرڎو لایەنە بەشدارەکا جە مەراقو زانای ئاژەو سووریای و پڕۆژەو ئێمەنە بێنۍ. چونکی وڕای حکومەتی و ڕژێمو سووریای پا دەمودەسیە پەی گرڎ لێوە یاگۍ پەرسای بۍ. پۊکەی جە چوارچێوەو گلێرۆبیەکانە پەی ئەنەیاوای جە ئاژەکەی جە چەمەڕایی شاندەکەو ئێمەنە بێنۍ. چوونکی ئامای هەتەشەی جە ڕوانگەو لایەنە بەشدارەکاوە پېسە مەترسیێوە وینیۍ. پۊکەی پېسە پەیەدەی درێژە بە پەیوەندییە دیبلۆماسییەکاما مڎەیمۍ، چانەی یاوێنمێنە کە ئینایمۍ قۆناغێوە فرە هەستیارەنە. وە جە گەڕە دیبلۆماسییەکامانە گرڎ کاتێ جەخت سەرو یۆبیەی و یۆگێرتەی نەتەوەیی مکەرمێوە. سەرۋنەدایەکێما پەی پانیشتوو کوردەسانیچ هەر چا چوارچێوەنە بۍ. چی سەرۋنەدایامانە پڕۆژە و ئامانجەکا ئیدارەو ۋێڕاوەبەری پەی گرڎ لێوە وزمۍ ڕووە، چنیش جەخت چانەی مکەرمێوە مشۆم کورد بە یۆگێرتەی و یەک پڕۆژەییوە بلانە دیمەشق، چونکی ئەر بە شێوێوە یۆگێرتە بلمۍ دیمەشق ئا کاتە متاومۍ جەخت جە گرنگی پرۆژەکاما و پاگیری سەرو ئامانجەکاو گەلوو کوردی بکەرمێوە."

'ئەزموونو ئیدارەو ۋێڕاوەبەری تازە و ئامادەن پەی سووریای تازەی'

حەسۆ ئاماژەش بە ڕەهەند و لایەنە گرنگەکاو ئیدارەو ۋێڕاوەبەری کەرد و واتش: "ئەزموونو ئیدارەو ۋێڕاوەبەری ڕاگیرا جە لە پارچەبیەی، ئەرەگیری و جەنگو دلێینەی، وە پەی گرڎو گلێرگەی نیشاندای ئیرادەی ئازادا و گرڎو گلێرگەی گێرۆنە ۋێش. ئەزموونێوەن ژەنی، جوانۍ و گەلا دڎانشا منریۆ پۆرە و سەرمەشقی مکەرا. ئامانجو ئەزموونو ئیدارەو ۋێڕاوەبەری پەی دەسەڵاتداری نییا، بەڵکم پەی گەلی و گلێرگەین تا بتاوا ۋێشا بەڕێکوستەی بکەرا و ۋێشا ڕاوەبەر بکەرا جە چوارچێوەو سیستەمێوە دیموکراتیکینە، ئی ئەزموونە تازەن و پەی سووریای تازەی ئامادەن، بەڵام داخەم نمەشۆ موینمۍ جە ئیساتێنە گرووپێوەشا ئاوردەن پەی دەسەڵاتداری کە دلۍ گلێرگەو سووریاینە ئارامی و سەقامگیری وەشنمەکەرۆ."

'دۆڵەتو تورکی جە کەسایەتی گەلوو کوردینە هرووژم مکەرۆ سەرو پێوەرە ژیۋای گەلا'

غەریب حەسۆ سەرنجش وست سەرو تاریخو دووژمنکاری دۆڵەتو تورکی جە ۋەرا ۋەرو گەلوو کوردینە جە ماوەو سەڎ ساڵی ۋېیەردەینە و ئانەیچش وست ڕووە کە دۆڵەتو تورکی گرڎ چێوێش کەرڎ پەی ئانەی ئیدارەو ۋێڕاوەبەری بە سەرمەشقایەتی گەلوو کوردی بەشدار نەبۆ جە گلێرۊبیەکاو جنێفینە و جە بەردەوامینە واتش: " دۆڵەتو تورکی گرڎ وەختۍ دژوو کوردا مردانۆ. بەڵام گەلوو کوردی دلۍ ئی ٥٠ ساڵەو دماینە بییەن بە خاوەنو ئیرادەی و سیاسەتو ۋێش مکەرۆ و ئینا سەرمەشقو شۆڕشو مرۆڤایەتینە جە ئاستو ۋەرکۊتوو مېیامینینە. دۆڵەتو تورکی سەرکۊتەی کوردی پېسە تەرسۍ و مەردەی ۋێش موینۆ ماوەو ئی ١٣ ساڵەو پشێوییەکا سووریاینە گرڎ هەوڵێوەش پەی ئانەی بیەن کورد کاریگەریش نەبۆ جە هەرێمەکەنە. ئیدارەو ۋێڕاوەبەری بە سەرمەشقایەتی گەلوو کوردی نوێنەرایەتی گرڎو گەلا مکەرۆ و ئیرادەو گەلاش بە بنەما گرتەن. پۊکەی گرڎ هەوڵێوە دۆڵەتو تورکی پەی ڕاگێرتەی بۍ جە بەشداری کوردا جە گلێرۆبیەو جنێفی و قەرارو ٢٢٥٤ ئینەیچ پەی ئانەی بۍ چارەسەریێوە کوردانە نۍ ئاراوە. پۊکەی دماو وڕای ڕژێمو سووریای بە قۆستەیۆ پشێویەکا هرووژمش کەرڎ سەرو ئیدارەو ۋێڕاوەبەری و ۋەرنیشتی، چونکی دۆڵەتو تورکی مزانۆ کوردەکۍ خاوەنو فەخرو ماڕای داعشینۍ و کاریگەرییشا بۆنە جە بنیاڎنیای سووریای تازەینە، ۋەرو ئینەی گرڎو هەوڵو دۆڵەتو تورکی پەی ماڕای و لاوازکەردەی ئیرادەو کوردین پەی ئی مەڵامەتیچە چنی گرڎو لایەنەکا و هەتەشەی بە سەرۆکایەتی محمەد جۆلانی هامپەیمانی مکەرۆ، ئینەیچ ئاژێوە مەترسیڎارا چنی ۋێش مارۆش چونکی دۆڵەتو تورکی گەرەکش نیا سیستەمێوە دیموکراتیک جە سووریانە ئەرەمەرزیۆ و کورد دەورش چی سیستەمەینە بۆ. ئامانجو دۆڵەتو تورکی لاوازکەردەی ئیدارەو ۋێڕاوەبەری و قەسەدەیا گرڎ هەوڵێوەش پەی شێونای هامپەیمانی بەینو گەلوو کوردی و عەرەبین، چا ڕوانگۆ جە کەسایەتی گەلوو کوردینە هرووژم مکەرۆ سەرو ئیدارەو ۋێڕاوەبەری."