هامسەرۆکەو گردینەو پارتوو یەکسانی و دیموکراسیی گەلا(دەم پارتی) تولای حاتەم ئۆغۆللاریە و تونجەر باقرخان جە ناوەندو گردی پارتوو گەلی کۆماری (جەهەپە)ینە چنی سەرۆکو گردی جەهەپەی ئۆزگور ئۆزەلی کوێ بیێوە. دماو گلێرۆبیەیێ ٢ سەعاتی، ئەرەیاونێوە هامبەششا دا.

هامسەرۆکو جەهەپەی ئەرەیاوناش ئەنجامو هۆرچنییەکا و کێشەو قەیرانەکا دیموکراسیشا جە تورکیانە تاوتوێ کەردەن، هەرپاسە سەرۆکو پەرلەمانی سەردای پارتەکاو سەرۆککۆماریش کەردەن، چی گلێرۆبیەینە دید و پەیلوواکێ دەربارەو ئی ئەرەنیشتەیا وزیان ڕووە.

هامسەرۆکوو گردیی دەم پارتی تونجەر باقرخان سەرنجش وست سەروو گرنگی گفتووگۆی و ئەرەنیشتەیەکا، ئەرەیاوناش قەیرانەکێ تورکیای بە نزیک بییەیۆو دەسەڵاتی چارەسەر مەکریا بەڵکوم قووڵتەرێ باوە، کێشەی جیدی پەیوەس بە ئازادیی و دیموکراسی هەن.

باقرخان ئەرەیاوناش پیسەو هێزە ئۆپۆزیسیۆنەکا جە ڕووا ئایندەینە زیاتەر جە یۆترینی نزیکێ باوە و هەوڵ مڎا پرسەکا بە گفتوکۆی و ئەرەنیشتەی چارەسەر کەرمۍ، هاموەخت سەرنجش وستەن سەروو ئا ئەرکە  ئێژایە کە گنۆ ئەستۆو پارتێوە پیسەو جەهەپەی.

باقرخان جەختش کەردۆ، قووڵبییەیۆو قەیرانەکا پاسە وازۆ ئۆپۆزسیۆن ئازایانەتەر دەور گێڵنۆ؛ ئاڎیچ چی روانگۆ  ئەرکوو وێشا جابەجئ کەرا.

هامسەرۆکەو دەم پارتی تولای حاتەم ئۆغۆللاریە ئەرەیاوناش داخەم مەشۆ تا ئیسە سیاسەت هەرمانەش پەی بەشکەردەی گلێرکەی کەردەن، هاموڵاتیێ جە هورچنییەکانە وەرپرسیاریشا وستەن ئەستۆو گرلایۍ، واتش: "پۆکەی ئەشۆ  پەی کۆمارێوە دیموکراتیکی خەبات کەرمی".

دماتەر سەرۆکو گردینوو جەهەپەی، ئۆزەل سەرنجش وست سەروو هەوڵوو زەوتکەردەی ئیرادەو گەلوو وانی و ئەرەیاوناش ئی هەوڵە بییەن بە مایەو بریندارکەردەی دیموکراسی جە تورکیانە، بەڵام پەشتیوانیێوە گرنگ نیشانە دریا و ڕا چا خەڵەتەیە گیریا، واتش: "دڵوەشەنا هەڵای هەرمانەو قەیومی نەسەپیان".