گەریلاکۍ یەژاستاری: ئېمە بە مدرامان دمایی بە ئېش و نارەحەتیەکا میلەتەکەیما مارمېنە

گەریلاکۍ یەژاستاری "فەراشین زاگرۊس"ە و"ئارژین دەستان باکور"ە باسشا جە جۊشو خرۊشو نەورۊزو ٢٠٢٣ۍ کەرڎو ئانەشا وست ڕوۋە کە جە کەشەکاو کورڎسانیەنە ئاېۍ گەرەکشانە شایستەو مدرامانو ئاۋېرو نەورۊزی با.

نەورۊز جە کورڎسان، ترکیە و ۋەرکەوتوو دلېراسەینە و حەر چوۋار لاو جەھانی بە جۊشو تامەزرۊیۊ پېشوازیش ۋنە کریا. گەریلاکۍ یەژاستاری "فەراشین زاگرۊس"ە و"ئارژین دەستان باکور"ە جەژنەو نەورۊزو ٢٠٢٣ ێشا جە ۋاچېۋەنە پۍ ئاژانسو ھەۋاڵی فرات(ANF)ی ھورسەنگنا.

"فەراشین زاگرۊس"ە سەرنجش وست سەرو گرنگی نەورۊزی پۍ گەلوو کورڎی و ئەرەیاۋناش:"کە ئاڎۍ بە گیانو مدرامانو نەورۊزی دەسشا بە ساڵەو ٢٠٢٣ کەرڎەن. فەراشینە ۋاتش؛ جە تەمامو تاریخیەنە گەلو کورڎی بە ۋەڵېۋەبیۊو کاوەکا سەردەمی ۋەردەوام ۋەران ۋەرو زوحاکەکا مرڎانۊ و ۋاتش؛ گەلو کورڎی جە ڕاو نەورۊزیۊ زیاتەر شانە مڎۊنە ۋەرو ئەرەکۊشای و مدرامانی. ئێمەیچ بەبۊنەو نەورۊزیۊ وەعدو بەرزکەرڎەیۊ ئەرەکۊشای مڎەیمۍ".

*گەرەکمانە ئېرو نەورۊزی گەشتەر کەرمۍ:

"فەراشین زاگرۊس"ە باسسش چانەی کەرڎ کە گەلوو کورڎی بە بەخشاو قوربانی ۋېش یاۋنان ئی ئاستە و جە درێژەنە سەرنجش وست سەرو ئا تایبەتمەنڎیاو ۋاتش؛" ئا ئەرەکۊشای ئازاڎیەی کە مەزڵوم، ڕەخشانە، ڕوناھی و بېریڤانەکا گۊرەتەر بیەن و گۊرەتەریچ بۊ. پۍ ئانەی جە کەشەکا کورڎسانیەنە ئاۋېرو نەورۊزی گەش کەرمۍ ئێمە گەرەکمانە جە تەمامو کەشەکا کورڎسانیەنە شایەنو ئی ئەرەکۊشایە بیمۍ".

"فەراشین زاگرۊس"ە سەرنجش وست سەرو تەئسیراتو بومەلەرزەکەو سەرنیشتوو کوەرڎسانی و جە بارەو ھومېڎو ئاواتەکاو ۋېش نەورۊزنە ۋاتش؛" پېسە مزانیۊ ئېمە ئینایمۍ قۊناغېۋی دژوارو ئەرەکۊشاینە. گەلەکەما بەمەڵامەتو بومەلەرزەکەیۊ ئېشۍ فرە چەشۊ. ئېمەیچ ۋەعد مڎەیمۍ کە بە مدرامانو ۋېما ئېشو گەلەکەیما ساڕېژ کەرمېنە. جارېۋەتەر نەورۊزو گەلەکەیما پیرۊز کەرمۍ".

 

*ئېمە خۊتانکەرڎەی جە میراسو تاریخو نەورۊزی مکەرمۍ:

"ئارژین دەستان باکور"ە جە سەرەتاو قسەکاشنە نەورۊزش جە ڕابەر ئاپۊی و ھەڤاڵاش پیرۊزکەرڎ. گەریلا"ئارژین "ە باسش چانەی کەرڎ کە نەورۊز پۍ ئاڎیشا یاگۍ سەرھورداین و ۋاتش؛" ۋېش جە ۋېشنە نەورۊز ڕۊحو سەرھورداو مدرامانیا. ئېمە شانە مڎەیمۍ ۋەرو ئا میراسە تاریخیە. ئېمە ئینایمۍ جۊشو خرۊشو ۋەشی نەورۊزینە".

*گەریلا جە گرڎو کەشەکانە ۋېڕاگری مکەرا:

"دەستان باکور"ە ئانەیچش وست ڕوۋە کە گەریلاکۍ ئازاڎیی کورڎسانی ئارۊ جە گرڎو کەشەکا کورڎسانیەنە ۋېڕاگری مکەراو پەیامەکەش جە بارەو نەورۊزیۊ پی قسا یاۋنا دمایی:" ئېمە بە ئاۋېرو 'مەزڵوم، زەکیە، ڕەخشانە، ڕوناھی و بېریڤانۍ نەورۊز پیرۊز کەرمۍ. ڕەنجو ئەرەکۊشای ئاڎیشا بنەماو گۊرەکەرڎەو مدرامانی بەقوەتکەرۊ. پېسە ڕېبوارۍ ڕاو ئی مدرامانیە پۍ دمایی پنە ئارڎەی بە کۊلۊنیاڵیزمی و ئەرەگیری ئېمە گرڎ دەقەو سانیېۋە  ئاماڎېنمۍ".

ھ.ش