ئا گۊشەگیریە ماوەو ٢٤ ساڵان ملوو ڕابەروو گەلوو کوردی، عەبدوڵا ئۊجالانیرە سەپنیۊ، ساڵانی ویەرڎەنە فرە دژوارتەر بییەن و ماوەو ٢٨ مانگی وەڵینیچنە هیچ نۊعە هەواڵ و زانیاریێوە بارەشۊ نییا، بەرڎەوام داواکاریی پارێزنەرا و بنەیانەکەیش لاو دامودەزگا پەیوەندیدارەکاو دەوڵەتوو تورکیوە ڕەت کریۊوە.

هیوا حەسەن، چەمڎاری سیاسی و چالاکوو شاروو کەرکووکی، جە دواێشنە پەی ئاژانسوو هەواڵوو فورات(ANF)ی، گۊشەگیریی سەروو ڕابەروو گەلوو کوردی عەبدوڵا ئۊجالانییش شەرمەزار کەرد و داواش جە تەماموو خەڵکوو کورڎسانی کەرڎە کەمپین ئەرەبیاونا و بەشداریی کەمپینۍ با پەی ماڕای گۊشەگیری.

دوور جە گردوو بەها دیموکراتیکەکا و مافوو ئینسانی گۊشەگیرییشا سەپنان

هیوا حەسەن، بارەو سەپنای گۊشەگیریی سەروو ڕابەروو گەلوو کوردی، عەبدوڵا ئۊجەلانیوە، واتش: "تورکیا وێش پێسە وەڵاتێوە دیموکراتی نیشانە مڎۊ، وەلۍ بەداخۊ وەراوەرنە بەرڎەواما جە پاشێلکەرڎەی مافوو گەلوو کوردی و سەرکرڎێوە پێسە بەڕێز ئۊجەلانی، کە دەوڵەتوو تورکیای ماوەو دووۍ ساڵا و نیمین دوورا جە گردوو بەها دیموکراتیکەکا و مافوو ئینسانی، گۊشەگیریێوە تندش کەرڎەن سەروو بەڕێز ئۊجەلانی، تەنانەت ڕا مەدا بەڕێز ئۊجەلان چەمش بە پارێزنەر و بنەیانەکەیش گنۊ".

وەرەچەماو گردوو دنیێوە تورکیا پاشێلکاری کەرۊ

ئا چەمڎارە سیاسییە واتیچش: "ئی گۊشەگیرییە قێزەونەو تورکیای پاشێلکەرڎەێوە زەقا، کە وەرەچەماو گردوو دنیێوە کەرۊش، ئێمەیچ ئیدانەو ئا گۊشەگیرییە کەرمۍ و هومیدەوارێنمۍ گردوو ناوەندە جیهانییەکا سەرش بەیاوە جواب".

پەی ماڕای گۊشەگیری تەماموو خەڵکوو کورڎسانی کەمپین ئەرەبیاونا

ئاخیرۊ هیوا حەسەن ئەرەیاوناش: "دەوڵەتوو تورکیای تەرسیش هەنە جە ویر و فەلسەفەو ئۊجەلانی، هەرپاسە تەرسیش چا شەپۊلە وەرفراوانۍ ناڕەزایەتی دژوو گۊشەگیری هەنە. هومێڎەوارێنمۍ تەماموو خەڵکوو کورڎسانی کەمپین ئەرەبیاونا پەی پەشتیوانیی بەڕێز ئۊجەلانی و ماڕای گۊشەگیری تا زووتەرین وەختنە، پارێزنەر و کەسوکارش چەمشا پەنەش گنۊ و دڵنیۍ با جە بارودۊخیش و تەندروسیی بەڕێز ئۊجەلانی".

س.ز