گوڵستان کلچ کۆچیگیتە، یاگەگیرەو سەرۆکو گروپو دەم پارتی پەرلەمانەنە ئارەیاوناش، "گرنگتەرین کەسایەتیێ کە تاوۆنە پەی ئاشتی و چارەسەری هەنگامە بنیۆنە، ئێژا ئۆجالانا" و واتش: "ئی کەسایەتیە گرنگە هەڵای ئینا گۆشەگیرینە."
گوڵستان کلچ کۆچیگیتە یاگەگیرەو سەرۆکو گروپو دەم پارتی جە کۆنگرێوە ڕۆنامەوانینە جە پەرلەمانەنە هورسەنگنایش پەی ڕووەدایەکا کەرد.
گوڵستان کلچ کۆچیگیتە سەرەتا قوربانیێ 'ئەنفال'ێش یاڏوستیمێ و ئەرەیاوناش پەی ئانەی بە ڕەسمی دان بە کۆمکوژیی نریۆنە، دەم پارتی چی حەفتەنە ڕەشنووسو یاسایی پێشکەشو پەرلەمانی مکەرۆ.
گوڵستان کلچ کۆچیگیتە یاڏش وستیمێ کە ١٤و نیسانی ساڵوەگەڕو 'ئۆپەراسیۆنەکا کەجەکە'ین و واتش: "چا ڕووەنە دەسە سییاوەکێ دەسشا بە هەوڵدای کەرد پەی تێکداو هەوڵەکێ چارەسەریی بە ڕاو ئۆپەراسیۆنەکا کەجەکەی. داخەم مەشۆ ئا هەوڵێ سەرکەوتوێ نەبێنێ."
گوڵستان کلچە ئەرەیاوناش، "ئارۆ جارێوە تەر گەرەکما سەرەنج وسو سەرو گرنگی چارەسەری و دیالۆگی."
گوڵستان کلچە ئەرەیاوناش کە ئاڏێ پەی تورکیایێ کە گرڏ تاوانە ئیسفادە جە ماف و دادپەروەری هورگێرانە ئەوەکۆشای مکەرا و واتش: "ئێمە بە ئیرادێوە بەرزۆ درێژە پی ئەوەکۆشایە مڏەیمێ."
گوڵستان کلچە یاڏش وستیمێ گلێرۆبییەو حەفتەی ویەردێ بەینو سەرۆککۆمار ئەردۆغان و شاندو دەم پارتی واتش: "ئی گلێرۆبییەی خاڵێکینوقتێوە گرنگە بێ پەی بانگەوازو ئاشتی و گلێرگەو دیموکراتیکی، پەی ویەردەی پەی قۆناغێوە تازەی. چا دیدارەنە هورسەنگنای سەرو ئا لایەنا کریا کە تا ئیسە وەردەمو پرۆسەکەینە ئاستەنگێنێ. چا دیدارەنە واوەی کریاوە کە پەی بەردەی وەڵێ ئا پرۆسەیە کە ئێژا ئۆجالان دەسش پنەکەردەن، پەنەوازا بارودۆخو ئێژا ئۆجالانی خاستەر کریۆنە و دمای بە گۆشەگیری ئیمرالی بێنە.
حەر چنە باس چانەیە کریۆنە کە مشۆم گۆشەگیری هورگیریۆنە، بەڵام بڕێ لایەنێ بە بەردەوامی هەوڵمڏانە چی مەسەلێ نەیاوانە. ئا ڕێبازێ نیشانە دریانە کێشەکا پێچەوانێ مکەراوە. ئایا گرنگترین کەسایەتی کە تاوۆنە هەنگامە بەرەو ئاشتی و چارەسەری بەرۆنە، خودو ئێژا ئۆجالانی نییا؟ بەڵێ، تەنیا ئاڏا. ئایا بە شێوێ بەرجەسە ئی ئیرادە نیشانە نەدرییان؟ مادام داواو بێدەنگکەردەو چەکەکا و لابەردەیشا کریۆنە و داواو دمای ئاردەی بە تنوتیژی کریۆنە، چی گرنگترین کەسایەتی کە گەرەکشا ئی ڕەوڵەی گیڵنۆ هەڵای ئینا گۆشەگیرینە؟
هەرپاسە چی ئاستەنگ نریۆرە؟ ئایا گرڏ کەسێ چارەسەری و ئاشتیش گەرەک نییا؟ ئێمە گەرەکمانە جارێوە تەر وەردەموو ڕاو گرڏینە ئی پرسیارا واوەی کەرمێوە. ئەر ئیجارە قەرارما دان پێوەرە تاریخی وەشکەرمێنە، پێوەرە هەنگامەما نیێنە و ئیسە ئینایمێ قۆناغێوە تاریخیەنە، چی هەڵای باسو ئیجتیهادی و ڕێبازی کریۆنە؟ بەڕاسی یاواینەو ئی بابەتەیە محاڵا.
بە دەیان جارێ جە پەرلەمانەنە باسو ئی بابەتەیما کەردێنە. پەرلەمان چێش مکەرۆ پەی چارەسەرو دیموکراسیانەو پەرسەو کوردی؟ جە مانگەو تشرینو یوەمیۆ تا ئیسە قسێ فرێ کریێنی ، هەنگامێ نریێنێ، گلێرۆبیێ ئەنجام دریێنی، هەرپاسە بانگەواز ئەرەیاویان. بەڵام پەرلەمان هیچ هەنگامێوەش نەنیێنە. چی هیچ هەوڵدایێ و چالاکیێ جە پەرلەمانەنە نییا؟ چی دەسوەڵێ وستەی نییا؟ ئێمە چینەیە مەیاومێنە."
