گەریلاکاو ئازاڎیی کوردسانی جە ساڵانی ویەردۆ تا ئیسە جە بەرزتەرین ئاستوو وەڵینگەو کوردینە گیانبازی مکەرا. ئانۍ کەم تا فرە ڕاسی گەلوو کوردی مزانا، ڕاسی ئی قسۍ مزانا.

فاشیزموو ئاکەپە – مەهەپەی و میدیاو جەنگی تایبەتوو ئاڎیشا ، بێجگە جە شارتەیۆ مەرگوو سەروازەکاشا جە لېوەتەرۆ یۊ چا پرسە سەرەکیا کە سەرنجش وزا سەر، حۊڵداین پۍ شارتەیۆ هێزوو گەریلاو کوردی. حۊڵەکێشا چی ساڵا دماییەینە پۍ ئەرەبڕیەیرەی گەریلاکان جە خەڵکی و ڕابەرایەتی. مەڵامەتۍ شارتەیۆ مەرگوو سەروازەکاشا جە خەڵکی فرێنۍ، بەڵام مەڵامەتی ئەساسی حۊڵداین پۍ پەردەپۆشکەردەی هێزوو گەریلای فیدایی. ئیتر گرد ناچارێنۍ ئینەی قبوڵ کەرا، جە حیچ بەشێوەتەروو کورڎسانینە ژیۋایۍ پېسە ژیۋای گەریلاکا کوردی بیەیش نییا، جەنگەوانۍ ئازاڎیی پی جۊرەیە نیەنۍ. حەر پۊکەی گەنجۍ کوردی و گەنجۍ شۆڕشگێڵنۍ کوردسانی جە دژوو ستەمکاری و فاشیزمی  جە خەتەو گیانبازینا ۋێڕاگری کەرا. جە وەڵینگەو گەلەکەیمانە گەورەتەرین مدرامان سەروو ئی بنەمایۍ کریۆ.

پۍ ئانەی کاریگەری سەروو ورەو گلېرگەو کوردی بنیەیمێرە

میدیای جەنگی تایبەتوو تورکی سات بە سات ئەرەیاۋنۍ و قسۍ جە بارەو ئۆپراسیۆنەکەیۆ وەڵاکەرۊوە، هجومی ئاسمانی و زەمینی جە چوارچێوەو جەنگی دەرونینە وەڵا کەرۊوە. پا گرڎ هەواڵە ساختە و درووا هەم گەرەکشا گلێرگەو تورکیای چەواشە کەرۆ، هەمیچ کاریگەری سەروو ورەو گلېرگەو کوردی بنیۊرە. گەرەکشا واچۆ 'ئا هێزەی بڕواتا پنەشەنە و پەشتیتا قایمەنە پنەش، ئێمە دماییما پنە ئاردەن، هێزش نەمەنەن تا ۋێڕاگری کەرۆ، شمەیچ سەرە منامندێرە، بیدۍ بە کۆیلۍ ئێمە'. ئا مدرامانەی بە سەرمەشقی گەریلای کریۆ، تووشوو شکسیشا کەرۆ. فاشیزم چنڎیچ حۊڵ بڎۆ پۍ شارتەیۆ، بەڵام گەریلا جە گرڎ هەلومەرجێوەنە فاڕیۆ پۍ هێزوو گورزشانای. بێگومان دوژمن تەرسۆ کە ئا رۆحە گیانبازۍ هێزوو گورز ونەشانای کاریگەری کەرۆ سەروو تەماموو گلێرگەی. فاشیزم موینۆ کە ئا هێزەی گەرەکشا سەرەش پنە نامنۊرە، ڕۆ دماو ڕۊی زیاتەر بەقوەت بۆ. ئا هێزەی ماتڵا چۆکش پنەبڎۊرە، بە پێچەوانۊ شکۆمەندانە ئینا سەروو پەیاوە و شکس پا فاشیزمەیە مارۆ کە بیەن بە بەڵا پۍ گیانوو مرۆڤایەتی.  

تورکیایچەنە کەسانێوە هەنۍ کە ۋنەپەرسایش چنەکەرا

هێزوو گورز ئەشای گەریلای چی ماوەو دماییەینە بە تەمامەتی فاشیزمی ماڵۊرە. ئیتر چنڎە حۊڵیچ بڎا ۋێشا بشاراوە، بەڵام بێجگە جە شکسی ۋەران ۋەر بە گەریلای حیچ چارێوەشا نییا. حەرچنە حۊڵ مڎا کە ئا مرۆڤۍ جە تورکیانە جیاواز ویرکەراوە، تەرسناشا و سەرکوتشا کەرا، بەڵام ئیتر مەتاوا ئانەی کەرا. بڕۍ هێز و لایەنۍ پەرسا پۍ چی گەنجا هەژارۍ تورکی بەرەو مەردەی کیانا.

ئەنەیاوای جە نکۆڵی و ئەسڕیەیۆ

جە ۋەران ۋەروو ئا گرڎ فشاری، کوشتەینە، گەریلا و گەل دەسبەردارۍ ۋێڕاگری مەبا. گلېرگێوە، وڵاتێوە بیەیش هەن گەرەکشانە نکۆڵیش چنەکەرا و دلێنەبریۆ. ئا وەختە مشۊم بە عالی جە نکۆڵی و ئەسڕیەیۆ بیاوانە. جە دژوو ئا گلېرگەیەی کە گەرەکشانە دلېشەنە بەرا، گرڎ ڕا و رێبازێوە بەکارمارا. گرڎ شێواز و چەکۍ قەڎەغەکریا جە تەرەفوو فاشیزموو دەوڵەتوو تورکیوە بە رەوا منریۊرە و بەکارمۍ. حەرپۊکەی جە کەسایەتی گەریلاینە ئاخێزێوە سەر جە نۆ ژیۋایۆ و مەنەیۆ بە ئەنجام میاوۆ. گەلوو کوردی جە کەسایەتی گەریلاینە سەرجەنۆ ۋێش خوڵقنۊوە؛ بۆ بە ساحیب و هۆشمەندی، هەڵوێس، پیمەروو و ژیۋایۍ تازەی؛ ئا مەژگەی چێر چەپۊکی، بێدەنگی و وێدایدەسۊش قبوڵ کەردەن، شکس مارۆ، گلېرگە جە سەرۆ پۍ واری سەروو بنەماو پێودانگەکا ئازاڎیی رابەر ئاپۆی سەر جەنۆ بنیاڎ منریۊ. گەلوو کوردی ۋێڕاگری کەرۆ، ژەنا و گەنجا کوردی کۊشیانە، عالتەرین گەنجێما بە کۊشیای گەریلایی دوژمنی قەسەم واردەی کوردا دلېنەبەرمۍ. جەنگی حەقەتینەو گەلی، مدرامانوو گەلی بە سەرمەشقایەتی گەریلای ئەنجام مڎریۆ.

حەقەتینەو گەلی جەنگ کەری و ۋێڕاگری

ژیۋایۆ رابەرایەتی میاوۆ بە حەقەتینەو گەلێوە کە ۋەران ۋەر بە گرڎوو هجومەکا ۋێش زانا کەرۆ، بە رێکوستەیش کەرۆ، جە گرڎ ڕووێوە گیانبازی کەرۆ، پەی وڵاتی، ۋێڕاگری کەرۆ. گرنگا کە حەقەتینەو گەلی جەنگ کەری و ۋێڕاگری چنی خوڵقیان، گەل چنی یاوان پا ئاستەیە. گرڎوو تەماشەکەردەی، فەلسەفە، رۆح، هوشیاری مرۆڤەکا کە ۋێشا پۍ ئازاڎیی بەخت کەرا، گرنگا. ئا گەریلۍ کە گیانبازیشا یاونان پی ئاستیە، هورقوڵیۍ حەقەتینەو ئی گەلە ۋێڕاگرەینۍ. کەواتە دیارا کە دلۍ گلێرگەو کوردی، کولتور، ئەخلاق، رۆح، هەست و بەهاکا ئاڎینە سەروو بنەماو هوشیاری ئازاڎیی رابەر ئاپۆی فاڕیان. ئا مەژگەی کۆڵۊنیالیزم، سیستموو دەسەڵاتداری-دەوڵەتپەرستی و نەتەوەپەرستی حۊڵ مڎۆ دلۍ گلېرگەو کوردیرە خوڵقنۊش، وڕۆ و دلېنەبریۆ. وەڵېکۊتەی گەورەی پا جۆرە مارا ئاراوە. راسی ئا گەریلایا بە قارەمانێتیوە ۋێڕاگری کەرا سەروو بنەماو ئا هوشیاریە خوڵقیۆ. راسی سەرکۊتەی بە مدرامانوو گەریلای، گەل و رابەرایەتی مسۆگەر بۆ.

ئا داردەسۍ ئاساوو دوژمنی گێڵانا

بێگومان جە پاسە قۆناغێوەنە ریزەکۍ دیاری کریا. بڕۍ بیەیشا هەن کە گەرەکشانە چنەش وەرا. جە لېوە ئاخێز ئەنجام مڎریۆ، جە بەرزتەرین ئاستەنە گیانبازی هەن، بەڵام چەولایچۆ ئا داردەس و خائینۍ بیەیشا هەن کە ئاساوو دوژمنی گێڵنا. جە ئاژێوە چانەنە ئەرکی گەورە گنۆ سەروو شانا ئانیشا کە بە وشیاری ئازاڎیی ئاپۆییوە وەڵۍ کۊتێنۍ. مشۊم ئا مرۆڤۍ کە پێچەوانەو بەهاکا ئازاڎیی جماوە دلۍ گلێرگەینە ریسوا کریا، بە بێ ئانەی چەمەڕاو ئەمرەو یاگۍ با، سزاشا بڎا. ئیتر دژوار نییا کە ئانە درکش پنەکریۆ، ئاستوو کۊشیای بەرکۊتەن. کێ شۆڕشگێڵنا و کێ نییا، کێ وڵاتپارێزا و کێ نییا، کێ دۆسوو ڕۊوو تەنگانەین و کێ هامڕاو ڕووە وەشەکان، گرڎ ئاشکرا بی.

دوژمن بە شێوێوە هەمەلایەنە هجوم کەرۆ

سەرچەمەو حەقەتینوو هێزوو گەلوو کوردی پەکەکە و پاژکەنۍ. گلېرگە رۆحوو مدرامانین، یۊبیەی، ئیراڎە، ویست، رێکوستەبیەی، ئامراز، بە پوختی گرڎوو چێوەکا ۋێش جە پەکەکەی و پاژکی هۊرگێرۆ. دوژمنیچ پۍ دلێنەبەردەی ئا سەرچەمەو هێزیە، تا متاوۆ هجوم کەرۆ. هجومی هەمە لایەنە ئینا ئارانە. وەختوو ئانەی ئامان کە تەسەورەکۍ دوژمن هۊرگێڵاوە و پوچۍ کریاوە. پۍ ئانەی ئا گیانبازیەو گەریلای کە سەرمەشقایەتی قۆناغەکەی کەرۆ بە گرڎ یاگێرە وەڵا بۊوە، مشۊم مرۆڤ بیاونۊش بە گیانی سەفەربەری. مەبۆ مرۆڤ جە هەڕەشەکا دوژمنی تەرسۆ، ۋەروو ئانەی جگە جە هەڕەشا حیچش پۍ نەمەنەنۆ. ۋێش ئەگەر تاوابیێش ئەنجام بەدەسبارۆ، تائیسە ئا ئەنجامەشە بەدەسئاردەبۍ. ئاشکران کە دوژمن جە ۋەران ۋەروو رۆحوو ئاپۆیینە شکسش ئاردەن.

گەنجاو کوردی مشۊم سەروازی پۍ سوپاو تورکی ڕەڎکەراوە

گەلوو کوردی بە وشیاری ئاپۆییوە مشۊم فەخر بە رۆڵە گەریلاکاشۆ کەرۆ. ئا قارەمانۍ حیچ گەل و گلېرگێوەنە هامشێوەشا نییا. رۆڵەکۍ ئی گەلەینۍ. بنەیانەو گەشمەرڎا، بنەیانەو گەریلاکا، بنەیانەو هامڕایا دلۍ زینڎانی ۋێڕاگری کەرا، گەل و دۆسا گەلوو کوردی کە هۆگرۍ کۊشیای ئازاڎیی کوردسانینۍ کە مزانا بە بێ فیداکاری و قوربانیدای کۊشیای گەورە نەبیەن. قۆناغوو کۊشیایۍ گەورەتەری، قوربانیدای گەورەتەرش گەرەکا. پا ئەنەیاوایۆ مشۊم هەڵوێس ۋەران ۋەر بە دوژمنی نیشانە بڎریۆ. پۍ نمونەی گەنجا کوردی وڵاتپارێزی مشۊم سەروازی پۍ سوپاو تورکی ڕەڎکەراوە، نەلا پۍ سەروازی. ئانۍ بە شێوەی ئاشکرا خزمەت بە دوژمنی کەرا، خیانەت جە گەلەکەیشا کەرا، مەبۆ بازا تێکەڵ بە گلېرگەی با. گەلی وڵاتپارێز جە بەروو وڵاتی و دۊساشا، مشۊم هامکاریێوە گولانەیچ بە بودجەو جەنگی فاشیزمی نەیاونا، مشۊم ۋێشا رێکوزا. جەنگوو مەنەی و نەمەنەی ئینیشا گرڎ موازۆ. دەرفەت هەن پۍ بەدەسئاردەی سەرکۊتەی و شکسدای دوژمنی.