گەریلاکاو هەپەگەی چیاگەر ئەحمەد و کامووران ئەحمەد بە بۊنەو ١١مین ساڵوەگێڵوو کۊکوشییەکاو پاریسیوە پەی ئاژانسوو هەواڵوو فورات (ANF)ی قسێشا کەردە.

گەریلا چیاگەر ئەحمەد ئەوەڵوو قسەکاشنە گەشمەرداو شۊڕشیش یادۍ کەردێوە و واتش: "جە ١١مین ساڵوەگێڵوو کۊکوشیی پاریسینە هامڕا سارا، فیدانە و لەیلۍ یاد کەرمێوە. یاگۍ هامڕا سارۍ دلۍ کۊشیایی ئێمەنە فرە گرنگەنە. وڵاتپارێزنۍ و هامڕایاو ئێمە مزانا، ئا ڕەنجە کە هامڕا سارۍ دان ئیساتۍ دلۍ کۊشیایمانە ئینا ئاستێوە بەرزنە. وەختۍ باسوو هامڕا سارۍ کریۊ، کۊشیایما فکر گنۊوە. وەروو ئانەی دلۍ گلێرگەی و هەم ڕێکوستەیەکایچەنە وەرانوەروو دماکەوتەیی و قەیرانەکاو سیستمینە ئاستێوە باڵانە یاگۍ ڕاوەبەردەی کۊشیای بێ. هامڕا سارا ساڵەو ٨٠ کانە داوا کەرۊ بە پرۊفیشناڵانە کۊشیۊ. ڕابەر ئاپۊی و هامڕایەکاش مشناسۊ و بەشداریی ڕێکوستەی کەرۊ. ئا وەخت گلێرگەو ئێمە دلۍ دماکەوتەیی و قەیرانە فرەکاو سیستمینە بێ. پێسە هەمیشەی سیستەم گەرەکش بۍ قەیرانەکاش وزۊ دلۍ گلێرگەیۊ.  وەرانوەروو ئی دماکەوتەیی و قەیرانانە هامڕا سار جوابێوە قەوەتە بێ. ئەسەد ئۊکتایی زیندانوو ئامەدینە نوێنەرایەتیی سیستمی دماکەوتەیی و گڵیاویی کەرێ، گەرەکش بۍ جە کەسێتیی سارێنە ژیوای ماڕۊ. هامڕا سارا بە کۊشیایی هەرە باڵاو وێش جوابێوە فرە قەوەتش بە سیستمی گڵیاو و ئا کەسە دماکەوتا داوە. مزانمۍ کە هامڕا سارا یاگۍ سەربەرزەو سەرەوردای بێ. هامڕا سارا چالاکە بۍ بوو، ئیساتۍ هامرا ژەنەکێش سەنگەرەکاو جەنگینە و تونێلەکاو زاپینە و مەتیناینە نوێنەرایەتیی هامڕا سارۍ کەرا. ئا هێزە کە جە هامڕا سارێوە ورشا گێرتەبێ،جوابوو ئە پەنە مداوە. چالاکییەکاو هامڕا سارۍ و هامڕا ڕووکەنێ، کە مێرسیننە کەردشا، هێزی بنەڕەتییش جە هامڕا سارێوە ورگێرتەبێ. هامڕا سارا خەڵکوو دێرسیمی بۍ تایبەتمەندییەکاو دێرسیمیش بە مدرامان گێرتێبێنۍ بە بنەما. پێسە کەشەکاو مونزووری سەختە بێ. هامڕا سارا وەرانوەروو ئی کۊنترایانە، وەرانوەروو ئانیشانە ئی سیستەمەشا قبووڵ کەرد، کۊشیاییش ئاستێوە بەرزنە کەر، ئێمەیچ شۊنکەوتۍ هامڕا سارێنمێ. شۊنکەوتۍ سەرەوردایشنمێ.

ئینجا گەریلا کامووران ئەحمەد پێسە دەسش بە قسەکاش کەرد: " سەرەتا ڕەنج و کۊشیایی گەشمەردە سارا، لەیلا و فیدانۍ یاد کەرووە، سەرەو ڕێز و نەوازشیشا پەی کۊمنوورە بۊ، ئێمە چەنی هامڕا سارۍ نەژیێنمێ، هەستەکێش مەتاومۍ بارمۍ سەروو زوانی. وەلۍ ئا ڕەنجە کە هامڕا سارا دانش ئیسەتێچ بەردەواما، پەکەکە یوەم هەنگامەو وێش چەنی هامڕا سارۍ نیا. ئێمە بە ڕاو هامڕا سارۍ هاگاما جە ئەرەیاونای بێ، بنەیانەکەما وەڵاتپارێزنۍ نەبێنی وەلۍ سەشەسیایشا پەی هامرا سارۍ فرە بۍ پاسە سەرنجەو منش کێشتە. بەتایبەت بییەی من دێرسیمنە و دلۍ کۊشیایینە گرنگیێوە فرەش بێ. زارۊڵەییوە هاگادارش بێنا و گەرەکم بۍ بیاووشنە، کۊشیایش زیندانوو ئامەدینە ١٤ تەمووزینە، بە شێوێوە سەرەکی یاگێش گێرتە، کۊشیایۍ بەرز بۍ ئاستێوە هەرە بەرزنە و بەنرخ بێ. دلۍ پەکەکەینە ورەو هامڕا سارۍ فرە جیاوازا و یاگۍ تایبەتەش هەنە. سەرۊکایەتیی گرنگی فرە دۍ بە هامڕا سارێ. وەختۍ کە سەرۊکی وینمۍ ئا نزیکایەتییە کە سەرۊک پەی هامرا سارۍ نیشانەش دۍ بە ڕێز و بە نرخ وینمێش. سەرۊکایەتیی هەمیشە گەرەکش بۍ هامڕا سارا گنۊ وەڵێ. هەنگامەی بنەڕەتییەو بەسووپابییەی ژەنا جە ڕاو هامڕا سارێو نریۊ. چونکوم پیسە ژەنێوە ئەوەڵۊ بەشداریی ئی کۊشیایە بێ. یانۍ سەرمەشقەو گردیمانە. خاس مێوە ویرم، سەرۊک بە هامڕا سارێش واتەبۍ 'تۊ متاوی بی بە سەرۊکەی گردینەو ژەنا.' وەختۍ تەماشاما کەرۍ نزیکایەتییش چەنی سەرۊکیما وەرانوەروو هامڕا سارێوە بێ. ڕەنجوو هامڕا سارۍ بۊتاننە و پانیشتنە و هەتا سەرۊکایەتییچ بێ، و ئیسەیچ بەرهەمش وینمێ. هامڕا سارا، گۊیی و هامڕا ڕووکەنە بەرهەموو هامڕا سارێنی. ماوۍ درێژ دلۍ کۊشیاینە بۍ و فرە چالاکە بێ. ئیساتێچ ئا دۊس و وەڵاتپارێزنۍ کە بەشداریی ڕاپیمایەکا کەرا، سەروو میدیایۊ پڕوپاگەندەو ئێمە کەرا، گردش بەرهەموو هامڕا سارێن. پەوکای پێناسەکەردەیش فرە زەحمەتا پەیما و مەتاومۍ بەتەمامی بشناسمێش. واتەی بڕۍ چێوا زەحمەتا یۊ چانیشا کەسایەتیی هامڕا سارێن. پێسە چەنی مەتاومۍ ١٤ی تەمووزی بە زوان واچمێ، هەمان شێوە ڕەنج و بەرهەمەکاو هامڕا سارێچ مەتاومۍ بە زوان واچمێ. تا ئیساتێچ باسوو هامڕایەتییش کریۊ، گەر چەنیش ژیوێنمۍ تاوێنمۍ باسش کەرمێ، چونکوم ڕەنج بە زوان مەوچیۊ".

گەریلا کاموران پێسە دماییش بە قسەکاش ئارد: "ئێمە ماچمۍ هامڕا سارا چێش بۊ با بۊ، تۊما فکر مەشیوە، ئا کۊشیایە کە تۊ دەست دانە ئێمە قەوەتتەر کەرۊ. حەرچندما جەدەس بۍ قەوەتتەرش کەرمێ، ئێمە سەروو ڕێبازوو تۊوەنمۍ و سوپاسگوزارێتنمۍ ".