سەرەڕاو قەرارەکا پەکەکەی پەی دمایئاردەی بە گرڎو چالاکییەکاش و ۋۍ فەسخکەردەی، هەرپاسە بەردەوامی قەڎەغەکەردەی پەکەکەی کە جە ئەڵمانیا جە ساڵۊو ١٩٩٣ێوە بەردەواما. ئی مژارۍ بیۍ یاگۍ مشتومڕ و گفتوگۊکەردەی.

حەفتەی وەڵین داواکاریێوە جە دادگاو کارگێڕی بەرلینی تۆمارکریا پەی لادای قەڎەغەکەردەکەی. سەرۆکۊو جەمەو ماف و دیموکراسی مېیاننەتەوەیی (ماف-داد)ی پارێزنەرە هایک گەیسویدە، داواش جە حکومەتو ئەڵمانیای کەرد ۋەرپرسیاری جە ئەستۆ گێرۆ و واتش: "تۆپەکۍ ئیتر ئینا مېڎانو قەراردای ئەڵمانیاینە."

سەرۆکۊو جەمەو ماف و دیموکراسی مېیاننەتەوەیی (ماف-داد)ی پارێزنەرە هایک گەیسویدە ئاماژەش پانەی دا قەرارەکۍ پەکەکەی جە ١٢ەمین کۆنگرەو ۋێشەنە "دمایی ئارڎەی بە گرڎو چالاکییەکاش" پەی ئەڵمانیای بی بە قۆناغێوە تاریخی. هەرپاسە ئی قەرارشە پېسە هەنگامېوە گرنگۍ پەی گێڵای جە چارەسەری ئاشتی هۊرسەنگنا.

پارێزنەەرە هایک گەیسویدە جەختش چانەیچ کەرڎۆ پێشئامایەکۍ تورکیای ڕاسەوخۆ کاریگەری سەرو ئەڵمانیای منیۆرە و واتش ئەرکو حکومەتو ئەڵمانیایا پاڵپەشتی پڕۆسەو ئاشتی بکەرۆ.

جە بەردەوامی قسەکاشەنە هایک گەیسویدە ئاماژەش پانەیچ دا داواشا جە دادگاو کارگێڕی بەرلینی کەردەن پەی هۊرگېرتەی قەڎەغەو پەکەکەی جە ئەڵمانیانە و ئاماژەش پانەی دا کە تۆمەتۊو "ئەندامبیەی جە ڕێکوزیێوە تیرۆریستی بیانی" جە دژو ڕامېیاریمەدارا کوردی، بە تایبەتی بەپاو مادەو 129b جە یاساو تاوانۍ، ئیتر دەور و مەعنێوەش نمەبۆ پېوەس بە چالاکییەکاو کورداوە جە ئەڵمانیا.

جە دمادمایی قسەکاشەنە هایک گەیسویدە ئاشکراش کەرڎ قەڎەغەکەردەی ئیساتۍ میلیۆنۍ و ٥٠٠ هەزار کوردۍ جە ئەڵمانیانە وزۊنە چېرو فشاری سیاسی و گلېرگەییوە. هایک گەیسویدە جەختش چانەی کەرڎۆ کە ئیتر حیچ بنەمېوە یاسایی و ئەخلاقی پەی درێژەدای پی ئاژەیە نەمەنەن و واتش: "نەک تەنیا گلېرگەی کوردی، بەڵکم چەپەکۍ ئەڵمانیایچ مشۊم بەشداریێوە چالاک چی پرۆسەنە بکەرا و ئانۍ ئینۍ مەنسەبو قەرارداینە مشۊم ۋەرپرسیاری جە ئەستۆ گێرا، ئیساتۍ تۆپەکۍ ئینا مېڎانو قەراردای و حکومەتو ئەڵمانیاینە."