سوپاو تورکی ئەرەگیرکەری مەتینانە هجوومی ئەرەگیرکەرییش دەس پەنە کەردەن، سوپاو تورکی بە هەلیکۆپتەر، فڕۆکەی جەنگی، تۆپ و کاتیوشا بێ مردای و بەهەسی مەیدانەکەی بۆردومان مکەرۆ. هەپەگە واتش، دەوڵەتو تورکی گەرەکشا جموجووڵو ئەرەگیرکەریی وەرفراوان دەس پەنە بکەرۆ.
ئەرەیاونیاو ناوەندو ئەرەیاونای و چاپەمەنیی هەپەگەی ئینەن:
"سوپاو تورکی ئەرەگیرکەری ١٦و نیسانی سەعاتەکاو شەوێنە هجوومی ئەرەگیرکەریش پەی سەرو مەیدانو دەگایەکاو ئاسێ، یەکماڵ، خرابێ، خانکێ و شێلازێی هەرێمو مەتینای دەس پەنە کەردەبێ. سوپاو تورکی ئەرەگیرکەری چا مەیدانانە پەناش پەی تاکتیکی جیاجیای بەردەبێ. نەک بە جارێو، بەڵکوم هەنگام بە هەنگام گنۆ وەڵێ و گەرەکشا جموجووڵی ئەرەگیرکەری وێش وەرفراوان بکەرۆ.
سەرو ئا بنەمێ شەوەو ١٧، ١٨ و ١٩ی نیسانی بە هەلیکۆپتەری هجوومبەر و فڕۆکەی جەنگی مەیدانو مدرامانو کەشو ئۆرتێ و چارچەلیش بۆردومانێ کەردێ. هجوومی ئەرەگیرکەری شەوەو ١٩ نیسان مەیدانو شێلازێ، بەرەو مەیدانو دەرگەلێ وەرفراوان بییەن و بەردەواما. دۆخو ئیساتێنە مەیدانەکاو کەشو هەکاری، چارچەل، گەشمەردە چەکدار، گەشمەردە پڵنگ، ئۆرتێ، ئاسێ، یەکماڵ، خرابێ، خانکێ، شێلازێ و دەرگەلێ کریێنێ ئامانجوو ئەرەگیرکەرا. جمومجووڵەکێ چا مەیدانانە بەردەوامێنێ. هەمان وەختنە ئا مەیدانێ عاسمانۆ بە هەلیکۆپتەر و فرۆکەی جەنگی و زەمینیچۆ بە تۆپێ و کاتیوشێ سەرەمڕ مدریۆشا وەنە. وەختێ زانیاریی وەرفراوان یاوا، دەمودەس گەلەکەیما و ڕای گردینی وەڵا مکەرمێوە".
