ئەندامەو کۆمیتەی مېیانی پەکەکەی هێلین ئومێدە بەشداریش جە بەرنامەو مەدیا خەبەرینە کەرد و جوابوو پرسیارەکا سەردان ئەرەنیش داوە.

هێلین ئومێدە سەرەتاو قسەکاش بە سڵامکەردەی جە مڎرامانوو ڕابەرو گەلوو کوردی عەبدوڵا ئۆجالانی دەسپنەکەرد و واتش: "دلۍ قۆناغێوە پڕایۆینە چالاکیەکۍ گەلوو کوردی جە هەرچوار پارچەو کورڎەسانینە بەردەوامېنۍ. هەڵمەتەو ئازاڎیی مېیاننەتەوەی جە مېڎانی مېیانەتەوەیینە بەردەوامەنە و گەلوو کوردی بە وەڵاکەردەیۆ داواکاریەکاش درێژە بە هەڵمەتەکۍ مڎۆ. چالاکیەکە بە تەنیا پەی ئازاڎیی جەستەیی ڕابەر ئاپۆی نیا، بەڵکو جە هەمانکاتەنە گەلوو کوردی جە گرڎ مژارێوەنە پەیوەندی بە ئازاڎیی جەستەیی ڕابەر ئاپۆیۆ منریۆرە. گەلوو کوردی چارەنویس و ئاینڎەو ۋێش پەیوەسکەردەن بە ئازاڎیی جەستەیی ڕابەر ئاپۆیۆ. سڵام جە گرڎوو ئا کەسا مکەرو پەی دیموکراسی، مافو مرۆڤی، ئشناسنامەو کوردی، ئازاڎیی جەستەیی ڕابەر ئاپۆی هەڵوێسشا هۊرگێرتەن و ئەرەکۆشا."

'پەنەوازا مرۆڤ گۆشش جە بانگەوازو زیلانۍ بۆ پەی ژیۋای ئازاڎیی'

هێلین ئومێدە جە ساڵوەگەڕو ٢٨ەمین ساڵەو گەشمەرڎەبیەو زیلانێنە بە ڕێزۆ یاڎوو زیلانێش کەردۆ و واتش: "نامۍ خوڎاوەڼی فرە بەکار بریۆنە، کاتێو باسوو خوڎاوەڼی مکریۆ ئشناسنامەو کۆلێکتیفی و گلېرگەی مێوە یاڎوو ئینسانی. پېسە ژەنە شۆڕشگێڵنێوە فرە عال جە گرڎوو قۆناغەکا کورڎەسانی یاوێبێنە، جە کەسایەتی ۋێشەنە شۊنەو چارەسەریرە گێڵۍ. حەرچڼە پایۍ واچمۍ خوڎاوەڼە ئاڼە ئینا یاگۍ ۋێشەنە. پیمەرەکا دیاری مکەرۆو هوشیارێما مکەرۊوە. پیمەرەکا ئازاڎیی دەسنیشانۍ مکەرۆ.

حەقیقەتوو زیلانۍ پەی گلێرگەو کورڎەسانی سەرچەمێوە هەستیاری مۆراڵییا. هێزوو ژەنەو کوردی ئەنەش نیشانە دا کە لاوازییەکێش ۋییەرنێنۍ. دڵسۆزی هەڤاڵ زیلانۍ دەربارەو ژیۋای فرە سەرەنج کېشا. کاتێ قسۍ ڕابەرایەتی مکەرۆ ماچۆ 'ژیۋای و مرۆڤایەتیم فرە وەش مسیۆ، گەرەکما بوو بە چالاکیێوە گەورە و ژیۋایۍ ماناڎار'. ئی چێوەیە جە کەسایەتی هەڤاڵ کەمال پیرینە وینێنمۍ. واچۍ 'ئێمە ئاڼە ژیۋایما وەش مسیۆ، کە جە دماینە متاومۍ مرمۍ. هەڤاڵ زیلانە جە مابەینوو ئێمە و ماناڎاری ژیۋای ئازاڎینە بیە بە سردۍ. پەنەوازا ژەنا و گەنجا ئی سەردەمەیە عال چانەی بیاوانە کە هەڤاڵ زیلانە باسوو کام جۆرە جە ژیۋای کەرۍ. باسوو دژە ژیۋای نمەکەرۆ کە جە ئیساتێنە پێشکەشما مکەرۆ. پارێزنەرێوە ژیۋایش بە ئایدۆلۆژی کۆمیناڵ، ئازاڎ، یەکسان و بە ئشناسنامەش خوڵقنابۍ. جە سەردەمێوە چامنەنە کە ژیۋای ۋەرتەسکریانۆ و تێکدریان پەنەوازا ئینسان گۊشش جە بانگەوازو هەڤاڵ زیلانۍ بۆ پەی ژیۋایۍ ئازاڎیی. یۊن جە ئەنجامە گرنگەکا خودوو ئا ژنەوییەینە کە پەنەوازا ئەنجامش بڎەیمۍ.

'ڕابەر ئاپۆ واتش، زیلانەی زیڼێم گەرەکەنە'

دووەمیچشا ئا چالاکیەنە پەی ڕابەر ئاپۆی ئەنجامش مڎا. جە ۋەرا ۋەر بە هرووژمۍ شکسواردەو سەرو ڕابەر ئاپۆینە ئاڼە توڕۍ بیە کە ئەرەپڕا سەرو دووژمنیرە. ڕابەرایەتی ئاڼە ساڵێن گیریان، ماوەو ٤٠ مانگان حیچ زانیاریێوەش جا بارۆ نیا. بەهەرحاڵ ئینە ڕەخنێوە فرە قورسا کە هەڤاڵ زیلانە جە ئێمەش بکەرۆ. ئا ڕووەی چالاکیەکەو هەڤاڵ زیلانۍ ئەنجامدریا، ڕابەر ئاپۆ پا ژەنای کە دەورشەنە بێنۍ واتش، 'زیلانە سیمبولێوەنە. تاقانێنە' قسێوە چیمنێش کەردێبۍ، 'ئیتر زیلانەی زیڼێم گەرەکەنە'. هەوڵوێسی میلیتانی کە پیمەرە ژیۋاییەکا هەڤاڵ زیلانۍ ئەرەمەرزنۆ و گلېرگەیش بکەرۊوە پېسە ئەركێوە پەیش دیاریۍ کەردیمۍ. ڕابەرایەتی جە زاوڵەیۆ کەوت دلۍ گێڵای ژەنۍ ئازاڎۍ. هەڤاڵ زیلانە جوابدەرەو ئی گێڵایەو ڕابەرایەتینە.

جە پراکتیبیەو ژەنێنە هەڤاڵ زیلانە مانیفیستۆنە. سەرو ئی بنەمایۍ بانگەواز جە هامڕایا ژەن و پیای مکەرو فرە عال جە هەڤاڵ زیلانۍ بیاوانە. جە دلېینەو گرڎ کارە ئایدۆلۆجیەکامانە حەقیقەتوو هامڕا زیلانۍ بیەیش هەن."

'پەدەکە بناغەو ئەرەگیری ئاماڎە مکەرۆ'

جە بەردەوامی قسەکاشەنە هێلین ئومێدە هرووژمەکۍ سەرو هەرێمەکاو پارێزنای مەدیای و ئەرەگیریەکۍ سەرو پانیشتوو کورڎەسانیش هۊرسەنگنۍ و واتش: "بڕۍ ئاژەی ژیۋگەیشا ڕەخسنا کە بۆ بە مەڵامەتوو ئانەی دەوڵەتو تورکی جە سەرەتاو وەهارینە ئۆپراسیۆنێوە ۋەرفراوان بکەرۆ. جە ١٦و گوڵانیوە جەنگ پڕاوە پەی قۆناغێوە تازۍ. جە هەرێمەکاو مەتیناینە قورس بی. جە مېڎانەکاو پەدەکەیۆ هەوڵ مڎا کاریگەری وەش بکەرا. ئەرەکۊشای ستراتیجی جەنگوو بیەی و ئازادییما بریۆ ڕاوە. پاشکۆبیەی ئەرەگیری جیاوازا، بە ماناو دەسسەرەرەگێرتەی یاگێوە مۍ. وچیۆ خاوەنوو مەرامۍ چینەینۍ. تورکیا جە گرڎوو هەرێمەکاو کوردانە و سەرو گرڎیشاوە جە موسڵ و کەرکووکەنە ۋێش مکەرۆ بە سەروەر ئینیشا پېسە هەرێموو میساقی میللی پێناسە مکەرۆ. دژایەتیکەردەی پەکەکەی پېسە ئارگومێنتۍ بەکارمارۆنە. پی جۆرە ئاما دلۍ پانیشتی. جە پانیشتوو کورڎەسانینە گلېرگێوە وڵاتپارێز هەن. ۋەروو ئانەی سەرمەشقێشا نیا، فرە نمەتاوا دەنگ هۊربڕا. جە بڕۍ یاگێنە دەنگشا هۊربڕیەن بەڵام فرە درێژە نمەکێشۆ. سوپاو تورکی گەرەکشا جە پانیشتوو کورڎەسانینە پەی هەمیشەیی مەنۆوە. جە پانیشتوو کورڎەسانینە سوپاو تورکی خاڵەو وشکنایش نیێنەرە. ڕاوەبەری پەدەکەی جیای ئانەی دژوو ئینەی مردۆوە، جیای ئانەی هەڵوێس نیشانە بڎۆ، جە ڕاو ئا کەساوە کە جە لایەنوو میتیوە بەڕێکوستەی کریێنۍ ئەرەیاۋنای هامبەش بەرمکەرۆ و ماچۆ ئێرەکۍ پانیشتی بە دەسوو پەکەکەی کریێنۍ'. ساختەکاری و نامەردی تەنیا چی ئاستەنە متاویۆ بکریۆ.

پەدەکە پېسە موڵکوو ۋێش تەماشەو پانیشتی مکەرۆ. پەدەکە چا هەرێمانە کە گوایە ۋێش سەروەرا دلێشانە بیەن بە غوڵاموو دەوڵەتو تورکی. بیەن بە پارێزەرو دەوڵەتو تورکی. ئانەی کە سوپاو تورکی ئانڎە بە ئاسانی جە مەتینا، ئامێدی، دهۆکەنە جوڵەش هەن، گرڎ جە سەیەو پەدەکەین. گەرنا سوپاو تورکی چنی متاوۆ بێنە ئی مەنتیقاوە؟ پەدەکە بنکەش پەی ئاماڎە مکەرۆ. پەدەکە ئینا پەیوەندیێوە خینانەتکارانەنە چنی هێزێوە کە هرووژم و سەرو بیەو گلېرگەی کوردی مکەرۆ.

'ڕا نمەڎەیمۍ بە ئەرەگیرا'

ڕا بە ئەرەگیرا نمەڎەیمۍ. گرڎوو کورڎەسانی جە دڵمانە یۆن. ڕێبازێوە پا جۊرە هەن ماچۆ 'پەکەکە ڕێکوستەیۍ سەرنیشتین'. نە! پەکەکە ڕێکوستەیۍ دیموکراتیکی گلېرگەو کورڎەسانین. مافوو یۆگێرتەیی پارێزنمۍ. دەوڵەتش گەرەک نیا، ئەرەکۊشای سەرو بنەماو خۆسەری بەرۆ ڕاوە. هەر چوارپارچەو کورڎەسانی دلۍ یۊگێرتەیینە موینۆ.

جە دژوو ئا گەمەیە کە ۋەرا ۋەرو پانیشتوو کورڎەسانینە بریۆ ڕاوە، پەنەوازا گلێرگەو دیموکراتیکی هەڵوێس هۊرگێرۆ. پەنەوازا گەلوو کوردی جە پانیشتوو کورڎەسانی هەڵوێسی ڕادیکاڵ جە ۋەرا ۋەروو پەدەکەی و سوپاو تورکینە نیشانە بڎا."

هۊرسەنگنایەکۍ هێلین ئومێدۍ سەرو هەڵوێسە فاڕیا سیاسیەکا ئەردۆغانی سەبارەت بە سوریای پی جۊرەنۍ:

"دەوڵەتو تورکی گەرەکشا چنی ڕژێموو سوریای پەیوەندی بنیۊرە. گەلاو هەرێمەکەی جە ۋەرنیشتەنە پېوەرە گەرەکشانە سیستەمێوە دیموکراتیک ئەرەمەرزنا. کار پەی ئینەی مکریۆ. ئەردۆغان ئانەی موینۆ ئی هەوڵدایە هەنگام بە هەنگام ئەنجام بەدەس مارۆ، حەرپاسە ئەسەدیچ ئینەی جە ۋەروو چەما مگێرۆ. ئاماینە ئاراو ستاتۆیۍ جە سەرنیشتوو ۋەرکۊتوو سوریای، دیموکراتیک بیەو سوریای و ئشناسای و بیەو کوردا جە سوریانە ئەردۆغانی وزۆنە دلۍ گێچەڵێوە. ئی پارادایمە پېسە ئاڵنگاریێوە مبۆ پەی تورکیای. مزانمۍ ئەردۆغان پی گێچەڵۍ دەور بە ڕوسیای مڎۆوە و ڕاو جا مگێرۊنە ۋەر.

جە ئیساتێنە ئەسەد جە سەیەو سیستەموو سەرنیشتوو ۋەرکۊتوو سوریاینە ۋێش ڕاگێرتەن. ڕژێموو ئەردۆغان-باخچەلی چینەی متەرسۆ. نەریتوو مڎرامانوو ۋەرکۊتوو دلېڕاسەی پەی گەلاو هەرێمەکەی بەردەواما. ڕا بە ئەرەگیری تورکی نمەڎا. ئینەیچ پڕانۆ پەی پانیشتوو کورڎەسانی. تورکیا ئینا دلۍ چڵکاوەو ۋەرکەوتوو دلېڕاسەینە. دیار نیا ئی مژارە بەچ ئەنجامێوە میاوۆ. جە ڕاو فرۆکەی جەنگیوە هەوڵمڎۊ جە ڕوو سەروازییوە سەروەر بۆ و کاریگەری سەرو سەرکردە و گەلا هەرێمەکەی بنیۊرە. بەڵام گەریلا گورزەش مڎۆ ۋنە. بەڵام ئڼە پیسێنۍ تەنانەت جە وەڵاکریایۊکاشانە باسو حیچ کام چانیشاشا نەکەردەن. سودانی حیچش پەوەیوەس بە ئەرگیرکەردەو سەرو عێراقی نەواتەن. بەڵام حیچ نەبۆ بەشار ئەسەد ماچۆ 'شمە یەکەم کەسێندۍ کە مشۆم جە سنورەکامانە بەرۍ بشدۍ' ئینە هەڵوێسېوە ماناڎارا."