گەریلاکێ ئازاڎیی کوردسانی ٢٢ۍ مانگەو ئارگای ساعەت ١٧:١٠ دەیەقۍ جە هەرێمەکا پارێزنای مێدیاینە، جە کەشوو ئامێدی هەڵمەتۍ ئاخیزگێڵنانێشا سەروو نامێ گەشمەرڎە هەڵمەت دێرەلۆکی بەردە راوەو گوورزۍ قۆرسەشا وەنەو ئەرتەشوو ئەرەگیرو تورکیەی شانا.
ناوەنڎوو یاونەری و هێزەکاو پارێزنای گەلی(هە پ گ) ئەرەیاوناش چی هەڵمەتێنە فرەتەر جە٦٠ سەروازا ئەرتەشوو ئەرەگێروو ترکیەی بە سزا وێشا یاوێنی، هەر پاسە زیاتەر جە ٢٠ جەنازا سەروازا ئەرتەشوو ئەرەگێروو ترکیەی کەوتێنی دەسوو گەریلای و فرەیێچ جە چەکوو کەرەسەکا جەنگی جە لاو گەریلایوە دەسشا گیریان سەرەرە.
بە دەس پەنەکەردەی ساڵەی تازێ، ئینە دووەمین جارا کە گەریلا گوورزەی قوورسە جە ئەرتەشوو ئەرەگیروو ترکیەی شانا. هەر پاسە کە رێزدار دۆران کاڵکان جە بەرنامێوە تەلەفزیۆنی مێدیاخەبەریەنە ئیشارەش پەنەدا ئێساڵ گەریلا بە ئامادەکاریۍ فرەتەر دژوو ئەرەگێرەکا کوردسانی مدرانۆ و ئەشۆ گرد کەسۍ بە تایبەت نیشتمان پەروەرەکێ و ئازادیوازەکێ کارو و خەباتشا بە پاو ئانەیە رێکوزانێ.
دەوڵەتوو ئەرەگێروو ترکیەی کە پەنەش پاسەبێ بە راو چەکداری تاوۆنێ قەزیێ کوردی سەڕۆوە و پەکەکەی جە بەین بەرۆنە، پی هجووما تووشوو سەروەنەشێویای بیەن. پەوکی دماو هەڵمەتەکێ گەریلای و شکەستوو ئەرتەشەکەیش ئەردۆغان، بە پەلە پڕووسکێ کابینەکەش گلێر کەردەو و ئەرەنیشتەیۍ تایبەتشا بەست تاکوو ئاژەکەی شی کەرانێوە. هەر پاسە فەرماندە باڵاکێ ئەرتەشوو ئەرەگێروو ترکیەی پەی ئانەی جە نزیکەو چەمداری جەنگەکەیکەرانێ، پەلەپەل روەشا کەردە شەمزینان.
ئی هەڵمەتێ گەریلای دەوڵەتە کارتۆنیەکەو ئەردۆغانیش جارێو تەر بە درۆ وستەو کە واچێ ئێمە گەریلاما تەفرووتوونا کەردەن و دمایما بە پەکەکەی ئاردەن، بە پێچەوانەوەوە ئانەی کە تەفرووتوونا بیەن ئەرتەشوو ئەرەگێروو ترکیەی و دەڵەتەکەو ئاکەپە- مەهەپەین.
گەریلا تاوانش بە تاکتیکی تازە دووەم ئەرتەشوو پەڕ چەکوو ناتۆی شکەست بڎۊنە و جارێو تەر سەلەمناش کە ئەگەر ناتۆ و زل هێزە جیهانیەکێ و جاشە کوردەکێ پەشتگیری ئەردۆغانی و دەوڵەتەکەیش نەکەرانێ، دەوڵەتی ئەرەگێروو ترکیەی ویسوو و چوار ساعەتێ زیاتەر جە وەرانوەروو گەریلایوە تواناو مدرامانیش نیەنە.
ئینە دەس پەنە کەرەدەی سەردەمۍ تازەین کە جارێو تەر گەریلا هامسەنگیەکێش بە قازانجوو گەلوو کوردی و ئازاڎیوازەکا فاڕان، پەوکی ئا سیاسەتە کە پەنەش پاسەن بە گۆشەگیر کەردەی رابەر ئاپۆی جە ئێمراڵی و پاکتاو کەردەی گەریلای تاوۆنێ قەزیەو کوردی چارەسەر کەرۆنێ مایەپووچ بیەن.
هەر پاسە مزانمێ ئارۆ سەروو نامێ هەڵمەتەو ئازاڎیی جەستەیی رابەر ئاپۆی و چارەسەری سیاسی قەزیەو کوردی دەنگوو رابەر ئاپۆی پارادایمەکەیش فرەتەر یاوان گۆشوو جەهانی و پەشتگیریە فەراوانش گلێر کەردەنۆ.
ئارۆ فرەتەروو کارناسەکێ هەنێ سەروو ئا باوەڕەیەوە کە هجوومە فراوانەکێ دەوڵەتوو ئەرەگێروو تورکیەی پەی سەرنیشت و وەرکەتوو سووریەی و تێکدای چێرخانە ئابووریەکێ و سازمانە گلێرگەیەکێ وێراوەبەری ئا هەرێما و کووشتەی زارۆڵا و خەڵکوو مەدەنی نیشاندەروو بێ دەسەڵاتی و دەسەپاچەیی ترکیەی جە وەرانوەروو ئا شکسانە کە واردێنێش. هەر پاسە بە بن بەس یاوای سیاسەتوو دەوڵەتوو ئەرەگێرو ترکیەین.
گەلوو کوردی و تەڤگەروو ئازاڎیی نیشانەش دان تاکە ڕا پەی چارەسەری قەزیەو کوردی و بەر وستەی وەرکەوتو میامینی چی گێژاوێ بەرجستەکەردەی پرۆژەو نەتەوەی دیمۆکراتیکین. هەر پاسە کە وینمێ زلهێزە جیهانیەکێ چەوپەروو بێچارەیینە، خەریکێنێ هجووم کەرانێ سەروو یۆترینی و خەڵکی مەدەنی کەرا قوربانی سیاسەتە چەم جنۆکەکاشا.
جەنگو غەززەی و هجوومەکێ سەروو وەرنیشتوو کوردسانی، هەر پاسە هجوومەکێ ئیدمایەو ئێرانی سەروو هەولێری ئاژەو هەرێمەکەش فرەتەر تێکدان. نەبیەی سیاسەتۍ کوردسانی کارێش کەردەن کوردسان و گەلوو کوردی بۆنێ بە سووتماکوو ئی جەنگەیە.
دەسەڵاتدارەکێ هەرێمیچ جە ماوەو سی ساڵا دەسەڵاتداریشانە کوردسانشا کەردەن بە یاگێ حەشار دای داموو دەزگا ئێستخباراتیەکا و کەردەنشا بە مۆڵگەو میتی و ئێتلاعاتی و مووسادی و سی ئای ئەی و ... هتد. ئینە سیاسەتۍ غەڵەتا کە قازانجوو گەلوو کوردیش چەنە نیا و کاریەش کەردەن تاکوو قەوارەو هەرێموو پانیشتوو کوردسانی پەی سەرکووت کەردەی شۆڕشوو پارچەکاو تەروو کوردسانی بەکار بۍ.
دەوڵەتەکێ ئێرانی و ترکیە کە بە چڕی هجوومشا ئاردەن سەروو کوردسانی هەر یۆ هەنێ دلێ قەیرانۍ گەورەی سیاسی و ئابووریەنە و جە دەسوو نەبیەی ئازاڎیی و دیمۆکراسیەنە ناڵا ناڵانێ. ئێنەیچ بیەن بە مەڵامەتوو ئانەی قەیرانەکێشا رووانەو بەرو ویشا کەرانێ. پا جۆرە کە کۆنگرەو نەتەوەیی کوردسانی جاڕش دان پەنەوازەن گەلوو کوردی وشیار بۆنێ و چینەی زیاتەر دەرفەت بە دەسەڵاداراو حکوومەتوو هەرێمی نەڎۆنە کە ئی دەسکەوتا پەی قازانجوو وێشا بەکار بارانێ و بانێ بە داردەسوو دەوڵەتە ئەقلیمیەکا، بە تایبەت ئێران و ترکیە. هەرچنە ئاژێوە ترسناکا بەڵام، دەرفەتی عالیچ رەخسنۆ کە گەلوو کوردی و
ئازاڎیوازەکێ وێشا رێک وزانێو و دژوو فاشیزمی مدرانێوە و هەنگامۍ روەو دیمۆکراتیک کەردەی هەرێمەکا هۆرگێرانێ.
