بە پاو یاۋنەریەکەو ناوەنڎو یاۋنەری و چاپەمەنی هەپەگەی ١٥ و حوزەیرانی سەعاڎ ٠٤:٠٠ گەریلاکېما جە هەرێمو کۆلیتی خواکورکینە سوپاو تورکی ئەرەگیریشا کەرڎەن ئامانج. چا جەنگەنە گەریلاکېما لوۋۍ سەرو جەنازەو ١٨ ئەرەگیرا و ئانەیچ دەسنیشان کریان کە یۊ چا سەروازا کە کوشیان  فەرمانڎە بیەن.

هەپەگە ئانەیچش وست ڕووە کە گەریلېوەشا بە ناسنامۍ سەعیدی کە دماو چالاکیەکەی جە ئاکامو بۊمبۋاران و سوپاو تورکینە بە سەختی زامڎاربیەبۍ، دماتەر گەشمەرڎە بیەن و جە وەختو کیشیایۊیچەنە دوۋۍ گەریلۍ بە نامەکا ئامارای و ئازاڎی گەشمەرڎۍ بیۍ.

هەپەگە ئەرەیاۋناش کە دماتەر زانیاری ورد سەرو شناسنامەو گەریلا گەشمەرڎەکاوە پۍ رای گرڎی ۋەڵا کەراوە.

یاۋنەریەکەو هەپەگەی سەبارەڎ بە چالاکی و هجومەکاوە پی جۊرە زانیاریش دان:

"هجومەکۍ سوپاو تورکی ئەرەگیری جە دژوو رابەر ئاپۆی، گەلەکەیما و گەریلاکا ئازاڎیی کورڎسانی بۍ مرڎای سەرەمڕە وەردەوامیشا هەن. ئەشکەنجە و هجومەکۍ کە بەشێۋېوە گۆشەگیری رەها جە دژوو رابەر ئاپۆی پەیڕەو کریا، نەک هەر توڕەیی گەلوو کورڎی ۋڵاڎپارێزی و دۊسەکاش زیاتەر کەرڎەن، جە هەمان وەختەنە قینەو ئێمەیچ وەران ۋەر بە دوژمنی کۊکوژکاری زیاتەر کەرۊ. تیمە گېڵېکۍ گەریلای جە خواکورک بە شێۋېوە هاموەخت چالاکیېوە هەماهەنگشا ئەنجامدا و گورزۍ قورسەشا ئەو ئەرەگیرا ئەشا، ١٨ ئەرەگیرۍ سزادریۍ و بە شێۋېوە کاریگەر وەرپەرچو دوژمنی دریاوە. چا چالاکیانە هامڕېما سەعید، ئامارا و ئازاڎ کە بە گیانی فیدایی جە وەران ۋەرو دوژمنینە حەتا دما هەناسە بە قارەمانی جەنگشا کەرڎ، گەشمەرڎۍ بیۍ. زانیاری وەرفراوان سەرو شناسنامەو هامڕا گەشمەرڎەکاما دماتەر پۍ گەلە ۋڵاڎپارێزەکەیما و رای گرڎی ئاشکرا کەرمۍ.

زانیاری سەرو چالاکییەکا و هجومەکا سوپاو تورکی ئەرەگیری پی جۊرەنە:

هەرێمو خواکورکی؛

 مېڎانو کۆلیتېنە تیمە گېڵېکێما سەروازە ئەرەگیرەکېشا وستۍ چېرو چەمڎاریوە. جە ١٥و حوزەیرانینە سەعاڎ ٠٤:٠٠ ئەرەگیرەکۍ وەختۍ ڕوەو کەشو گەشمەرڎە شاهانی لوۋېنۍ، هێزەکېما کەمینشا پۍ نیېرەو دېشا ۋنە. دماو جەنگېوە ١٥ دەقەیی تیمە گېڵېکێما لۋۍ سەرو جەنازەو ١٨ ئەرەگیرا و هێزەکېما ۋینانشا کە یۊ چا سەروازا کە سزادریېنۍ فەرمانڎە و پلەدار بیەن. سوپاو تورکی ئەرەگیری وەرو ئانەی هەستش پانەی کەرڎەبۍ کە سەروازەکېش مېڎانەکەنە دلېنەمشا، بە کاتیوشا، تانک و فرۊکەی جەنگی مېڎانەکەش بۊمبۋاران کەرڎ. چا بۊمبۋارانەنە هامڕاما سەعید بە سەختی زامڎاربی و دماتەر گەشمەرڎەبی. وەختو کیشیایۊیما مېڎانەکەنە  حەریۊ جە هامڕایاما ئامارا و ئازاڎ کریېنە ئامانجو هجومو دوژمنی و گەشمەرڎۍ بیۍ.

چا چالاکیەنە بە شێۋېوە هەماهەنگ ئەرەگیرەکۍ جە کەشەکا گەشمەرڎە شاهانی، کەشو گەشمەرڎە ئاخینی بە چەکی قورس کریېنە ئامانج و بە شێۋېوە راستەوخۆ گورزەشا ۋنە شنیا. کوشیا و زامڎارەکۍ دوژمنی چا رۊشن نەکریېنۍ. سوپاو تورکی ئەرەگیری ٤ جارۍ بە هەلیکۊپتەر و ترۊمبېلی زرێپۊش کوشیا و زامڎارەکېش فاڕېوە.

ئا چالاکیەی چنەشەنە هامڕېما سەعید، ئامارا و ئازاڎ بە شێۋېوە گیانبازانە جەنگشا کەرڎ و ١٨ ئەرەگیرېشا سزادۍ جە دژوو گۆشەگیری قورس کریاو سەرو رابەر ئاپۆی ئەنجامدریا.

هەرێمو گەشمەرڎە دەلیلی ۋەرنیشتوو زاپی

-١٥و حوزەیرانی سەعاڎ ١١:٣٠ پۍ ١٢:٣٠ دەیەقا ئەرەگیرەکۍ جە مېڎانو مدرامانو کەشو ئێف ئێمی ٣ جارۍ بە چەکی قورس کریۍ ئامانج و گورزۍ قورسەشا ۋنە شنیا.

هجومەکۍ سوپاو تورکی ئەرەگیری بە بۆمبی قەڎەغەکریا:

-١٥و ١٦و حوزەیرانی سەنگەرەکېما جە هەرێمو مدرامانو سیدای زاپی ٢ جارۍ بە بۆمبی قەڎەغەکریا بۊمبۋاران کریۍ.

هجومەکۍ سوپاو تورکی ئەرەگیری:

 ١٥ و ١٦و حوزەیرانینە هەرێمەکۍ کەشو چارچەلی، سەری مەتینای و گۆلکای مەتینای ٤ جارۍ، دەشتەو کافیای، دۆڵا شێرانۍ و کانی سارک جە گارەیچ ٧ جارۍ، بە گرڎی ١١ جارۍ بۊمبۋاران کریۍ.

-١٥و حوزەیرانی هەرێمەکۍ سیدای زاپی، کەشو جودی هەرێمو گەشمەرڎە دەلیلی ۋەرنیشتوو زاپی، هەرێمەکۍ مدارامانو کەشو ئامێدی و کەشو وەهاری، هەرێمەکۍ مدرامانو کەشو هەکاریی مەتینای و کەشو کۆلیتی، کەشو گەشمەرڎە کامورانی، کەشو گەشمەرڎە حەقی و هەرێمو ئاوەو لۆلانی خواکورکی ٢٢٧ جارۍ بە کاتیوشا، تانک و چەکی قورس بۊمبۋاران کریۍ.

-سوپاو تورکی ئەرەگیری جە ١٥ و ١٦و حوزەیرانینە هجومش کەرڎ سەرو سەنگەرەکاما جە هەرێمو مدرامانو سیداو زاپی و بە حەفارە حۊڵشدا سەنگەرەکاما وڕنۊ".

هـ . ش