هەپەگە ئەرەیاۋناش سوپاو تورکی بە تەقەمەنی بەهێز، گازی کیمیاویی، درۆن، حەفارە و چەکی قورس هرووژم مکەرۆ سەرو مەڕەکا گەریلای و هەوڵو وڕنایشا مڎۆ. پی مەڵامەتۆ هەپەگە بانگەوازش جە گرڎ لایۍ کەرڎ کە دژو ئی هرووژما مرداوە.
مېیانو ئەرەیاۋنای و چاپەمەنی هەپەگەی پېوەس بە هرووژمە بەردەوامەکا سوپاو تورکی پەی سەرو مەڕەکا و مېڎانەکا گەریلای ئەرەیاۋنێوەش وەڵا کەردۆ و ئاماژەش پانەی دا؛ سوپاو تورکی بە تەقەمەنی کاریگەر، گازی کیمیاویی، درۆن، حەفارە و چەکی قورس هرووژمو سەرو مەڕەکا گەریلای مکەرۆ و هەوڵو وڕنایشا مڎا. هەپەگە بانگەوازش جە لایەنگرا مافەکا مرۆڤی و گلېرگەو ئاشتی و دیموکراتیکی کەرڎ جە دژو ئی هەرمانە قیزەونۍ و دژە مرۆڤایەتییا سوپاو تورکی هەڵوێس هۊرگێرا.
جە ئەرەیاۋناکەو مېیانو ئەرەیاۋنای و چاپەمەنی هەپەگە (هەپەگە-نەڕەچە)ینە ئامان: "پېسە ئانەی لاو رای گرڎینیۆ ئاشكران، هێزەکېما بە پرۆسەو ئایێربەسو ١و ئاداریوە پڕێوە پەی پێگێوە جیاوازی. بەڵام جە هەرێمەکاو زاپ و مەتیناینە هێزەکۍ سوپاو تورکی شۊنەو فرسەت و هەلێرە گێڵا، مردنای چالاکی هێزەکاما پېسە فرسەتێوە پەی ۋێشا موینا، پۊکەی بە ئیسراحەت جماوە و هەوڵمڎا مېڎانەکا گەریلای تەوقە بڎا. پی جۊرە بە قیزەونتەرین شێوە پێگەو ئایێربەسی پەی ۋێشا بەکار مارا و گەرەکشا قارەمانا مەڕەکاما دلېنەبەرۆ. ئی هرووژمۍ کە ڕوانە جە ئەرەیاۋناکاماوە زانیاریشا جە بارۆ مڎەیمۍ، نیشانەش مڎۆ هێزەکۍ سوپاو تورکی بە تەقەمەنی بەهێز، گازی کیمیاویی، درۆنی بەبۆمچنیا، حەفارەی زەمین وڵکەر، حەفارەی ئاسایی هەوڵمڎۆ مەڕەکاما وڕنۆ و بە چەکی قورس هرووژم مکەرۆ سەرو مەڕەکاما. چنی بڕیارەکا کۆنگرەو ١٢ـەمینو پەکەکەیچ سوپاو تورکی بە تایبەت جە دەگاو سێگرێ و کەشو ئامێدیی نزیکو ناوچەو ئامێدیی و دەگاو شێلازێ و مەتینای جە پانیشتوو کوردەسانی، سەرو مېڎانەکاما چی چن ڕووەو دماینە گازی کیمیاویی بەکارمارۊنە. سوپاو تورکی ئامانجشا بە تایبەت چا یەرە کەمپەنە هێزەکاو گەریلای بە گازی کیمیاویی دلېنەبەرۆ.
ئاشکران مەیلێوە کاسەلێسا جەنگی چا پاسە جمۊوە گەرەکشا شکس بە بڕیارەکا کۆنگرەو ١٢ـەمینو تەڤگەریما و داواکا ڕابەر ئاپۆی بارۊنە. ئی هەوڵدایەو ئاوەزیەتو کۆمکووژیی لایەنگر بە جەنگی کە هەوڵمڎۆ بە ئیسفاڎە هۊرگێرتەی جە هەلومەرجو ئاېێربەسی چا یەرە یاگەنە گەریلای جە بەین بەرۆ، نزیکایەتیێوە نامەردانەن. هەم گەرەکشا ئی هەرمانێشە بە چەکی قەڎەغەکریا جە ئاستی مېیاننەتەوەیینە ئەنجام بڎۆ، هەمیچ پرۆسەو ئاشتی شێونۆ. پی جۊرە جەخت جە هرووژمەکاس مکەرۊوە. با پاڵنەرا ئی هرووژمەیە عال ئانەی بزانا؛ ئەر ئی هرووژمە قیزەوناشا نەمردنا، ئانە هێزەکاو گەریلایچ مافو ۋێشا بەکاربەرا پەی فاڕای پەی پێگەو کرداری و بەشێوەی جیاواز جوابو هرووژمەکا مڎاوە. پەی ئانەی ئاژێوە پی جۊرەیچ ڕووە نەڎۆ، مشۊم ئی ئاوەزیەتە کاسەلێسیەو جەنگی کە شۊنەو قارەمانیەتی هەرزان، فرسەت، نامەردی و هرووژمی قێزونیۆن مردۆنە. ئاشکران ئەر پێگەو ئایێربەسی نەبیۍ نەتاوێنۍ پی جۊرە تەوقە ئەنجام بڎا. ڕۊشنا گەرەکشا ئیسفاڎە چا ئاژەیە هۊرگێرۆ و ئەنجام بەدەس بارۆ. هەر کەس و لایەنێوە کە لایەنگرو ئاشتی و چارەسەرییا، داواتا ۋنە مکەرمۍ چی مژارەنە بە دەسوەڵێوستەی هۊربێزدۍ. هەرپاسە داوا جە گرڎو ڕێکوزیاکا لایەنگرا مافو مرۆڤی مکەرمۍ جە دژو بەکارئارڎەی چەکی قەڎەغەکریای مرداوە، داوا جە گرڎ لایەنگرێوە ئاشتی و گلېرگەی دیموکراسی مکەرمۍ بانۍ بە وەربەس جە ۋەرا ۋەرو دۊڵەتو تورکینە کە جە مەتینا و ۋەرنیشتوو زاپی بە شێوێوە دژە مرۆڤانە چەکی کیمیاویی بەکارمارۆ."
سوپاو تورکی هرووژم مکەرۆ و گەریلایچ ۋێش پارێزنۆ
هەپەگە-نەڕەچە پېوەس بە هرووژمە بەردەوامەکا سوپاو تورکی و جوابدایۆ هرووژمەکا ئی زانیاریێشە وەڵاکەردێوە:
"هرووژمەکۍ سوپاو تورکی؛
٩و حوزەیرانی جە هەرێمو گەشمەرڎە دەلیلی جە ۋەرنیشتوو زاپی، مەڕەکېما جە مېڎانوو مڎرامانو کەشو ئامێدی ٢ جارۍ بە تەقەمەنی قەڎەەغەکریا بۊمبواران کریۍ.
١٠و حوزەیرانی جە هەرێمو گەشمەرڎە دەلیلی جە ۋەرنیشتوو زاپی، مەڕەکېما جە مېڎانوو مڎرامانو کەشو ئامێدی ٩ جار بە گازی کیمیاەیی بۊمبواران کریۍ.
٥، ٦، ٩، ١٠ و ١١و حوزەیرانی جە هەرێمو گەشمەرڎە دەلیلی جە ۋەرنیشتوو زاپی، مەڕەکېما جە مېڎانوو مڎرامانو کەشو ئامێدی ١١ جارۍ بە درۆنی بەبۊمچنیا و بەکارئاوردەی گازی کیمیاویی بۊمبواران کریێنۍ.
٧ و ٨و حوزەیرانی جە هەرێمو مەتینای، مەڕەکېما جە مېڎانوو مڎرامانو شێلازێ ٥ جارۍ بە درۆنی بەبۆمچنیا و بەکارئاوردەی گازی کیمیاویی بۊمبواران کریێنۍ.
١٠و حوزەیرانی مېڎانو دەشتەو کافیەیی جە هەرێمو گارەینە جارێوە بە فڕۆکەی جەنگی بۊمبواران کریا.
٥، ٦، ٩، ١٠، ١١ و ١٢و حوزەیرانی سوپاو تورکی ٢٥ جار هەوڵشدان بە حەفارە و حەفارەی زەمین وڵکەر مەڕەکاما جە مېڎانوو مڎرامانوو کەشو ئامێدینە وڕنانە.
جە ما بەینو ٥-١١و حوزەیرانینە جە هەرێمو گارەی مېڎانەکۍ سپیندارێ، کانی سارکێ، زێڤکێ، دەرگای ورچ، دەشتەو کافیەی، دێڕەشێ، کەشو زەنگلی، جە هەرێمو مەتیناینە مېڎانەکۍ مڎرامانو سەری مەتینای، بێشیلی، جە هەرێمو گەشمەرڎە دەلیلی جە ۋەرنیشتوو زاپی مېڎانەکۍ مڎرامانو کەشو وەهاری و کەشو ئامێدی بە چەکی قورس، تۆپۍ و هاوەنۍ بۊمبواران کریێنۍ.
جوابدایۆ هێزەکاما؛
٦و حوزەیرانی سەعات ١٣:٤٥ دەیەقۍ جە هەرێمو گەشمەرڎە دەلیلی جە ۋەرنیشتوو زاپی، هێزەکاو یەژا ستاریما بە تەکنیک گورزەشا جە ئامانجێوە شانا کە جە مېڎانوو مڎرامانوو کەشو ئامێدینە جە پێگەو هرووژمکەردەینە بۍ، وە کامێرێوە دلېنەبریا.
٩و حوزەیرانی سەعات ١٣:٤٦دەیەقۍ جە هەرێمو گەشمەرڎە دەلیلی جە ۋەرنیشتوو زاپی بە تەکتیکو سابۆتاژی گورزە جە ئەرەگیرا شنیا کە هەوڵ دێنۍ بە حەفارەی زەمین وڵکەر مەڕەکاما جە مېڎانوو مڎرامانو ئامێدینە وڵە بکەرا و وڕناشا.
١٠و حوزەیرانی سەعات ١٢:٠٠ جە هەرێمو مەتیناینە بە تەکنیک گورزە جە ئامانجێوە شنیا کە جە مېڎانوو مڎرامانوو سەری مەتیناینە پێگەو هرووژمکەردەینە بۍ، ڕادارێوە دلېنەبریا."
