بەنداوو تشرینی کە سەرچەمەو بەرهەمئاوردەو کارەبێن پەی هەرێمەکەی، ماوەو چن حەفتێوەن جە لایەنو دۆڵەتو تورکی ئەرەگیریوە هرووژمێوە قورسش سەرا و ئاستو بەرهەم ئاوردەی کارەبێش فرە وەستەنەرە.
دۆڵەتو ئەرەگیرو تورکی چنی چەتەکاش جە ٢٨و نۆۋەمبەرو ٢٠٢٤یوە هرووژمەکێشا پەی سەرو ناوچەکەی دەس پنەکەردێنۍ. هرووژمەکۍ پەی سەرو بەنداوو تشرینی کە بە چێرخانی مەدەنی هەژمار مکریۆ و سەرچەمەو سەرەکی کارەباو هەرێمەکەین، راسەوخۆ تاوانەو جەنگینە.
هەرچنە ئینە یووەمجار نییا کە دۆڵەتو ئەرەگیرو تورکی هرووژم مکەرۆ سەرو چێرخانە مەدەنییەکا هەرێمەکەی، بەڵکم عەیامێوەن وێسگەکا کارەبۍ، خەسەخانەی، ۋەننگە، کارگە، کێڵگە نەوتییەکا و وێسگەکاو ئاوۍ جە سەرنیشتوو ۋەرکۊتوو سوریاینە مکەرۆ ئامانج و بۆمبوارانش مکەرۆ. ئی هرووژمۍ ڕاسەوخۆ کاریگەری سەرو ملیۆنان کەسا منیۆرە.
بەنداوو تشرینی کە گنۆنە ناوچەو منبجی، ١١٥ کیلۆمەترۍ جە شارو حەڵەبیوە دوورا و ٨٠ کیلۆمەترۍ جە سنوورو تورکیایۆ دوورا. بەنداوو تشرینی جە ساڵۊو ١٩٩١ ی وەشکریان و دماو ٨ ساڵا واتە جە ساڵۊو ١٩٩٩ ی بەدماوە دەسش بە بەرهەمئاوردەی کارەبۍ کەردەن و خزمەتگوزاری بە هەرێمەکەی بەخشۆنە.
یاگۍ ئاماژەیەنە وەڵۍ جەنگو سوریاینە، بەنداوو تشرینی تواناو دابینکەردەی کارەباو گرڎو سوریایش بۍ. بەڵام جە ما بەینو ساڵەکا ٢٠١٤-٢٠١٦ کە منبج جە لایەنو چەتەکاو داعشیوە ئەرەگیر کریا، بەنداوو تشرینی گورزێوە قورسەش ۋەرکۊت. جە سەردەمو ئۆپەراسیۆنو ڕزگارکەردەی منبجینە، چەتەکۍ داعشی بەدەیان کەرەتۍ هەوڵو وڕنای بەنداوو تشرینیشا دان.
بەڵام جەنگەوانا یەپەژەی و یەپەگەی و قەسەدەی پەی ئانەی زەرەر بە بەنداوەکەی نەیاوۆ، فرە بەوردی ئۆپەراسیۆنەکێشا بەردۍ ڕاوە. جە مانگۊو کانوونو یووەمو ٢٠١٥ ینە بەنداوو تشرینی جە لایەنو جەنگەوانا یەپەژە، قەسەدەی و یەپەگەیۆ ئازاڎ کریا. چا کاتە بەدماوە بەنداوو تشرینی کە ساڵانە کارەبا پەی گەلاو هەرێمەکەی دابین مکەرۆ، ئیجارە کۊتەن ۋەرو هەڕەشا دۆڵەتو ئەرەگیرو تورکی.
بەنداوەکە سەرچەمەو سەرەکی کارەباو هەرێمەکەینە، ئیساتۍ بە مەڵامەتو هرووژمەکاوە تەنیا کارەبا جە ڕووبارو فوراتیوە بەرهەم مۍ. بە مانێوەتەر بەنداوەکە ئاستو بەرهەم ئاوردەی خزمەتگوزاریش فرە وەستەنەرە.
هەرپاسە ئا کارەبۍ ئیساتۍ جە ڕووبارو فوراتیوە بەرهەم مۍ خزمەتگوزاری مڎۆ بە ناوچەو سیرینی، شارو کۆبانێ و ناوچەو ئەبو قەل قەلی جە منبج و ناوچەو جرنێ جە تەبقا.
