ڕاوەبەرەو فیدراسیۆنوو جەمەکاو پەشتیوانی یاسایی چنی بنەیانەو زینڎانیا و زینڎانیا مێد-TUHAD-FED ی سەباحەت بیچەرە باسش جە تەرسەو دەسەڵاتداری جە ئاشتی کەرد و واتش: "گرڎوو جەهانی هێزی ئاشتیخوازانەو بەڕێز عەبدوڵا ئۆجالانی موینۆ."
زینڎانیا سیاسی جە٢٧و تشرینی دووەمیوە بە داواو "ئازاڎیی پەی عەبدوڵا ئۆجالانی، چارەسەری پەی پرسوو کوردی" جە مانگێرتەی واردەی بە نۆبەتینە بێنۍ. دماتەر هەر جە درێژەپنەدای چالاکیەکاشانە، چالاکی ۋێشا فاڕا پەی بایکۆتکەردەی دادگاکا و قەرارشا دا هیچ چەمپنەکەوتەیۍ چنی بنەیانەکاشا ئەنجام نەڎا. دماتەر جە تەرەفوو کەسوکاروو زینڎانیاوە جە چنڎین شۊنێنە پەی پەشتیوانی جە زینڎانیا چالاکی "دەنگ بڎە بە ئازاڎیی"شا دەسپنەکەردەن و گرڎ ڕووۍ دووەشەممانی بەیاننامە مڎا.
'گۆشەگیری بۆ بە مەڵامەتوو قوڵبیەیۆ قەیرانەکا'
ڕاوەبەرەو TUHAD-FED سەباحەت بیچەرە باسش چانەی کەرد ئارۊنە گۆشەگیری کاریگەریش سەروو گرڎ کەسێوە نیانەرە و واتش: "چەمپنەکەوتەی چنی بەڕێز ئۆجالانی مەکریۆ، ئینەیچ بیەن بە مەڵامەتوو ئانەی قەیرانە هەنووکەییەکۍ قوڵتەرۍ باوە. ڕا جە خەباتێوە ئابووری، ئیکۆلۆژی، سیاسی و چاندی گێرۆ. سروشتما کاول مکەرۆ، گەل مەحکوم بە قەیرانۍ کریان. پۊکاتی تا گۆشەگیری دمایش نۍ ئی قەیرانۍ بەردەوامە بۆ. زینڎانیا سیاسی چنڎین مانگێن پی داواکارییۆ چنڎین چالاکیێشا کەردێنۍ . پەی پەشتیوانی جە داواو زینڎانیا، پېسە فیدراسیۆنیما چنی بنەیانەکاما قەرار دریا گرڎ ڕووانۍ دووەشەممەی بەیاننامە بڎەیمۍ و ڕووانوو یەرە شەممانیچ ۋەروودەم و وەزارەتوو دادینە گلېرێبیمێوە."
'گلێرگەی مەحکوم بە بێ هیوایی مکەرۆ'
سەباحەت بیچەرە ئاماژەش پانەی کەرد فاشیزم و نەژاڎپەرسی زیاڎش کەردەن، سیاسەتوو جەنگی تایبەتی جە گرڎ شارێوە کوردسانینە پێکمۍ و واتش: "دەسەڵات نەتاوانش بە گێرتەی و کۆمکوشی گەلوو کوردی دلېنەبەرۆ، پۊکەی حۆڵمڎۆ بە ماددەی هۆشبەر و ماڕای دەروونی گەنجا جە ڕۍ لا بڎۆ. بە گێچەڵە و دەسدرێژی ژەنی و گەنجاش کەردێنۍ ئامانج و زاوڵێماشا جە جەوهەروو ۋێشا دوورۍ وستێنۍ. پۊکەی ڕووبەڕوو هەر حۊڵێوە پی جۊرەیە بیمێوە. جا پۊکەی ۋەروو ئی مەڵامەتا پێویسا گۆشەگیری لابریۆ. گرڎوو جیهانی ویناش کە فکر و ڕامانەکۍ بەڕێز ئۆجالانی چێش چی وڵاتەنە فاڕۆ. گرڎ کەسێ هێزی ئاشتیوازانەو ئاڎیش دی. پۊکەی دەسەڵات جە ئاشتی تەرسۆ و پەی ئاستەنگکەردەی یۆبیەی و هیواو گەلی گرڎ چێوۍ مکەرۆ. پۊکەی پێویسا جە ۋەرا ۋەروو گۆشەگیرینە مردمێوە، جە دژوو جەنگی تایبەتی و قەیرانەکا ۋێما بەڕێکوستەی بکەرمۍ. جە گرڎ مېڎانەکا ژیۋاینە بیمۍ بە دەنگوو زینڎانیا. داوا جە گرڎ کەسێوە دیموکراسی وازی مکەرمۍ بەشدارۍ چالاکیەکاما با. هەتا دمایئاردەی بە گۆشەگیری چالاکیەکێما بەردەوامۍ با."
