هامسەرۆکۊو دەسەو ڕاوەبەری کۆما جڤاکێن کوردەسانی (کەجەکە) بەسێ هۆزاتە جە بەرنامێوە تایبەتی مەدیا خەبەر تیڤینە پی جۆرە هۊرسەنگنایش کەرڎ:

جە سەرەتاو قسەکاشەنە هۆزاتە مبارەکبایی ساڵەی تازێش جە رابەر ئاپۆی کەردو. سەرنجش وست سەرو شاندەکەو هەدەپەی و دیڎارو ئیمڕاڵی و واتش،" شاندەکە باسش چانەی کەرڎ کە تەندروسی و ورەو رابەرایەتی فرە خاسا. گرڎما فرە پانەی دڵوەشۍ بیەیمۍ. گەلەکەما دڵوەش بی. پی جۆرە من بە رێز، وەشەسیای و تامەزرۆییوە سڵام ۋنەو رابەرایەتی مکەرو. بەراسی دیارا هۊرسەنگنای فرە ۋەرفراوان و گرنگ کریان. جە درێژەنە سەرنجش وست سەرو ئا ئەرەیاۋنایە کە جە میدیاکاوە وەڵا کریاوەو ماچۆ، ئا دیڎارە درێژکراوەو دیدارەکەیشا چنی عومەر ئۆجالانی و فرە ۋەرفروانتەر و قوڵتەرا. جە دیداری یووەمیشەنە رابەر ئاپۆ واتەبێش، گۆشەگیری بەردەواما، ئەر دەرفەت برەخسیۆ، خاوەن ئا هێزەنە کە پرسەکەی جە بوارو جەنگیوە فاڕۆوە پەی بواری سیاسی و یاسایی. چی دیدارەنە ڕووەدایەکۍ هەرێمەکەی بە شێوەی ۋەرفراوانتەر هۆرسەنگیۍ. بە تایبەتی مەترسیەکۍ سەرو گەلا، جە لایەنو رابەر ئاپۆیۆ هۆرسەنگنای گرنگشا پەی کریان. رابەر ئاپۆ جە بارەو هەرێمەکەی و گەلا هەرێمەکەیۆ ئا سیناریۆ و پلانە تاریکۍ کە سەپیانە بە قووڵی و بە سەرمەشقیێوە گۆرۆ درکشا پنەمکەرۆ، جە بارەشاوە هوشیاری مڎۆ. بانگەواز ئاراسەو هێزە پەیوەندیدارەکا، وڵاتا، دەسەڵاتەکا، هێزەکاو دیموکراسی و رای گرڎی مکەرۆ. رابەر ئاپۆ ئیساتێچ هەمان ئا مامەڵەشە کەردەنۆ. پا مەعنۍ ئەر دەوڵەت و حکومەت بە راس و دروسی نزیکۍ باوە و ئیرادەو چارەسەری وزا ڕووە، واتەنیچش ئاڎ ۋێچش بەشداریێوە گۆرە مکەرۆ، خاوەن هێزۆ تیۆریک و پراتیکا. باس چانەی مکەرۆ کە چا مژارەنە دەورو ۋێش گێڵنۆ".

 جە درێژەو قسەکاشەنە هۊزاتە ئاماژەش پا پلانە ترسناکا کەرد کە ڕابەر ئاپۆ سەرنجش وستێنۍ سەرو واتش،"ئا ئاژەی ناوچەکەش کۊتەنەنە و پەرە ئەسایەکۍ کە ئینۍ ئارانە مرۆڤی تەرسنانە. ئینە حەقەتینا. رابەرایەتی نمونەو غەززەی و ئاژەو سوریایش ئاردەبێوە. ئیساتۍ جە لایەنو هێزەکاو مۆدێرنیتەی سەرمایەداری و هەژمونگەرایوە گەرەکشانە پرۆژەو ۋەرکۊتوو مېیامینی گەورەی جابەجێ بکریۆ. پا مەعنۍ کە، ئاسایشو ئیسرائیلی بە بنەما گیریۆ. ئا پلانۍ جە بنەڕەتەنە پەی دەسەبەرکەردەی ئاسایشو ئیسرائیلی جابەجێ مکریۆ. جە ڕووەدایەکا سوریایچۆ موینمۍ کە تورکیایچ بەرانە دلۍ ئا پلاناوە. ئانەیچ ڕا پەی ئانەی مکەرۆوە کە کێشەکۍ دژوارتەرۍ با و بانە بە گەنگەرین و زامێوە قووڵ. ئامانجەکە چینەینە چێشا؟ فرە ئاشکران، ئەر پی جۆرە بەردەوام بۆ، ناوچەکە ملۊنە دلۍ جەنگێوە ئایینی، ئیتنیکی و جەنگی نەتەوەیی و نەژاڎپەرسیوە. پی مەعنۍ گەلا یۆترینی قڕبکەرا فرە مەترسیڎارا. ۋەرکۊتو مېیامینی بۆ بە گۆلەو ۋنۍ. واتە ڕووەدایەکۍ ئیساتۍ ئاماژێنۍ پەی ئانەی. ئانەی ئیسە جە سووریانە ڕووە مڎۆ پی جۊرەنە.ئەر ئی ناکۆکی و ملەملانێ ئیسەیە قووڵتەرۍ باوە، جە سوریانە جەنگی مەزهەبی مېنە ئاراوە. هەمان چێو جە عێراقیچەنە مێنە ئاراوە. هەم جەنگی مەزهەبی و هەم جەنگی ئیتنیکی مۍ ئاراوە. ئینەیچ کاریگەری سەرو تورکیای منیۆرە. جە ئیساتێنە سیاسەتو پەرت کە و زاڵ بەی جابەجێ مکریۆ. ئینە پلانێوە فرە مەترسیڎارەنە. ئیساتۍ متێنەشارە و جابەجێش مکەرا. جە تورکیانە ئی پلانۍ بە تەمامی جابەجێش مکەرا. بەڕاسی ئینە پیلانێوە گۊرێنە. دامێوەنە کە دژو تورکیای نریێنەرە. دو گەلا ناوچەکەی نریێنەرە. ئی پرۆسە بە پیلانگێڵنیی مېیاننەتەوەیی دەسش پنەکەرد. چنی بەردەوامبیەیش قووڵتەر و فراوانتەر بی. ئیساتۍ رابەرایەتی ئاماژە بە مەترسییەکاو ئانەی مکەرۆ. تا مۍ وەریۆکەوتەکۍ هەرێمەکەی و دەوروبەریش قووڵتەرۍ باوە. چا بارۆ رابەرایەتی هوشیارکەردەیۆ و بانگەوازی فرە جددیی مڎۆ. باس چانەی مکەرۆ واڵە و برایەتی کورد و تورکی هێقم بکریۆ جە هەمان کاتەنە مسۆگەرکەردەی واڵە و  برایەتی گرڎو گەلان و چارەنوویسو گرڎو گەلا یەکلایی مکەرۆوە. بەراسیچ پا جۆرەنە. هەرپۊکەی ئەر ئا پلانۍ جە ئیساتێوە ڕاش ۋنە نەگیریۆ و بەردەوامە بۆ، ئانە دژمنایەتی وزۆ بەینو گەلوو کوردی و تورکیوە. بەراسیچ ئاژێوە پا جۆرە وزۆڕووە.

قسەکۍ دەوڵەت باخچەلی و ئا چێوۍ باسشا مکەرۆ و ئا پرۆسەی کە جە ١و تشرینو یووەمیوە دەسش پنەکەردەن، ئانەی ئێمە یاوێنمێنە، ڕابەرایەتی هەڵای هەوڵو ئەنەیاوای جە ئاژەکەی مڎۆ. بەڕاسی ئی ئەرەیاۋنۍ، ڕێبازۍ تاکتیکینۍ، جەنگێوە تایبەتێنۍ. چڼین کەڕەتۍ جەنگێوە تایبەت ڕاوەبەرمکەرا پەی ئانەی بتاوا بژیوا؟ ئینە جەنگێوە تایبەتا، تاکتیکێوەن؟ چونکی ئینە جە ۋېیەردەنە فرە تاقی کریانۆ. مشۊم بە زووتەرین کات چی مژاریە بیاومێنە. پۊکەی نمەتاومۍ چنی ئی دیدارەیە باسو پڕۆسێوە بکەرمۍ. پېسە ئانەی بڕێوەتەر باسش چۆوە مکەرا پرۆسێوە ئاشتی و چارەسەری نییا. پی دیدارەیە مرۆڤ نمەتاوۆ باس جە پرۆسەو ئاشتی و چارەسەری بکەرۆ. نزیکایەتی ڕابەر ئاپۆی پێسە کاغەزو لیتموسی چامنەن. ئیساتێچ ئاژەو گۆشەگیری و ئەشکەنجەدای جە ئیمرالینە بەردەواما. دەرفەتەکۍ ڕابەر ئاپۆی پەی ئاسایش و تەندروسی و ژیۋای ئازادی نامان دی. هروژمو قڕکەردەی پەی سەرو گەلوو کوردی نەمردان. پۊکەی نمەتاومۍ ئی پرۆسەیە بە پرۆسەو چارەسەری و ئاشتی بەنامۍ کەرمۍ. پرۊسێوە چیمنە وەڵتەر جە ساڵەکا ٢٠١٣-٢٠١٥ ینە لوواڕاوە. ئەردۆغان بەتەمامی پا مەرامیە نزیک بیۆ چا پرۆسەیە. پرۆسەکە بی بە ئامرازێوە. ڕابەرایەتی و پرسو کوردیچ بی بە ئامرازێوە. پەی ئانەی دۆڵەت سەروەربۆ و درێژە بەدەسەڵاتو ۋێش بڎۆ ئا پرۆسەشە بەکارئاورد. بەڵام ئانەی ئێمە موینمێش و چنەش مېیاومێنە و هۊرش سەنگنمۍ ئیساتۍ ئاژە و واقیعێوەش هەن. دەسەڵات چڼین جارۍ پەناش پەی جەنگی تایبەتی بەردەن، واوەی کەردەیۆ تاکتیکەکا پەرەپنەمۆ. جە ئیمراڵینە سیستەمو گۆشەگیری و ئەشکەنجەی گوزەر مکەرۆ. ڕابەر ئاپۆ هەڵای نمەتاوۆ چنی پارێزنەرەکاش کۊبۆوە. نمەتاوۆ چنی ڕێکوزیایەکا گلێرگەی مەدەنی کۆبۆوە. ڕووانە داواکاری پەی لوای ئیمراڵی مکریا. جە لایەنو هونەرمەندا و ڕۆشنۋیراو ئەکادیمییەکا و سیاسەتمەدارا ئەوروپیۆ داواکاریی پێشکەش مکریۆ، بەڵام هیچ جوبێوەشا نمەڎریۆوە. پېسە واتم هرووژمو قڕکەردەی جە گرڎ شۊنێنە بەردەواما. بە مەعنێوەتەر دەسەڵاتێوە هرووژم بکەرۆ سەرو کوردی جە ۋەرنیشتەنە و هەوڵو ناستەی ئیدارەو ۋێڕاوەبەری بڎۆ، چنی بە شێوێوە دیموکراتیکانە کێشەو کوردی جە تورکیانە چارەسەر مکەرۆ. مرۆڤ جە گرڎ لێوە تەماشە مکەرۆ موینۆ کە هرووژمو نکۆڵی و دلێنەبەردەی، سیاسەتو قڕکەردەی بە گرڎ تنوتیژی و سەختییەکاشۆ بەردەواما. پۊکەی پاسەش موینمۍ کە ئینۍ گرڎ سیاسەتۍ جەنگی تایبەتینۍ. ئیساتۍ ڕای گرڎی و پارتە کوردیەکۍ بە کوردەکا دلۍ ئاکەپەیچۆ  ئی ئەنەیاوایشا هەن جە چێوەکا. کاتێ باخچەلی و ئەردۆگانا دەمش مکەراوە، باسو دلێنەبەردەی پەکەکەی، ناستەی ۋەرنیشتی، قڕکەردەو کوردی مکەرا. ئاڎۍ کووردۍ ئازاد قبوڵ نمەکەرا کوردێوە قبوڵ مکەرا کوردێوە مەردەو، کوردێوە کۆیلە بۆ. جە ئاژەو ئیساتێنە ئینە هیچ عیلاقێوەش بە واڵەو-برایەتییوە نییا. هەر پۊکەی یاگۍ باوەڕی نییا. سەرەمڕە درێژە بە سیاسەتەکاو نکۆڵی و دلێنەبەردەی و قڕکەردەی مڎۆ. پەی ئانەی ئی پڕۆسە پرۆسێوە چارەسەری واقیعی بۆ، پەنەوازا گرڎو بازنه سیاسییەکا دەسوەڵێوستەی و به شداری بکەرا و دەور گێڵنا. ڕابەرایەتی داوا جە ئۆپۆزسیۆنی مکەرۆ دەسوەڵێوستەی بکەرۆ. ئێمەیچ چڼین جارۍ ئی بانگەوازەما کەردەن. هەرپاسە بانگەوازیما پەی جەهەپەی کەرد. واتما، دەسوەڵێوستەی ۋێت وزە وەڵۍ، پڕۆژەو چارەسەری بنیەرە. ڕابەرایەتی داوا جە حزبەکا و هێزە سیاسییەکا تر و ڕێکوزیاکا گلێرگەو مەدەنی و گرڎ لێوە مکەرۆ دەورشا بۆ. ئێمە بە تەمامی پاڵپەشتی جە بانگەوازەکاو ڕابەرایەتیما مکەرمۍ. ئێمە ئینایمۍ پەشتەو ئیرادەو ڕاابەرایەتیماوە. ئێمە پاڵپەشتی چی ئیرادەیە مکەرمۍ. جە چارەسەری دیموکراتیکیانەو پرسو کوردینە، موخاتەبی سەرەکی ڕابەر ئاپۆن. ئێمە هەمیشە ئینەما واتەن و هەمیشەیچ ماچمێشۆ. بەڵام دۆڵەتو تورکی و دەسەڵاتدارا ئاکەپە-مەهەپەی و ئۆپۆزسیۆن، واتە دۆڵەت بە گرڎیی، مشۆم ئیرادێوە پەی چارەسەرکەردەی نیشانە بڎا. مشۆم گۆش دارانە بانگەوازییەکەو ڕابەر ئاپۆی، جوابش بڎاوە و هەنگامەی کردەییەش پەی بنیا. یانی ئەر تورکیانە پرسو کوردی چارەسەر نەبۆ، تورکیا پارچە پارچە بۆنە. ڕابەر ئاپۆ و تەڤگەرو ئازادی کوردەسانی دما چانسو تورکیاین. ئەر تورکیا چنی ڕابەر ئاپۆی پرسیوکوردی سەرو بنەماو چارەسەری دیموکراتیکی چارەسەر نەکەرۆ، ئەر تورکیا دیموکراتیکبیەیۍ حەقەتینە پەیڕەو نەکەرۆ، ئانە تورکیا بناغەکەش پارچە پارچە بۆنە. یانی بەپاو هۆرسەنگنای ئی گرڎ گفتوگۆ و یەک- دووە چەمپنەکۊتەیە چنی ڕابەر ئاپۆی ئەنجامدریان، پەنەواز نمەکەرۆ دلۍ گەلی و ڕای گرڎی دیموکراتیکینە چەمەڕایی ناپێویش وەش بۆ. نمەبۆ ساردبیەیۆ جە ئەرەکۊشای و مڎرامانەنە بێنە ئاراوە. یانی ئانەی پاڵپەشتی و هێز بەخشۆ بە ئیرادەو ڕابەر ئاپۆی و پرۆسەکەی فاڕۆ بە پرۆسێوە حەقەتینەو چارەسەری بە دڵنییاییوە ئەرەکۊشای و مڎرامانو گەلەکەیمانە. پۊکەی پەنەوازا ساڵۊو ٢٠٢٥ بیاونمۍ بە پرۆسێوە کە ئازادی جەسەیی ڕابەر ئاپۆی و چارەسەری دیموکراتیکانەو پرسو کوردی و دیموکراتیزەکەردەی تورکیای و دیموکراتیزەکەردەی هەرێمەکەی بەدی بێنە. پەنەوازا هەرمانە پەی ئی مەرامیە بکەرمۍ. مشۆم ئینە مەرامو ساڵۊو ٢٠٢٥ بۆ. پەنەوازا بە شێوێوە بەهێزتەر و چنی گەشکەردەی ئەرەکۊشای درێژە بە هەڵمەتەکۍ بڎەیمۍ".

هۆزاتە سەبارەت بە جەنگی جەهانی یەرەمی جە هەرێمەکەنە ماچۆ، جەنگی جە هانیەرەم بە شێوێوە فرە تنوتیژانە بەردەواما. ئیساتۍ هەرێمەکە دیزاینمکریۆوە. جە متەیراوەو هەرێمەکەینە هەوڵ مڎریۆ ئیسرائیل بۆ بە یووەمین دەسەڵاتی هەژموونگەر جە هەرێمەکەنە. سەرو بنەماو بەرژەوەندییەکا ئیسرائیلی، شێوێوە تازە بە هەرێمەکەی مڎریۆ. ئیساتۍ تەمامو پلانەکۍ، واتە پڕۆژەو ۋەرکۊتوو مېیامینی گەورەی ۋێش پڕۆژێوە چامنەن. پی جۆرە ملەملانێ نەتەوەیی و تائیفی، ئایینییەکۍ جە هەرێمەکەنە پېسە چەکێوە جەوهەری پەی جابەجێکەردەی ئی پڕۆژەیە بەکارمۍ. پلانەکۍ بەشێوەش سەرو ئینەی مەرزیێنەرە. جەنگو غەززە، لوبنان، جەنگو ئیساتۍ سووریای چڕتەر بۆوە، وڕای ڕژێمی، وەڵابیەیۆ جەنگەکەی پەی عێراقی، وەڵابیەیشۆ پەی ئێرانی کە جە ئیساتێوە ئامانجی سەرەکی ئێرانا. هەرپێسە چنی تورکیا فاڕیۆ پەی مېیانێوە کە جەنگ دلێشەنە چڕتەر بۆوە، گرڎو ئی پرۆسەیە مەبۆ بە پرۆسەو واوەی دیزاینکەردەیۆ هەرێمەکەی. پەی ئانەی ئی پرۆسە بە شێوێوە ئەرێنی جە لایەنو گەلیوە بوییەرۆ، پەنەوازا ئەرەکۊشای بکریۆ".

سەبارەت بە وڕای ڕژێمی و ئامای سەرو دەسەڵاتی جە لایەنو هەتەشەیۆ هۊزاتە واتش،"بەڵێ ئیساتۍ هەتەشە چن ڕووێوەن ئامان سەرو دەسەڵاتی و دەسەڵاتش جە دیمەشقەنە گرتەن دەس. ئایا ئینە بە هێزو خودو هەتەشەی ڕووەشدا؟ بێگومان نەخێر. ئینە پلانێوە مېیاننەتەوەییە بۍ. بە سەرۊکایەتی ئەمریکا و ئیسرائیل و بەریتانیای. تورکیایچ چی پلانێنە بەشدار بۍ. پەی جابەجێکەردەی ئی پلانۍ، ئەولەویەت و سەرمەشقی دریا بە تورکیای. ئیساتۍ کوچۍ زیادەڕۆیشا کەردەن. یەعنی پانەی کە سوریاشا ئەرەگیرکەردەن، جە دەسەڵات و میدیا و دەووروبەرەکەشەنە توشوو شاگەشکەی بیێنۍ. بەڵام بێگومان ئانە ڕاس نییا. ئیساتۍ تورکیا جە سروشتو ۋێشەنە پېسە هەرێوە کە بەرەو خاکێوە پەڕ جە ئەڵغامی مل منیۆ. پلانێوە مجیارە و تورکیا دەورش پنەدریا پەی جابەجێکەردەی ئی پلانۍ. جە حەقەتینەنە ئینە وێش پیلانێوەنە جە دژو تورکیای. تورکیا ۋێش خزنا دلۍ ئی پلانێوە. پی جۆرە بە کەڵک هۆرگێرتەی جە تورکیای، کاریگەری و هەژموونو ئێرانیشا جە سووریانە جە بەین بەرد. ئێران گورزێوە سەختش ۋەرکۊت. کاریگەری ئێرانی جە سووریانە جە ڕاو تورکیایۆ مەڕیا. تورکیا پەی ئینەی وێبەخشانە هەنگامەش نیێنە و گەرەکشا ئا بۆشاییە پەڕبکەرۆوە کە ئێران جیاش ئاستەن. تورکیا گەرەکشا یاگۍ ئێرانی گێرۆوە. بۍ ئینەی ئاگاش جە قوڵایی پلانەکۍ بۆ لوا دلۍ ئی هەرمانێوە. واتش، ئێران جە سووریانە دلێنە مشۆ و منیچ یاگێش گێرووە. پېسە سەردەمو عوسمانی سووریای مکەرو بە ئەیالەتو ۋێم. واتە ئیساتۍ تورکیا هەوڵو ناستەی ئێرانی جە هەرێمەکەنە مڎۆ و هەژموونو ئێرانی جە هەرێمکەنە ماڕۆنە. ئینا خیاڵو ئینەینە. بەڵام مشۆم تورکیا بزانۆ کە سووریا نمەوزیۆ ۋەرو دەسیش. ئی ویستەو تورکیای جە بینیشەنە مەنۆوە. سوریا تیکێوە گەورەن. ئی تیکەیە نمەڎا بە تورکیای. واتە ئیسرائیل هەژموونو ۋێش جە هەرێمەکەنە چنی تورکیای هامبەش نمەکەرۆ. هێزە هەژمونییە مېیاننەتەوەییەکۍ ڕا نمەڎا هەژموونو هەرێمەکەی جە مابەینو ئیسرائیلی و تورکیاینە هامبەشۍ با. ئیساتۍ پەی ئانەی ئیسرائیل تورکیای وزۆ چێرو هەیمەنەو ۋێشۆ، سیاسەت و پلانێوە جابەجێ مکریۆ. چێگەنە قسەکاو ترامپی پەی ئەردۆغانی وزو ڕووە کە بە 'پیێوە فرە ژیر' ستایشش مکەرۆ، کاتۍ ترامپ ئینەی ماچۆ ئانە گاڵتە بە تورکیای مکەرۆ. ئیسرائیل تەماشێوە دمای مکەرۆ  گاڵتە بە تورکیای مکەرۆ. تورکیا ئیساتۍ کۊتەن دامەکێوە. تورکیای بەکارمارا و دماتەر تورکیای وزاوە سەرو ئا هێڵۍ کە ۋێشا گەرەکشانە. تەنانەت کاتێ تورکیا پی جۊرە هەنگامێوە بنیۆ، دلێینەو تورکیاینە گرڎ دەسوەردایۍ مکەرا. گرڎ جۆرە گەمێوە سەرو تورکیای ئەنجام مڎا. ئیساتۍ ئی حکومەتە هەوڵو فریودای گلێرگەی مڎۆ. هێزەکۍ ئۊپۊزسیۊنیچ جیای ئانەی ڕەخنە چی سیاسەتا حکومەتی بگێرا، سیاسەتێوە ئاشتیانە چنی ئیدارەو ۋێڕاوەبەری سەرنیشتی و ۋەرکۊتو سوریای پەی تورکیای پێشنیار بکەرا، داواو سیاسەتێوە ئاشتەوایی بکەرا. پۊکەی چی ئاژەنە تورکیا یۆن چا لایەنا کە زەرەرۍ گۊرەش ۋەرکۊتەن. ساڵانێوەن سیاسەتەکاش سەرو بنەماو قڕکەردەی کوردی بیەن، گرڎ چێوۍ مکەرۆ پەی قڕکەردەی کوردی. دلۍ سوپاو نەتەوەیی سووریاینە چڼین کۆنترێشا وەشۍ کەردێنۍ، چڼین چەتۍ داعشیشا دلێنە کوۍ کەردێنێوە. جە حەقەتینەنە ئی هێزە هەر ۋێش داعشا. جە ئیساتێوە ڕووەی دژمنکاریی ۋێش کەردەن کوردی، جە لێوەتەرۆ هەتەشە بەهەمان شێوە هەوڵ مڎۆ جە پێگێوە نزیک چینە مامەڵە بکەرۆ. پی جۊرە سەرەمڕە ئینۍ پەیوەندینە چنی دیمەشقی. تورکیا سەرەمڕە پێوەش ئینا دیمەشقەنە، پێوەتەرش ئینا واشنتۆنەنە، یۊتەرش لەندەنەنە. هەوڵ مڎۆ سیستەمو ۋێڕاوەبەری چا دلێنە بەرۆ و قڕکەردەی جە دژو گەلوو کوردی و گەلوو سەرنیشتی و ۋەرکۊتوو سوریای ئەنجام بڎۆ. ئەجۆشەنە پی جۆرە بۆ بە دەسەڵاتدارو سووریای، ئینە ۋۍ هۊرخەڵەتناین جە ئاژەو ئیساتێنە تورکیا سیاسەتێوە مەترسیڎار و غەڵەت و نالۆژیکی ڕاوەبەر مکەرۆ. ئینەیچ زەرەرۍ گۆرە بە تورکیای مېیاونۆ. چی ئاژەو ئیساتێنە لایەنێوە دۆڕیان، ئینە چێوۍ ئاشکران".

جە بەردەوامی قسەکاشەنە هۊزاتە سەرنجش وست سەرو مڎرامان و هێزەکاو پارێزنای گەلی و واتش،"جەنگەوانا یەپەگە و یەپەژە و قەسەدەی مڎرامانۍ گۆرە ڕاوەبەر مکەرا.گەشمەرڎا ئی مڎرامانەیە، گەلی وڵاتپارێزنیما بە ڕێز و وەشەسیایۆ، یاڎۍ مکەرمێوە. هیواو خاسبیەیۆ پەی گرڎو زامڎاراکاشا موازو.  مڎرامانەکە بە ئازایێوە فرۆ بەردەواما. جە حەقەتینەنە گەلەکەما جە گرڎ یاگێنە پەی جەنگی و مڎرامانی سەفەربەرۍ بیێنۍ. سەرو هێڵۊو جەنگو گەلی شۆڕشگێڵنی ئینۍ مڎرامانەنە. گرڎو گەلوو سەرنیشتی و ۋەرکۊتو سووریای مڎرامان مکەرا و ئینەیچ بە تەمامی ماناڎارا. ئاڎۍ تەنیا جە ڕاو مڎرامانیوە متاوا درک بە بیەی و ئازادی ۋێشا بکەرا. هیچ ڕێوەتەر نییا. تەنیا ڕا مڎرامان و ۋێڕاگریا. مبارەکبایی و سڵام چی ئیرادەو مڎرامانو گەلەکەیما و هەڵوێسو مڎرامانیشا مکەرو. تا واچی بەقیمەت و گرنگا. ئی مڎرامانە پەنەوازا بە قەوەتتەرین شێوە بەردەوام بۆ. پەنەوازا گەلەکەما جە گرڎ شۊنێنە پاڵپەشتیۍ گۊرە چی مڎرامانیە بکەرا. پەنەوازا گرڎو هێڵە سنوورییەکانە سەڎان هەزار کەسۍ پەی پارێزنای ۋەرنیشتی چالاکی ئەنجام بڎا. پرسو کوردی بیەن بە یۆ، نمەتاویۆ جە یۊی جیا بکریاوە. جە ڕاو ئی بەرنامەیۆ، داوا مکەرو جە گرڎو گەلەکەیما، دۆسەکاما، گرڎو ئەرەمەرزیا دیموکراتییەکا، گرڎو ژەنا- کە شۆڕشو ۋەرنیشتی شۆڕشێوە ژەنان، سیستەمێوەن سەرو بنەماو هێڵەکاو ژەنا، و هەرمانەی گۆرۍ ژەناش ئینا چنە، ژەنی قوربانیۍ گۊرە مڎا، ئینەیچ پەی ئازادی ژەنۍ و ئایندەو ئی شۆڕشەیە فرە گرنگا. پەنەوازا گرڎو ژەنا، نەک تەنیا ژەنا کوردی، بەشداری ئی شۆڕشەیە بکەرا. ئینە فرە گرنگا. بێگومان ئیدارەو ۋێڕاوەبەری سەرنیشت و ۋەرکۊتو سووریای جە بنەڕەتەنە ئاسۆو چارەسەری جە سووریانە بە گرڎی وزۆ ڕووە. چنی متاویۆ چارەسەری جە سووریانە بەدەس بۍ؟ چنی سووریا چی پڕۆسە تاریکەنە بەربشۆ؟ بەڕاسی کۆمارو سووریای دیموکراتیکی چنی سەرو بنەماو واڵە و برایی گەلا و یۊبیەی دیموکراتیکی گەلا بنیات بنریۆ؟ ۋەرنیشت قەوەتتەرین و عالتەرین نموونەو ئینەین. پەنەوازا سووریا سەرو بنەماو هەرێمە خۆسەر و دیموکراتەکا، سیستەمو دەستوری دیموکراتیکی پەرەبسانۆ. سیستەم و چارەسەری پی جۆرە ڕا جە ملەملانۍ تائیفی و ملەملانێ ئایینی و ملەملانێ نەتەوەیی و ڕەگەزی مکەرۆ. چی ئاژەو ئیساتێنە کورد سەرمەشقایەتی ئی هەرمانۍ مکەرۆ. گەلو سەرنیشتی و ۋەرکەوتو سووریای سەرمەشقی ئی هەرمانۍ مکەرا. پراکتیزەکەردەی ئینەی نیشانە مڎۆ. پی مەعنۍ بەرژەوەندییەکۍ تورکیایچ چێگۆ موویەرا. ئەر بەڕاسی تورکیا ئاوەزێوە عەقڵانیی بە دەوڵەتبیەیش بۆ، ئانە ڕێککەوتەی چنی ئیدارەو ۋێڕاوەبەری سەرو بنەماو چارەسەری دیموکراتیکی جە سەرنیشتوو کوردەسانینە بۆ. سەرو بنەماو چارەسەری دیموکراتیکی و ئاشتیانەی چنی گرڎو کوردی بۆ. گفتوگۆ چنی ڕابەر ئاپۆی ئەنجام مڎریۆ. ئینەیچ بۆ بەمەڵامەتو ئانەی تورکیا بۆ بە زلهێزێوە گۆرە جە هەرێمەکەنە. بە مەعنێوەتەر، ئەر تورکیا گەرەکش بۆ بۆ بە زلهێزێوە کاریگەر و گەورە جە سووریاو ۋەرکۊتوو مېیامینینە، ئانە مشۆم تورکیا چنی ئیدارەو ۋێڕاوەبەری سەرنیشت و ۋەرکۊتوو سووریای ڕێگگنۆ. پەنەوازا سیاسەتێوە ئاشتەوایی و ئاشتیانە پەیڕەو بکەرۆ. بە مەعنێوەتەر چارەسەر جە سووریانە تەنیا پی جۆرە مومکینا. ئەگینا سووریا ملۆ دلۍ ملەملانێوە. وەڵتەر دەسش پنەکەردەن.ئیساتۍ جینۆسایدێوە گەورە جە دژو عەلەوی و دروزەکا ئینا ئارانە. جە ئیساتێنە هرووژمێوە قڕکاری دژو گەلوو سەرنیشت و ۋەرکۊتوو سووریای هەن. واتە چیولای ملەملانێ تایفەگەری، ملەملانێ ئایینی زیاتەر و سەختتەر بۆنە. پەنەوازا پارادایمێوە تازە بنریۆرە. ئاژەکە خراپتەر بۆنە. ڕاسا کاریگەری ئێرانی جە سووریانە مەڕیان، بەڵام نمەبۆ مرۆڤ پاسە بە ئاسانی تەماشەو ئێرانی بکەرۆ. ئێران پاسە بە ئاسانی لوبنانی و سووریای و عێراقی جیانمازۆ. هەرکەسێ بەشێوێوە بەپاو هەلومەرجی تازەی هێزو ۋێش تازە مکەرۆوە و هەوڵو ۋێڕێکوستەیۆ مڎۆ. یانی ئاژەکە بەرەو قۆناغێوە مەترسیڎارتەری ملۆ. ڕابەر ئاپۆ ئاشکراش کەرد کە تەنیا چێوۍ کە متاوۆ ڕا چی کاریە بگێرۆ، ئیرادە و چارەسەرا. ئا هۊرسەنگنایۍکە ڕابەر ئاپۆی پەرەش پنەدێنۍ فرە گرنگێنۍ.

هۊزاتە جە درێژەو قسەکاشەنە سەرنجش وست سەرو ئاژەو عێراقی چی ملەملانانە کە ۋەرکۊتوو مېیامینیش گێرتەنۆ و واتش" تورکیا هەوڵ مڎۆ عێراقی بکەرۆ بە ئامانجەکا میساقی میللی. ئا ڕێککەوتەیۍ چی دماییانە چنی عێراقی کەردش دلێینەکەش بەتەمامی هەر ئینەنە. هرووژمە ئەرەگیریەکاش پی مەرامۆ مکەرۆ. جە عێراقەنە بەتایبەت چی ساڵا دماینە فرە وێش بەڕێکوستەی مکەرۆ، هەوڵمڎۆ کاریگەری سیاسی فرەش بۆ. تورکمانەکا نزیک جە ۋێش بەڕێکوستەی مکەرۆ. جە کەرکووک، موسڵ و تەلەعفەرەنە پا جۆرە ئینا هەوڵداینە. بەعشیقەش کەردەن بە مېیانو ئی هەرماناشە. جە لێوەتەرۆ جە ڕوو ئابوورییوە تەنگەتاو بیەن. هەوڵمڎۆ بازاڕو ئابووری جە عێراقەنە بە تەمامی بەدەس بارۆ. عەیامێوەن ئاوی پېسە ئامرازێوە جە دژو عێراقی بەکارمارۆ. هەوڵمڎۆ سەرو ئی بنەمایۍ عێراقی ملکەچ بکەرۆ. سیاسەتێوە پی جۊرەیە ڕاوەبەر مکەرۆ. وە هەوڵ مڎۆ بڕۍ دەرەنجامۍ دەس وزۆ. بە ڕاپنەدای عێراقی درێژە بە ئەرەگیری و لکنای جە بڕۍ یاگێنە بنکە و بارەگای سەوازیش وەشکەردەن. جە ئیساتێنە هەوڵمڎۆ قەوەتتەرێشا بکەرۆ. خێرایش دان بە سیاسەتو میساقی میللی. هەوڵمڎۆ جە عێراقیچەنە سەروەری و هەژموونو ۋێش وەش بکەرۆ. پرۆژەو ڕاو گەشەی پېسە بەشێوە چی ئامانجیە هۊرسەنگنا. پۊکەی واتما ئی پڕۊژە دامێوەنە نمەبۆ عێراق گنۆ دلۍ ئی دامێوە. چی مژارەنە داواما جە عێراقی کەردەبۍ. مەرامش ۋۍ یاوناین بە مەرامەکا میساقی میللی و وەشکەردەی سەروەریی سەرو عێراقی.

پۊکەی پەرە بە پشێویەکا دلۍ عێراقی مڎۆ. هەم بە ڕاو ڕێکوستەی هەوڵمڎۆ داعشی ڕێکوزۊوە جە عێراقەنە. هەوڵمڎۆ داعشی وزۊوە جوڵە. چی ڕوانگۆ هەوڵ مڎۆ ناکۆکی وزۆ بەینو لایەنە شیعییەکاوە. هانو شیعە و سوونەی مڎۆ گنا دلۍ پشێویۆ. تورکیا سەرمەشقی ناستەی کاریگەری ئێرانی جە عێراقەنە مکەرۆ. پېسە چنی ئانەش بە هێزە مېیاننەتەوەییەکا جە سووریانە کەرد، هەوڵمڎۆ جە عێراقیچەنە سەرکردایەتی ئینەی بکەرۆ.

ئانەی ئێمە شۊنیرەلوایما کەردەن، ئیساتۍ فرەو لایەنا جە عێراقەنە ئاگاڎارۍ ئینەینۍ. بە دڵنیاییوە جە فرەو چێوانە فرە دێر نییا، بەڵام جە فرەو چێوینە دماکۊتێنۍ. عێراق غەڵەتی گۊرەش کەرد. بەڕاسی عێراق کۊت دامەو تورکیایۆ. ئا ڕێککەوتەی چنی تورکیای کەردش فرە غەڵەت بۍ. زەرەرۍ فرەش بە عێراقی یاونا. وستەی دلۍ لیستو تیرۆرو پەکەکەی زەرەرۍ فرەش بە عێراقی یاونا. عێراق پی جۆرە غەڵەتێوە فرە گۆرەش کەرد. پەی بەرژەوەندی تورکیای هەرمانەش کەردە . فرە گرنگا عێراق ئەنجام چی ئاژەیە هۊرگێرۆ. جە ئیساتێنە پەنەوازا عێراق ڕێککەوتەیەکەیش چنی تورکیای هۆرشێونۆوە. پەکەکەی چا لیستو تیرۆریەنە بەربارۆ. هەڵوێسێوە جە دژو ئی سیاسەتە ئەرەگیریا تورکیای نیشانە بڎۆ. مشۆم تورکیا جە عێراق و کوردەسانەنە بەرکریۆ. پەی ئانەیچ پەنەوازا سیاسەتێوە جددی جابەجێ بکریۆ. پەنەوازا عێراق بتاوۆ ئی ئیرادەیە نیشانە بڎۆ. ئەگینا بۆ بە ئامرازو سیاسەتو عوسمانی تازەی. بە دڵنیاییوە پەنەوازا ئینە مردۆ. ئێمە هەمیشە ئینەما واتەن، هەستما بە پەنەوازی کەردەن کە واوەیش بکەرمێوە".

جە بەردەوامینە هۊزاتە ئاماژەش بە مڎرامانەکا ئێساڵی کەردو واتش،" جە گرڎ شۊنێنە جەنگ هەن. هرووژمەکۍ بەردەوامێنۍ. مڎرامانێوە گۊرە هەن. سڵام چی مڎرامانیە مکەرو. دۊڵەتو تورکی تا ئیساتۍ نەتاوانش ئا ئەنجامەیە دەس وزۆ. تەنانەت جە ساڵەو ٢٠٢٥یچەنە نمەتاوۆ ئەنجامۍ دەس وزۆ. ئی مڎرامانە گەشە مکەرۆ و فراوانتەر بۆنە. نەک تەنیا جە هەرێمەکاو پارێزنای مەدیاینە. ئیتر سەرو بنەماو دوکتورینی تازەو پارێزنای ۋێت، دوکتورینی جەنگی جە سەرنیشتوو کوردەسانی پراکتیزە مکریۆ. جە پرۆسەی ئندەنە بەتایبەت جە ساڵۊو ٢٠٢٥ینە بە بەهێزی موینمۍ کە ئینە وزیان بوارو جابەجێکەردەیۆ. ئی دوکتورینە تازەو جەنگی و ۋەرگریکەردەی جە ۋۍ، دەرەنجامەکاو ۋێش نیشانە مڎۆ. پۊکەی من قەناعەتم چامنەن کە جە ساڵۊو ٢٠٢٥ ینە جەنگێوە گۊرەو پارێزناو ۋێت، جەنگو گەلی شۆڕشگێڵنی جە سەرنیشتوو کوردەسانی ملۆڕاوە. ئینەیچ پێشئامای جددی وەش مکەرۆ.

بەهەمان شێوە ئەرەکۊشای پەی ئازادی جە چوار پارچەو کوردەسانینە گەشە مکەرۆ و قەوەتتەر بۆنە. سەرو ئی بنەمایە هەرپېسە چنی ساڵۊو ٢٠٢٤ بە ۋێڕاگریێوە فرۆ ۋېیەرد، ساڵۆو ٢٠٢٥یچ بە شێوێوە پلەبەندی بە ئەرەکۊشای قەوەتۆ موېیەرۆ."

جە دمادمایی قسەکاشەنە بەسۍ هۊزاتە سەرنجش وست سەرو گەشمەرڎا و کۊمکوژیەکا مانگەو کانوونو یووەمی و واتش ،"چی مانگێنەکۆمکوژیۍ گۊرۍ ئەنجامدریۍ، جە هەمان کاتەنە مانگێوە عالەنە کە مڎرامانی گەورە کریان. چی مانگێنە کۆمکوژی مەرەشی ئەنجامدریا. بەشێ جە گەلەکەیما چی کۆمکوژییەنە گیانشا جە دەسدا. بەڕێز و وەشەسیایۆ یاڎشا مکەرووە.

هەرپاسە کۆمکوژی ڕۆبۆسکی ئەنجامدریا. جە ڕۆبۆسکینە ژمارێوە جوانۍ کوردی بۆردومان کریۍ. ٣٤ کەسۍ جە گەلەکەیما گیانشا بەخشا و بە شێوێوە دڕندانە گەشمەرڎۍ کریۍ. هەرپاسە بە ڕێز و حورمەتۆ یاڎشا مکەرووە.

ساڵۊو ٢٠٠١ ئۆپەراسیۆنێوە پەی سەرو زینانەکا ئەنجامدریا، جەمۍ شۆڕشگێڵنۍ و دیموکراتۍ گیانشا جە دەسدا. بە ڕێز و حورمەتۆ یاڎشا مکەرووە.

جە ٢٣ۍ کانوونو دووەمینە، ئەڤین گۆییە، میر پەروەر، عەبدولڕەحمان کزل جە مېیانو پاریسینە جە لایەنو میتیوە تیرۆرۍ کریۍ. بێگومان هەواڵگری فەڕەنسایچ پەشتیوانیش ۋنە کەرد. فەرەنسا بی بە هامبەش چی هەرمانێنە. ئێمە ئینەما بە دووەم کۆمکوژی پاریسی پێناسە کەرد. جە یووەم کۆمکوژی پاریسینە، هەمڕایا ساکینە، ڕوناهیە و ڕۆژبینە پاریسەنە بە شێوێوە دڕندانە تیرۆرۍ کریۍ. گرڎو ئا هەڤاڵاما بە ڕێز و وەشەسیایۆ یاڎۍ مکەرمێوە. بێ گومان چی مانگێنە گەریلا گەشمەرڎۍ فرێش بەخشۍ. فەرماندۍ گۊرۍ گەریلایما گەشمەرڎۍ بیۍ. هەڤاڵ عادل، هەڤاڵ گوڵبەهارە گەشمەرڎۍ بیۍ. جە ئەیالەتو دێرسیمینە فەرماندەو ۋێپارێزنای عەزیز دێرسیم چنی ٦ هەڤاڵاش جە ٣١و کانوونو یووەم و ٢٠١١ینە جە دێرسیم جە جەنگەنە گەشمەرڎۍ بیۍ. گرڎو ئی گەشمەرڎاما بەڕێز و حورمەتۆ یاڎۍ مکەرمێوە. بە دڵنیایوە ئی ئەرەکۊشایە مېیاونمۍ بە ئامانجو سەرکەوتەی.

بەڕاسی بی بە مانگێوە جە ئەرەکۊشای و مڎرامانی گۊرە. بەتایبەت مڎرامانو ۋەرنیشتی بی بە بەشێوە گرنگو ئی مڎرامانیە. جە مانگۊو کانوونو یووەمینە شەهادەتۍ گۊرۍ دریۍ. جیهان بیلگینە، نازم داشتان دەنگی بەرزو ئی ئەرەکۊشایە بێنۍ. بیۍ بە دەنگو حەقیقەتی و پەی ئانەی گیانشا بەخشا. بە دەیان جەنگەوانۍ قەسەدەی، یەپەگەی و یەپەژەی، چڼین کەسۍ تەرۍ جە گەلەکەیما گیانشا جە دەسدا. گرڎیشا بە ڕێز و پنەزانایۆ یاڎۍ مکەرمێوە. دڵسۆزی بە یاڎ کەردەیۆیشا تەنیا بە سەروستەی ئەرەکۊشای بۆ. متاوو قەولو ئانەی بڎەو. دڵسۆزۍ بیمۍ بە یاڎکەردەیۆیشا، بە دڵنیاییوە ئەرەکۊشای ئازادی مېیاونمۍ بە سەرکەوتەی. قەولو ئینەی مڎەو بە گەلەکەیما و گەشمەرڎە قارەمانەکاما.