وەرپەرسێوە باڵاو ھێزەکاو ھامپەیمانیی میاندەوڵەتیی دژوو داعشی، سەبارەت بە ھەوڵەکا پەی یۊوستەی و خاسسازی جە وەزارەتوو پێشمەرگەینە دواێوە ڕۊنامەوانینە واتەنش: "ھەنگامەکاو حوکمەتوو ھەرێموو کوردستانی جە پڕۊسەو یۊوستەیۊ و خاسسازیی ھێزەکاو  پیشمەرگەینە تەمام پێچەوانەن چەنی ئا پابەندییا، کە جە جەیۊیاواینێوەنە چەنی وەزارەتوو بەروو ئەمریکای ئیمزاش کەرڎەن وە ئانە کە ئێمە یاوێنمیشنە یۊوستەیۊ ھێزەکاو پێشمەرگەی هەرمانێوە سەختەنە.

 یاگێ واتەینە، ئا  وەرپەرسە باڵاو ھامپەیمانا سەبارەت بە کاریگەریی ناکۊکیی پەدەکە و یەنەکەی سەروو یۊوستەیۊ هێزەکاو پێشمەرگەی واتەنش: "ھێزەکاو ھامپەیمانا بەرڎەوام ھانی ھەردووە لایشا دان کە دمایی بارا بە ناکۊکییەکاشا و ئیتر ھێزەکاو پێشمەرگەی نەکەرا بە بەشێوە جە ناکۊکییەکاو بەینوو هەردووە حزبا، لەقای پەیوەندییەکاو بەینوو یەنەکەی و پەدەکەی ڕەنگش دانۊ سەروو وەزارتوو پێشمەرگەیچ، ئانە ئێمە چەنەما دییەبۊ بەڕۊشنی بەرگنۊ کە دەرەنجامەکاو ئا ناکۊکییا بۊنەو پارتە گەورەکاو ھەرێموو کوردستانیوە وەش بییەن".

 هەرپاسە نامێبریا هۊشداریش دا و واتش: "حوکمەتوو ھەرێموو کوردستانی جە مانگەو ئەیلوولوو ساڵێ ویەرڎینە یاداشتننامێوە جەیۊیاواینەیش چەنی وەزارەتوو بەروو ئەمریکای ئیمزا کەرڎەن پەی یۊوستەی ھێزەکاو پێشمەرگەی ماوەو چوار ساڵانە،  وەلێ چەنی ئانەیچە بارودۊخوو ئیساتێ تەمام پێچەوانەو ئا پابەندییانە کە حوکمەتوو ھەرێموو کوردستانینە هەنێ".

ئاخرۊ سەبارەت بە  مەرجەو ھامپەیمانا پەی بەرڎەوامیی ھامکارییەکاشا پەی ھێزەکاو پێشمەرگەی، ئا وەرپەرسە سەروازییەو هامپەیمانا ئاشکراش کەرد: "ئا یاداشتنامەو جەیۊیاواینەیە کە بەینوو وەزارەتوو بەروو ئەمریکاینە و حوکمەتوو ھەرێموو کوردستانینە ئیمزا کریان بەڕۊشنی ئا مەرجا بەروزۊ، کە پێویستێنێ پەی یارڎەیدای ھێزەکاو پێشمەرگەی جە ڕاو ویلایەتە یۊگێرتەکاو ئەمریکایۊ، بڕێ چا مەرجا کەرڎەی ئۊپەراسیۊنی ھامبەشی جە وێ گێرۊ، چەنی ھێزەکاو عێراقی دژوو داعشی، لەگەڵ خاستەرکەرڎەی ھەماھەنگی بەینوو ھێزەکاو  پێشمەرگەو کوردستانی و ھێزە عێراقییەکانە، ھەرپاسە فاڕایۊ زانیاریی ھەواڵگێری و کەرڎەی هەرمانەو تۊمارکەرڎەی بایۊمەتری و ئەرەمەرزنای سەرکرڎایەتیێوە کارای و چالاکی و وەشکەرڎەی پەیکەربەندی وهەرمانکەرڎەی بە چند چەمکێوە ڕۊشنی و برەودای بە سیاسەتێوە سەروازیی گردگیری".

س.ز