بە سەرمەشقی جەمەو کولتووری کورڎی، جە کانتۆنو بێرنی جە سویسرا، گەشمەرڎۍ مدرامانو ڕۊچۍ مەرڎەی ١٤و تەمووزی 'کەمال پیر، خەیری دورموش، عەلی چیچەک و عاکیف یەڵماز'، یاڎشا کریاۋە.

جە سەرەتاو مەراسیمەکەینە، محەمەڎ عەلی خۆجە قسېش کەرڎۍ و چنەشەنە هۊرسەنگنایش پۍ کودەتاو ١٢ی ئەیلولی کەرڎ و ئاماژەش پانەی کەرڎ، بە هەزاران گەنجۍ کورڎی بەمەڵامەتو کودەتاکەیۊ ڕەوانەو زینڎانی کریۍ.

ۋاتیچش: ئەقڵیەتو کودەتاکەی گەرەکش بۍ چۆکشا پنە بڎۊرە، بەڵام ئێمە جە سایەو مدرامانو هامڕا سەرمەشقەکاماوە، کە گەشمەرڎۍ بیۍ ئا هجومەما پوچ کەرڎۊ.

خۆجە ئانەیچش ۋات، پۍ پارېزناو شناسنامەو کورڎی، قوربانیۍ گۊرۍ دریېنۍ و ئەرەیاۋناش، "پەکەکە چۆکش نەڎارە. قوربانیېش بەخشۍ و ۋېڕاگریش کەرڎ. کۊشیای ئارۊی جە سایەو ئا ڕۊحەینە".

لاو ۋېچشۊ عیرفان بابائۆغڵو قسېش کەرڎۍ و ۋاتش: دەوڵەتو تورکی حەجگیز ۋیرشەرە نۍ کە دماو ساڵەکا ١٩٥٠یۊ، سەر جەنۆ کۊشیای کورڎسانەنە دەسپنەکەرۊۋە، پاسە ۋیرکەرېنۍ کە گەلوو کورڎیشا وستەن قەبرە و چېرو کۆنکرێتینە ئاستەنشاوە، بەڵام پەکەکە بە رۆحو مدرامانیۋە ئا کۆنکرێتشە هۊرتەکنا و دلېشەنەبەرڎ.

بابائۆغڵو ڕۊشنش کەرڎۊ، پۍ ئانەی مدرامانو پەکەکەی دلېنەبەرا، پرۆژەو زینڎانی ئامەڎیشا ئارڎ ئاراوە و پی جۆرە ۋەردەوام بۍ: "گەرەکشابۍ جە ڕاو ستەم و زۆردارییوە سەرمەشقەکا ناچار بە ۋۍ دای دەسۊی کەرا و دمایی بەکۊشیای بارا. چا قۆناغېنە کەمال پیر، خەیری دورموش، عەلی چیچەک و عاکیف یەڵماز دژ بە خەتەو ۋۍ دای دەسۊی دەسشا بە مدرامانی کەرڎ. قەرارو مدرامانو مانگرتەی جە ۋاردەی ڕۊو ١٤و تەمووزی جە داڎگانە ئەرەیاۋیا. چی ڕېۋە هەم هەواڵو مدرامانەکەی یاۋا بە بەری و هەمیچ یاۋا بە هۆڵەکا تەرو زینڎانی. هۆڵەکۍ زینڎانی پەیۋەسۍ نەبېنۍ پۊ یۊترینیۊ. جە ئامەڎ نزیک بە ٣ هەزار کەسۍ زینڎانی کریېبېنۍ. چنی ئەرەیاۋناو قەرارەکەی جۆش و خرۆش کۊت دلۍ زینڎانی و دەوڵەت دەسەو دامان مەنۊ و نەزانۍ چېش کەرۊ".

هـ . ش