سەرو داواو دەوڵەتو تورکی و بە ئاسانکاری پەدەکەی جە چن مزگیېوە شارو هۊلێرینە زۋان و وتارەو نماو جومعەی جە کورڎیۊ فاڕیۊ پۍ تورکی، ئینەیچ جە وەختېنە ژمارەو نما ۋەناو تورکی جە بڕۍ چا مزگیانە جە پەنجەکا دەسی کەمتەرېنۍ.
بە پاو زانیاریەکا ئاژانسو هەواڵی فورات (ANF)ی جە مزگی تەنورچیانی کە گنۊنە گەرەکەو تەعجیلی جە شارو هۊلێری ماوەو چن سالێوەن بە زۋانی تورکی وتارەو جومعەی پێشکەش کریۊ بە بەهانۍ بیەو تورکومانا چا مەنتیقەنە، بەڵام بەپاو گوزارشتەو یاۋنەری تورکومانەکا شارو هۊلێری ئا کەسۍ کە بەشڎاری جە وتارەو ئا مەزگیەینە مکەرا ژمارەشا جە پەنجەکا دەسی کەمتەرا.
حەر بەپاو زنیاریەکا ئاژانسەکەیما دەوڵەتو تورکیای نیگەرانا چانەی کە هاموڵاتیۍ شارو هۊلێری بە تایبەتی تورکمانەکۍ بەشڎاری مەکەرا جە وتارەو جومعەینە چا مزگیەنە، چن جارێوە جە ڕاو ( پەدەکە)یوە بەرەی تورکومانی داواشا جە هاموڵاتیا کەرڎەن بەشڎاری وتارەو جومعەی چا مزگیەنە کەرا، بەڵام حەتا ئیسە ژمارەو بەشڎاربیا جە ژمارەو پەنجەکا دەسی کەمتەرا. هاموەخت پەیامنێرو ئاژانسەکەیما ئانەیچش زانان کە جە ماۋېوە نزیکەنە مزگی شافعی- شارو هۊلێری ئاڎیچ زۋان و وتاردایش جە کورڎیوە فاریۊ پۍ زۋانی تورکی.
جیا چانەیە دەوڵەتو تورکی و تورکەمانەکۍ سەر پا دەوڵەتیە داواشا جە پەدەکەی کەرڎەن کە مزگی سەر قەڵاو هۊلێری ڕادەسو ئاڎیشا کریۊ و بەزۋانی تورکی وتارەش چنە ۋنیۊوە، پارتی و ئیدارەو هۊلێری لاریشا نەبیەن چا داواکاریەو دەوڵەتو تورکیای، بەڵام خۊتانکەرڎەی موڵكی مزگیەکەی گېڵۊوە پۍ خانەواڎېوە شارو هۊلێری کە ئاڎۍ ڕاگیریشا کەرڎەن ئا مزگیەی کە گنۊ سەرو قەلاو هۊلێری ڕادەسو تورکیای کریۊ.
دەوڵەتو تورکی بە بەهانۍ بیەو تورکومانەکا جە پانیشتوو کورڎسانی و عێراقی دەسوەردایۍ فرە فراوان و بۍ ئەنڎازە جە هەرمان وکاری ئیداری و سیاسی عێراقی و هەرێمو کورڎسانی مکەرۊ، ماوەو ١٠ ساڵا ۋیەرڎەینە ئا دەوڵەتە بە هەزاران ئەنڎامېش جە بەرەی تورکمانی بەرڎېنۍ پۍ تورکیای پۍ پەرورڎەی چەکڎاری، دماو تەمام بیەیشا گېڵنېنێشۊ پۍ عێراقی، پېسە باڵی سەروازی و جاسوسی (میت )ی جە عێراق و هەرێمو کورڎسانینە مژیۋا.
جە دماین قسۍ ۋېچشەنە سەبارەڎ بە گەشمەرڎەبیەو حوسین ئارسانی کۆمیتەو پېوەنڎیەکا جبەرو کەجەکەی ئاماژەش بە دەورو یەرە کوچکەی تاوانکاری میتی و پەدەکەی و بەرەی تورکمانی کەرڎەبۍ کە دەسشا هەن جە گەشمەرڎەکەرڎەو کورڎانە، هۊلێر و کەرکوکی پېسە پەناگەی بەکار مارا.
هـ . ش
