جە شارو ڕەوانسەری کە بە ”دەروازەو هەورامانی“ نامبانگش بەرکەردەن هەمامەو وەیوە ۋارانێ (ئاوەزینی) ڕێکوزیا.
جە هەمامەکەنە، ژمارێوی فرێ هاموڵاتیێ و زاروڵێ شارەکەی بەشداریشان کەرد و جە میانشەنە چەنڎین چالاکیێ فەرهەنگیێ، هونەریێ، نەریتیێ و وێوڵەۋارانێ ئەنجامێ دریێ.
ڕێکوزێ هەمامەکەی ئاشکراشان کەردەن، ئامانج جە ڕێکوستەی هەمامەکەی، کێشای سەرنجو هاموڵاتیان بەگردی و زارۆڵان بە تایبەتی پەی بابەتو کەم ئاۋی و وشکساڵین تا بیاوانە ئاۋی چەنڎە گرنگەنە. هەرپاسە واتەنشان؛ بە مەبەست هەمامەکەشان جە سەراوو ڕەوانسەریەنە ئەنجامدان کە ڕووبەڕوو وشکبییەی بیەنەوە تا زیاتەر هاموڵاتیێ و زارۆڵێ پەی بە گرنگی بابەتەکەی ببەرانێ.
یاگۍ ویروستەیەن، سەرچەمەو شارو ڕەوانسەری، جە زنجیرە کەشەکانو شاهۆو هەورامانی هۆرمەقۆڵیۆنە و جە ڕەوانسەر گۆماۋێوە گەورە پێکماوەرۆنە کە چنەشەوە ڕڤارێو بە نامێ ڕەوانسەری یان خۆرە سوی سەرچەمە مەگێرۆن کە بە هەڵە بە قەرەسو نامێش مەبریۆنە و درێژیەکەش ١٧٠ کلیۆمەترێن و دماتەر تێکەڵ بە ڕڤارو گاماسیابی مەبۆنە.
ئێساڵ، سەرچەمەکە و هەرپاسە ڕڤارەکە بەهۆکارگەلێ چوون، کەم ۋارانی و وشکەساڵی سات بەسات ڕوو بە وشکبیەی لۋێ و دەرنجام جە کۆتایی هامنییەنە بەتەمامی وشکشان کەرد.