فەرماندەو گرڎینو قەسەدەی مەزڵووم عەبدی و هامسەرۆکۊو فەرمانگەو پەیوەندییەکا جبەرو ئیدارەو ۋېڕاوەبەری ئیلهام ئەحمەدە چنی وەزیرو جبەرو فەڕەنسای ژان نوێل بارۆی و سەرۆکو هەرێمو کوردەسانی نێچیرڤان بارزانی، کوۍ بیێوە.
فەرماندەو گرڎینو قەسەدەی مەزڵووم عەبدی و هامسەرۆکۊو فەرمانگەو پەیوەندییەکا جبەرو ئیدارەو ۋېڕاوەبەری ئیلهام ئەحمەدە شارو هەولێرو پانیشتوو کوردەسانینە، چنی وەزیرو جبەرو فەڕەنسای ژان نوێل بارۆی و سەرۆکو هەرێمو کوردەسانی نێچیرڤان بارزانی، کوۍ بیێوە.
وەزیرو جبەرو فەڕەنسای ژان نوێل بارۆ ستایشو دەورو قەسەدەیش جە وەرەنگاربیەیۆ تیرۆرینە کەرد و ئەرەیاۋناش، پەنەوازا گرڎ جۊرە پاڵپەشتیێوە پەی ئی هێزەیە مەیسەر بکریۆ تا جەنگ دژو چەتەکا "داعش"ی بەردەوام بۆ، سەقامگیری و ئەمنیەتو سووریای بە گرڎیی بەهێز بکریۆ. وەزیرو فەرەنسای جەختش سەرو بەشداری کوردا و گرڎو پێکئامایەکا سووریای جە پڕۆسەو سیاسی ڕاوەبەردەی وڵاتینە کەرڎۆ، کە سووریای بیېاونۆ بە سەقامگیریێوە سیاسیی، ئەمنیی و ئابووریی و واوەی بنیاڎنیایۆ وڵاتی.
جە گلېرۆبیەی چنی نێچیرڤان بارزانی، هەردووی لا گرنگیشا بە یەکڕیزی کوردی دا، پەیلوای دەربارەو ئاژەو سووریای و ئاژەو کوردا تاوتوێ کریۍ، پاڵو ئانەیچەنە ڕاکۍ ڕووبەڕووبیەیۆ هەڕەشەکاو داعشی و تیرۆریسا گفتوگۆشا سەر کریا، نێچیرڤان بارزانی پاڵپەشتی ۋێش پەی ڕاوەبەردەی کۆنفرانسی نەتەوەیی کوردی جە ۋەرنیشتەنە بەیان کەرڎ.
ئایندەو سووریای و پەیوەندییەکا بەینو قەسەدەی و دەسەڵاتو دیمەشقی، بەتایبەت دماو ڕێککەوتەکەو مەزڵوم عەبدی و ئەحمەد شەڕعی کە ئیمزاشا کەرڎەن، گفتوگۆشا سەر کریا.
جە گلېرۊبیەکانە جەخت سەرو پەنەوازی بەشداری کوردا و گرڎو پێکئامایەکا سووریای جە پڕۆسەو سیاسی و دڵنیابیەی جە مافە دەستوورییەکاشا کریاوە، هەرپاسە ڕێکۍ عالتەرکەردەی ئاژەو ئابووری جە هەرێمەکاو سەرنیشت و ۋەرکۊتوو سووریای تاوتوێ کریۍ.
