وەزیرو چبەرو فەرەنسای، ژان نوێل بارۆ دماو گلێرۆبیەیۆیش چنی فەرماندەی گرڏی هێزەکا سوریاو دیموکراتیکی (قەسەدە) مەزڵوم عەبدی، ئەرەیاوناش کە مشۆم ماف و بەرژەوەندییەکێ کوردا بە تەمامەتی وەرچەم گیریانە.
بارۆ سەرو هەژمارو وێشەنە جە تۆڕو کۆمەڵایەتیی ئێکسینە وێنەو گلێرۆبییەکەیش چنی مەزڵوم عەبدی وەڵاکەردۆ و واتش: "چنی فەرماندەی گرڏی هێزەکا سوریاو دیموکراتیکی ژەنڕاڵ مەزڵوم، دە ساڵێن شان بە شانو یۆتری دژو داعشی جەنگ کەرمێنە".
بارۆ ئەرەیاوناش جە پرۆسەو فاڕیایۆ جە سوریانە مشۆم ماف و بەرژەوەندییەکێ کوردا بە تەمامەتی وەرچەم گیریانە.
هەرپاسە بارۆ وێنەو گلێرۆبییەکا وێش چنی سەرۆکو هەرێمو کوردەسانی نێچیرڤان بارزانی، سەرۆکو پارتو دیموکراتو کوردەسانی (پەدەکە) مەسعود بارزانی، سەرۆکوەزیرانو هەرێمو کوردەسانی مەسرور بارزانی، سەرۆکو یۆبییەو نیشتیمانیی کوردەسانی (یەنەکە) بافڵ تاڵەبانی، وەڵا کەردۆ.
وەزیرو چبەرو فەرەنسای، ژان نوێل بارۆ، واتش: "فەرەنسا پەی ئازادی و وەرەنگاربییەیۆ تیرۆریزمی پەشگیریی تەمامو کوردا عێراقی مکەرۆ".
