گلێرۆبییەکەینە پەڕلەمانتارو پارتو سووری؛ بیۆرنار مۆکسنێس، هێگێ بای نیهۆڵد و سەحەر ئایدار، سۆڵیدارێتی مەد کوردستان، نوێنەرێ نەجەدەکەی و وەرپرسێ ڕێکوزیاکا وەرنیشتی، پانیشتوو وەرکەوتوو کوردەسانی بەشدارێ بیێ.

گلێرۆبییەکەینە بابەتەکێ گۆشەگیری ڕەهاو ئیمراڵی، هەوڵدایەکێ پرۆسەو چارەسەری و بانگەوازو ئاشتی وسیا رۆژەڤۆ.

قسەکەردەی سەرەتا جە لایەنو پارێزنەرو نوسینگەو یاسایی سەدەی و هامکات پارێزنەرو ڕابەر ئاپۆی، ئیبراهیم بیلەمەزیۆ کریا، بیلەمەز ئاشکراش کەرد سیستەمو گۆشەگیری ڕەهاو ئیمراڵی جا کاتۆ کە ڕابەر ئاپۆ بە پیلانگێڵی مییاننەتەوەیی ڕادەسو تورکیای کریا تاوەکو ئیسە بە پەشتیوانی هێزە مییاننەتەوەییەکا بنیادنریان. ئیبراهیم بیلەمەز دەستنیشانش کەرد جارۆنە نەک بە تەنیا سەرو ڕابەر ئاپۆی، بەڵکوم جە سەرانسەرو کوردەسانینە سیاسەتو گۆشەگیری بریۆڕاوە.

ئیبراهیم بیلەمەز هەرپاسە سەرنجش وست سەرو وەڵکەوتەکا ئیسەی و پێسەو چارەسەری دووەمی نامێش ئارد و واتش: "گرڏو ئا وەڵکەوتا بەرمەبناو پرۆسەو چارەسەری ئامان ئاراوە پێشئامێ فرە گرنگێنێ."

بیلەمەز ئاماژەش پانەیەدا دماو ئی وەڵکەوتا بەینوو ڕابەر ئاپۆی و شاندو ئیمراڵیی دەم پارتیی چەمپنکەوتەی ئەنجام دریا و ڕابەر ئاپۆیج پەیامش دا 'تاوۆنە پرۆسەکە جە زەمینەو جەنگیۆ فاڕونە پەی زەمینەو سیاسی و یاسایی'.

ئیبراهیم بیلەمەز جە قسەکاشەنە دەستنیشانش کەرد بانگەوازو 'ئاشتی و گلێرگەو دیموکراتیک'ی ٢٧و شوباتی ڕابەر ئاپۆ جە تەمامو کوردەسانی و وەرکەوتوو دلێڕاسەینە دەنگش داوە و خاوەنداریش ونە کریا.

دماتەر پارێزنەرو نوسینگەو یاسایی سەدەی و هامکات پارێزنەرو ڕابەر ئاپۆی، جەنگیز یورەکلی پەیوەس بە کاروەدایەکا دەسەڵاتداری و ئۆپۆزسیۆنی جە تورکیانە نموونێوە ڕۆشنش ئارد ئاراوە و واتش، پەنەوازا گلێرگەو مییاننەتەوەییچ سەرنج وسا سەرو پرۆسەکە.

حەر جە گلێرۆبییەکەینە پەڕلەمانتارو پارتو سووری، بیۆرنار مۆکسنێس باسش چانەیە کەرد بە وردی ئاگادارو پرۆسەکەینێ و بانگەوازەکەو ڕابەر ئاپۆی بە گرنگ وینانە، حەر جە قسەکاشەنە مۆخنیس بە بەربڕییەو 'چ جۆرە هامکاریێتا جەنەما گەرەکا'

دماتەر ئیبراهیم بیلمەز جە جواب و بیۆرنار مۆکسنێسینە واتش، 'پەرسەو کوردی بییەنە بە پەرسێوە مییاننەتەوەی' و دەستنیشانش کەرد چارەسەرو گرڏو بەشەکا گلێرگەی پەیوەسا بە پەرسەو کوردیۆ و جە درێژە قسەکانە واتش: "پەی گرڏو ئا هامکارییا کە چوارچێوەو پرۆسەکەینە کریۆنە سوپاسگوزارێنمێ و هیواڏارێنمێ هامکاریییەکێ زیاتەرێ بانە."

گلێرۆبییرکەینە بە گفتوگۆی کریاوە بەینو بەشداربییەکا و سوپاسکەردەی دمایش ئاما.

قەرارا پارێزنەرێ ڕابەر ئاپۆی جە چوارچێوەو سەردانەکەیشانە جە ئۆسلۆ بەشداری بڕێ چالاکیێ تەرێ بانە.