فەرماندەی گشتیی قەسەدە مەزڵووم عەبدی و هاوسەرۆکی فەرمانگەی پەیوەندییەکانی دەرەوەی ئیدارەی خۆبەڕێوەبەریی ئیلهام ئەحمەد لەگەڵ وەزیری دەرەوەی فەڕەنسا ژان نوێل بارۆ و سەرۆکی هەرێمی کوردستان نێچیرڤان بارزانی، کۆبوونەوە.
فەرماندەی گشتیی هێزەکانی سووریای دیموکراتیک(قەسەدە) مەزڵووم عەبدی، هاوسەرۆکی فەرمانگەی پەیوەندییەکانی دەرەوەی ئیدارەی خۆبەڕێوەبەریی ئیلهام ئەحمەد لە شاری هەولێری باشووری کوردستان، لەگەڵ وەزیری دەرەوەی فەڕەنسا ژان نوێل بارۆ و سەرۆکی هەرێمی کوردستان نێچیرڤان بارزانی، کۆبوونەوە.
وەزیری دەرەوەی فەڕەنسا ژان نوێل بارۆ ستایشی ڕۆڵی قەسەدە لە بەرەنگاربوونەوەی تیرۆردا کرد و ڕایگەیاند، پێویستە هەموو جۆرە پشتگیرییەکان بۆ ئەم هێزە دابین بکرێت تا شەڕی دژی چەتەکانی "داعش" بەردەوام بێت، سەقامگیری و ئاسایشی سووریا بە گشتیی بەهێز بکرێت. وەزیری فەرەنسا جەختی لەسەر بەشداری کوردان و هەموو پێکهاتەکانی سووریا لە پڕۆسەی سیاسی بەڕێوەبردنی وڵات کردەوە، کە سووریا بگەیەنێتە سەقامگیرییەکی سیاسیی، ئەمنیی و ئابووریی و دووبارە بونیادنانەوەی وڵات.
لە کۆبوونەوە لەگەڵ نێچیرڤان بارزانی، هەردوو لا گرنگییان بە یەکڕیزی کوردی دا، ڕا و بۆچوون دەربارەی دۆخی سووریا و بارودۆخی کوردان تاوتوێ کران، لە پاڵ ئەوەشدا ڕێگاکانی ڕووبەڕووبوونەوەی هەڕەشەکانی داعش و تیرۆریستان گفتوگۆیان لەسەر کرا، نێچیرڤان بارزانی پشتگیری گشتیی خۆی بۆ بەڕێوەبردنی کۆنفرانسی نەتەوەیی کورد لە ڕۆژئاوا دەربڕی.
داهاتووی سووریا و پەیوەندییەکانی نێوان قەسەدە و دەسەڵاتی دیمەشق، بەتایبەت دوای ڕێککەوتنەکەی مەزڵوم عەبدی و ئەحمەد شەڕع واژۆیان کردووە، گفتوگۆیان لەسەر کرا.
لە کۆبوونەوەکاندا جەخت لەسەر پێویستی بەشداری کوردان و هەموو پێکهاتەکانی سووریا لە پڕۆسەی سیاسی و دڵنیابوون لە مافە دەستوورییەکانیان کرایەوە، هەروەها ڕێگاکانی باشکردنی دۆخی ئابووری لە هەرێمەکانی باکوور و ڕۆژهەڵاتی سووریا تاوتوێ کران.
