بە سەرمەشقایەتی پارتو هەرێمە دیموکراتیکەکا (دەبەپە)ی و پارتو یەکسانی و دیموکراسی گەلا (دەم پارتی) گلېرۊبیەی 'پەی ئاشتی و ئازادی' ئەنجامدریا. جە گلېرۊبیەکەینە بە هەزاران کەسۍ جە شارەکا تەرو سەرنیشتوو کوردەسانیوە بەشدارۍ بیۍ، هەر جە گلېرۊبیەکەینە نوێنەراو پارت و ڕێکوزیا مەدەنییەکا بەشدارۍ بێنۍ.

جە گلېرۆبیەکەینە سەرەمڕە درووشمەکۍ "بژیۋۆ سەرۆک ئاپۆ"، "بێ سەرۆکی ژیۋای نمەبۆ" و "ژەنی ژیۋای ئازادی" بە جۆشو خرۆشێوە گەرم و گوڕۆ وچیێوە.

جە گلېرۊبیەکەنە داواو ئازادی ڕابەر ئاپۆی کریا، هەرپاسە ژەنی بە جلوبەرگی زەریفو کوردییوە بەشداریێوە عالشا بۍ. جە گلېرۊبیەکەینە لافیتۍ "پەی ئاشتی و ئازادی کوۍ بیێنمێوە" و "بژیۋۆ مڎرامانوو زینانیا" بەرزۍ کریێوە. پەی ڕاگېرتەی جە ئەڎایا ئاشتی کە بە سەرپۊشی چەرمەشاوە بەشدارۍ با، پۆلیسو دۊڵەتو تورکی ڕاگیری و کۊسپش وەشکەرڎ، بەڵام بە ئیرادەو گەلوو گلېرۊبیەکەی کۊسپەکۍ پۆلیسی مەڕیۍ و ئەڎایا ئاشتی بەشداری گلېرۆبیەکەی بیۍ و پێشوازی گەرمشا چنە کریا.

گلېرۊبیەکەی بە دەیەقێوە ڕێزگېرتەی دەسش پنەکەرڎ و دماتەر هونەرمەڼ قادر چات بە پێشکەشکەردەی هونەرەکەیش گلېرۊبیەکەو گەلیش بە جۆشتەر کەرڎ. دماتەر بە نامۍ کۆمیتەو ئاماڎەکارو گلېرۊبیەکەیۆ، ئەموروڵا شام قسېش کەردۍ و واتش: "با حیچ کەسێ نەمرۆ، ویست و ئامانجو ئێمە ئاشتی و ئازادییا."

دماتەر هامسەرۆکۊو مێرسینو دەم پارتی بەدرییە کوشە مافو قسەکەردەیش هۊرگېرت و سەرەڕاو سڵام کەردەی جە ئاماڎەبیا گلېرۊبیەکەی واتش: "مشۊم ئەنقەرەی ناچاربکەرمۍ دەنگ و داواو ئاشتیما بژنەوۆ."

دماتەر واتەواچەو ئەنجومەنو ژەنا دەبەپەی، بێریڤان باخچەچیە بەنامۍ تەژەئایۆ قسێش کەردۍ و ئاماژەش بە گرنگی ئا پرۆسەیە کەرد کە ڕابەر ئاپۆ دەسش پنەکەرڎەن و جەختش کەرڎۆ چانەی پېسە ژەنا کە جە گرڎ کەسۍ زیاتەر قوربانیشا پەی بەدیئامای ئاشتی کۆمەڵایەتی دان، ئینۍ چنی نەخشە ڕاو چارەسەرییەکەو ڕابەر ئاپۆی.

دماتەر هامسەرۆکو گرڎیی دەبەپەی، کەسکین بایندەر قسێش کەرڎۍ و جە قسەکاشەنە سڵامش ۋنەو حازریا کەرڎو جەختش چانەیە کەرڎۆ کە گرڎ پەی ئارڎەی ئارای ئاشتی ئینۍ چۍ، کەسکین جە بەردەوامینە دەسنیشانش کەرڎ قۆناغەکۍ پەی گەلوو کوردی فرە گرنگەنە، جە ئیساتێنە گەلوو کوردی جە گرڎ کاتۍ زیاتەر نزیکتەرا جە یاوای بە ئامانجو ئازادی ۋێش.

جە بەردەوامینە کەسکین بایندەر واتش: "ئېژا ئۆجالان ئاماڎەکاری پەی چارەسەری مکەرۆ، کەچی دەسەڵات ئینا ئاماڎەکاری ئۆپەراسیۆنو قڕکەردەی سیاسینە. گەلوو کوردی و دۆسەکېش ڕا نمەڎا بە ئۆپراسیۆنە جەنگەرانیەکا دەسەڵاتی. جە گرڎ کات و شۊنێنە ئاشتی و ئیرادەو ئازادی بە ڕێکوستەی مکەرمۍ. ڕۆ ڕۆو ئازادییا. کاتو ئانەین ئەرەپڕمۍ تا مسۆگەرکەردەی ئازادی جەسەیی ئېژا ئۆجالانی جە ئەوەکۊشاینەبیمۍ. سەرکۊتەی ئینا دەسمانە. سەرکۊتەی سەرکۊتەی سەرکۊتەی."

تولای حاتەم ئۆغۆللاریە: ویستما وڵاتێوە ئازاڎ، دیموکراتیک و ئاشتیوازا

جە دمادمایی پێشکەشکەردەی پەیامو گلېرۊبیەکەینە، هامسەرۆکۊو گرڎینەو دەم پارتی تولای حاتەم ئۆغۆللاریە مافو قسەکەردەیش هۊرگېرت، تولایە سەرەتا سڵامش جە حازریا گلېرۊبیەکەی بە گرڎیی و ئاماڎەبیەو ئەڎایا ئاشتی  بەتایبەت کەرد.

جە بەردەوامینە تولایە یاڎو ڕۆنامەوانا ئەرەیاۋنای ئازادی، عەزیز کۆیلوئۆغلو، جیهان بیلگینۍ و نازم داشتانیش کەرڎۆ، کە گرڎ جە هرووژمی ئاسمانی دۊڵەتو تورکی ئەرەگیرینە گەشمەرڎۍ بیۍ.

هەر جە پەیامەکەشەنە تولایە باسش چانەیە کەرڎ، بە هیواو ئانەینۍ جە دماو پەیامو ڕابەر ئاپۆی پەی ئاشتی وەڵێکۊتەی بۍ ئاراوە و پی جۊرە بەردەوامە بیە: "بەردەوامۍ بیمۍ جە پاڵپەشتی پەی وەڵێکۊتەی پرۆسەکەی، جە ٤٢ مېیانانە چنی گەلی کوۍ بیێنمێوە. چی پرۆسەنە باوەڕی تەمامما بە ۋێما و ئېژا ئۆجالانیا."

تولایە پېسە دمایش بە قسەکاش ئارڎ: "بە نامۍ ئاشتی، ئازادی، یەکسانی و دادپەروەرییوە سڵام و حورمەتو ۋێما کېیانمۍ پەی ئیمراڵی. پەی ئاینڎەو زاوڵەکاما ئاشتیما گەرەکا. چېوە قەولو ئاشتی مڎەیمۍ. وڵاتێوە ئازاد، دیموکراتیک و ئاشتیانەما مەتڵەبا."

گلېرۊبیەکەی بە واتەیۆ درووشما دمایش پنە ئاما.