بەپاو ئامارێوە جە مانگەو بەفرانباروو ئێساڵینە لاوکەمیۆ ٤٧ حاڵەتۍ کوشتەی یاخوڎ ناچارکەردەی بە ۋۍ کوشتەی ژەنا و کناچا جە ئێران و ۋەرکەوتوو کوردسانی تۆمار کریێنۍ.
زاڵبیەی ئەقڵیەتوو پیا سالاری جە گلېرگەکەنە کە دەسەڵاتی سیاسی بە تەمامی پەشتیوانی چا ئەقڵیەتەیە کەرۆ پاسەشکەردەن ئامارەکاو کوشتەی و ناچارکەردەی ژەنا و کناچا بە ۋۍ کوشتەی جە ئێران و ۋەرکەوتوو کوردسانی بە بەرزی مەنۊوە.
بەردەوامی تنوتیژی جەستەیی، رەگەزی، دەرونی، کوشتەی و ناچارکەردەی ژەنا بە ۋێکوشتەی پېسە قۊرتێوە سەرەکی و ئاستەنگێوە ۋەروودەم و چەسپنای گلېرگەی ئازاڎ و دیموکراتیکی جە ئێرانەنە منریۊرە. ژەنا قوربانی یووەم، یاخوڎ ئامانجی یووەموو ئەقڵیەتی پیا سالارانەو دماکۊتەو گلېرگەین. ئانەی پاڵنەر و مایۍ ئاستەیۆ و بەقوەت بیەی ئا ئەقڵیەتەیە خودوو دەوڵەتی و یاساکا ئا دەوڵەتانە و پرسوو ئا تنوتیژی و کوشتارەی دژوو ژەنا ئەنجام مڎریۆ جە ئاستێوە کارەساتبارەنە بەرزبیەنۆ.
جە ۋەران ۋەروو ئا فشار و کوشتارەینە دژوو ژەنا ئینا ئارانە، کۊشیای ژەنایچ بە شێوێوە جیاجیا بەردەواما و ئا کۊشیایە جە ماوەکا ۋیەردەینە جە چوارچێوەو ئاخێزوو" ژەنۍ، ژیۋای، ئازاڎیی"نە یاوا قولەپۊپە و جە ئیسەیچەنە بە شێوەی جیاجیا بەردەواما.
ئاژانسوو ژن نیوزی جە گوزارشتێوەنە پۍ وستەی ڕوو ئاژەو ژەنا و ئا تنووتیژیەی ۋەران ۋەرشا کریۆ، ئامارەو تایبەت بە مانگەو بەفرانباریش وەڵاکەردۆ.
بە پاو ئامارەکا جە ماوەو ئا مانگەینە لاوکەمیۆ ٣٢ ژەنۍ جە ئێران و ۋەرکەوتوو کوردسانینە کوشیێنۍ. چا ژمارەیە ٤ ژەنۍ جە قەنارە دریێنۍ، شش ژەنۍ و دووۍ زارۊڵێچ جە ئاکاموو مووشەکۋارانوو بەینوو ئێرانی و پاکستانی کوشیێنۍ حەرپاسە زارۊڵێوە و ژەنێوەیچ بە تەقەو هێزەکاو دەوڵەتی کوشیێنۍ. ئەوێتەرۍ جە لایەنوو کەسوکار، هامسەر، هامسەری وەڵینیشا یا پیایا تەریوە کریێنۍ ئامانج و گیانشا جە دەسدان.
بە پاو ئامارەکۍ جە ماوەو ئا مانگێنە لاوکەمیۆ ١٥ ژەنۍ و کناچۍ کە ژمارێوە ۋەرچەمشا زارۆڵێنۍ بە مەڵامەتی جیاجیا ناچارکریێنۍ دمایی بە ژیوایشا بارا.
