جە پاوە گڵکۆو ”جەمال مورادی“ مامسا، شاعیر و پێشکەشکاری ۋلۋاران کریا

”جەمال مورادی“، مامسا، شاعیر و پێشکەشکاری پاوەیی کە ١٩/١٢/٢٠٢١ی بە مدرای دڵی کۆچی دماییش کەرد و بە مەراسیمی جەماوەری ئەسپەردە کریا، بە مەڕاسیمی تایبەت گڵکۆوکەش ۋلۋاران کریا.

جە  مەزارگاو حاجی پاوەی، گڵکۆو”جەمال مورادی“، مامسا، شاعیر و پێشکەشکاری پاوەیی کە جە ڕێککەوتو ١٩/١٢/٢٠٢١ی بە مدرای دڵی کۆچی دماییش کەردەبێ و بە مەراسیمی جەماوەری ئەسپەردە کریابێ، بە مەڕاسیمی تایبەت ۋلۋاران (گۆڵۋاران) کریا.
جە مەڕاسیمەکەنە کە ئەجومەنو ئەدەبی مەولەوی ڕێکوستەبێ، ژمارێوی فرێ کەسایەتیێ ئەدەبیێ و ڕۆشنویرێ و هاموڵاتیێ هەورامانی و کوردستانی ئامادێ بیێ و بە پێشکەشکەردەی چەنڎین وتارێ، باسێ، پارچە شیعرێ و پەخشانێ و چالاکیێ هونەریێ ڕێز جە کۆچکەردەی گیریا و ستاییشو کۆشای و هەرمانە هونەری، ئەدەبی و فەرهەنگییەکانش کریا.

یاگۍ یادئاوەریەن، نیمەڕۆدماو یەک شەممەی ١٩/١٢/٢٠٢١ی، جە شارو پاوە-و هەرێمو هەورامانی ”جەمال مورادی“، مامسا، شاعیر و کەسایەتیی فەرهەنگیی و نامیی هەورامانی و کوردستانی کۆچی دماییش کەرد. 
بە ئا جۆرە وەڵاوکریاوە، هۆکارو کۆچکەردە کتوپڕکەی مدرای دڵی بییەن و وەڵتەر مامسا مورادی هیچ نەوەشیێش نەبییەن.
مورادی خەڵکو دەگاو کۆمەدرەو سەر بە شارستانو پاوەیەن و زیاتەر جە ٣٥ ساڵێ بێ کە ئەرەنیشتەو پاوە شاری بێ. کۆچکەردە سەرەڕاو مامسایی و فێرکەردەی و بارئاوردەی، سەرقاڵ بێ بە نویستەی، شیعرێ و پێشکەشکاری جە بۆنە جیاجیاکانە و جە ئا  بوارانە خزمەتی فرەش بە زوان و فەرهەنگ و پەروەردە و بارئاوەردەی جە هەورامان و کوردستانەنە کەردەن.
تەرمو مامسا جەمال مورادی بە راوڕەسمێوی شکۆمەند کە هەزاران کەسێ جە خەڵکی و شاعیرا و نویسەراو پاوەی و هەورامانی کوردستانی بەشدارێش بێنێ، جە گۆڕستانو حاجی پاوەی ئەسپەردە کریا.

نمائیم . وێنەکێ جە (پاوەپرێس)ی هۆرگێریێنۍ