هەپەگە زەردەشت ئاگریش بەڕێزو ئیحترامۊ یاڎکەرڎۊ و ئەرەیاۋناش، "هامڕاما زەردەشت جە خنێرۊ حەتا زاپ، جە قەندیلۊ حەتا دێرسیم، جە بەحری سیاۋۊ حەتا گارە ٢٢ ساڵۍ سەرو خەتەو گیانبازی کۊشیایۍ ئەفسانەییش ڕاوەبەرکەرڎ".
ناوەنڎو یاۋنەری و چاپەمەنی هەپەگەی پی جۊرە زانیاریش دان:
"فەرمانڎەی چنەویەرڎەی ئاپۆیی هامڕاما زەردەشت ئا وەختەی جە فەرمانڎەیی هەرێمو گارەینە ئەرکداربۍ، جە ٤و تشرینو یوۋەمو ٢٠٢٢ جە ئاکامو هجومېوە دوژمنینە گەشمەرڎەبی. هامڕاما زەردەشت جە خنێرۊ حەتا زاپ، جە قەندیلۊ حەتا دێرسیم، جە بەحری سیاۋۊ حەتا گارە ٢٢ ساڵۍ سەرو خەتەو گیانبازی کۊشیایۍ ئەفسانەییش ڕاوەبەرکەرڎ. داوا و ئاواتەکۍ کۊشیای هامڕا زەردەشتی پۍ هامڕایاش بۊ بە نمونە، ئا ئامانجۍ کە بە گیانبازییوە کۊشش پۍ کەرڎۍ بە دڵنیاییوە مەیا دی.
سەرەوەشی جە خانەواڎەی بەڕێز و هامڕا زەردەشتی و خەڵکی ۋڵاڎپارێزو ئەلباکی و تەمامو گەلوو کورڎسانی مکەرمۍ.
زانیاری جەبارەو شناسنامەو هامڕا زەردەشت ئاگری پی جۊرەنە:
ناسنامۍ: زەردەشت ئاگر
نامۍ و دمانامۍ: ئایڤاز بەیاز
یاگۍ جە ئەڎابیەی: وان
نامۍ ئەڎۍ و نامۍ تاتەی: شارستانە- کازم
وەخت و یاگۍ گەشمەرڎەبیەی: ٤و تشرینو یوۋەمو ٢٠٢٢/ گارە
هامڕا زەردەشت ئاگر ساڵەو ١٩٨٤ی جە دەگاو خۊکانێی مەنتیقەو ئەلباکی وانی جە ئەڎۍ بیەن. ساڵەو ١٩٩٩ی مەتیەزېوەش مەنتیقەو قەلقەلی وانی و ساڵەو ٢٠٠٧یچ مامۊزېوەش جە بۊتان گەشمەرڎۍ بیېبێنۍ. جە وەران ۋەرو پیلانگێڵی میان نەتەوەیی دژ بە رابەر ئاپۆی و پۍ پوچکەرڎەیۊ ئامانجەکا ئا پیلانگێڵییە ساڵەو ٢٠٠٢ ئاما دلۍ ریزەکا گەریلای.
جە خنێرە پەروەردەی سەرەتاییش ۋینا. دوۋۍ ساڵۍ خنێرەنەبۍ، جە دمادماییەکا ساڵەو ٢٠٠١ینە لوۋا دلۍ ریزو هێزی تایبەتی پۍ ئانەی بۊ بە گیانبازێوە ئاپۆیی. حەتا ساڵەو ٢٠٠٦ جە قەندیلۊ حەتا زاپ جە فرەو مېڎانەکا هەرێمەکا پارېزناو مەدیای وەرپەرسیاری جیاجیاش جە ئەستۊ گرت جە گرڎ کارێۋەنە سەرکۊتەیش بە بنەما گرت و حۊلش پۍ دا.
ساڵەو ٢٠٠٦ هامڕا زەردەست پڕاوە پۍ سەرنیشتوو کورڎسانی و حەتا ساڵەو ٢٠٠٩ ی جە دێرسیم بەشڎاری چنڎین چالاکیاش کەرڎ. ساڵەو ٢٠٠٩ حەتا ٢٠١٢ جە مەنتیقەو بەحری سیاوینە بۍ، دماتەر گېڵاوە پۍ دێرسیمی و حەتا ساڵەو ٢٠١٥ ی دێرسیمەنە مەنۊ و دماتەر ڕوۋەشکەرڎە هەرێمەکا پارېزناو مەدیای. دماو تەمامکەرڎەو ئەکادیمیای سەروازی مەعسوم کۆرکمازی بەشڎاریش جە چالاکییەکا هێزی تایبەتیەنە کەرڎ و جە مېڎانە جیاجیاکانە ئەرک و وەرپرسیاریش ورگېرت و دماین وەرپرسیاریچش ئەنڎامیەتی دەسەی فەرمانڎەیی گارەی بۍ تا ئا وەختەی جە ئاکامو هجومېوە دوژمنینە جە ٤و تشرینو یوۋەمو ٢٠٢٢ گەشمەرڎەبی.
هامڕاما زەردەشت بە کەسایەتی خاکی و چنەویەرڎەی و دەروێشانەو ۋېش بەشڎاری جە گرڎ هەرمانېنە کەرۍ، جیا جیای نەکەرۍ جە بەینو هەرمانۍ گولانۍ و گۊرېنە، جە گولانەتەرین هەرمانەکا دلۍ ژیای ڕووانەیش حەتا چالاکی گەریلایی، جە گرڎ هەرمانېوەنە رەنج و مانیایی گۊرەش کێشا. هامڕا زەردەشت دلۍ بەحرو کۊشیای و پەکەکەینە ۋېش پېسە دڵۆپێوە پێناسە کەرۍ و حۊڵشدا دلۍ ئا بەحرەینە بە سەرکۊتەی ئەرکو ۋېش جابەجۍ کەرۊ".
هـ . ش
