جە هامنەهەوار و سەیرانگاو ویمیری، هاموڵاتیێ و ژیوگەپارێزێ شارو پاوە-ی کۆبیێوە و دژ بە شێونای و دلێنەبەردەی ژیوگەی، ناڕەزایەتیشان نیشانەدا و واتشان: تا دمایی ژیوگەی بپارێزنمێ و ڕا بە وێرانکەردەیش نمەڎێمێ.
جە هامنەهەوار و سەیرانگاو ویمیری سەر بە شارو پاوەی، دژ بە شێونای، پیسکەردەی، دلێنەبەردەی ژیوگەی بەگردی و ژیوگەو هامنەهەوار و سەیرانگاکەی، هاموڵاتیێ و ژیوگەپارێزێ شارو پاوە-ی و هەورامانی کۆبیێوە.
جە کۆبیەکەنە، بەشداربییەکێ ناڕەزایەتیشان نیشانەدا و داواشان جە دەسەڵاتدارانو ناوچەکەی کەرد؛ تا ڕاگیری جە ئا کەس و لایانە بکەرانێ کە پەی بەرژەوەندی کەسی وێشان چێرو نامێ جیاجیانە دەستشاندان وێرانکەردە و شێونای هامنەهەوار و سەیرانگاو ویمیری.
جەماوەری ناڕازی ئاشکراشان کەرد: ژیوگە و سروشت و سەیرانگایەکێ سەرمایە و سامانێ گردینێ و نمەکریۆن کەسانێ پەی بەرژەوەندی تایبەتی وێشان بەکارێشان باوەرانێ و دەرەنجامشەنە دلێنەببریانێ.
هامکات داوا جە هاموڵاتیانو ناوچەکەی کریا؛ تا زیاتەر وشیارێ بانێ و ژیوگەی پیسنەکەرانێ و هەوڵ پەی پارێزنایش بڎانێ.
جە کۆبیە ناڕەزایەتیەکەنە جە چەنڎ وەرپرسێ پاوە-ی ئامادێ بیێ، بەڵێنشان بە جەماوەری ناڕازیدا، داواکاریەکانشان وەرچەم بگێرانێ.
جە وەرانوەرەنە ئامادەبییەکێ بێپەراوا بە وەرپەرسەکانشان وات: تادمای ژیوگەی بپارێزانانێ و هەرگیز ڕا بە وێرانکەردەیش نەڎانێ.
