جەمیل بایک هامسەرۆکو کۆنسەو ڕاوەبەری کەجەکەی، سەبارەت بە پێشئامایەکا دماو داواکارییەکەو ڕابەر ئاپۆی، پەی ئاژانسو هەواڵو فوراتی قسێش کەردێ و ئەرەیاوناش کە سەرکۆتەو داواکارییەکەو ڕابەر ئاپۆی لکەدریان بە هەنگامەکا تورکیایۆ.

جەمیل بایک ئاماژەش پانەیەدا، پەی ئانەی کۆنگرە بەسیۆنە، مشۆم مەرجەکێ ئایێربەستەی جابەجێ کریانە و ڕابەر ئاپۆ تاوۆنە کۆنگرە بەرۆ ڕاوە و واتش: "جگە جە ڕابەر ئاپۆی کەسی تەر نمەتاوۆنە کۆنگرە بەرۆ ڕاوە و پۆکەی پەنەوازا گرڏ کەسێ ئینەیە بزانۆنە. چونکە ئا کەسەی ئی جمیەرەش ئەرەمەرزنا و پەرەش پنەدا ڕابەر ئاپۆ بێ. هەرپاسە تەنیا ڕابەر ئاپۆش متاوۆنە کۆنگرە بەسۆنە و قەرار سەرو کۆنگرەی دۆنە و ڕێنمایییەکا وسۆنە وەردەمو کۆنگرەی. پۆکەی بەبێ ڕابەر ئاپۆی، جەلایەنو ئێمۆ هیچ کەس، ڕاوەبەرایەتی پەکەکەی و کادرو پەکەکەی نمەتاوۆنە کۆنگرە بەسۆنە و دلێشەنە قەرار دۆنە."

جەمیل بایک ئەرەیاوناش؛ پەنەوازا دەرفەتو ئازادی و هەلومەرجو ئازادی جەسەیی ڕابەر ئاپۆی مسۆگەر کریۆنە و واتش: "مشۆم پەڕلەمان و گۆرەو تورکیای (TBMM) کۆمیسیۆن ئەرەمەزنۆرە و بڕێ جە یاساکا دەستووری هەموار بکەرۆ و سیستەمو ئیمرالی دمای پنە بارۆنە. ئەر مەرجو دەور و هەرمان کەردەو ئازادی پەی ڕابەر ئاپۆی دابین نەکریۆنە، ئانە پرۆسەی چەمەڕا نەکریا مەیاوۆنە ئەنجام و واتش، ئی پرۆسە ئینا بەرژەوەندی گرڏ لێوەنە و پەنەوازا ئی دەرفەتە تاریخییە بە خاسی ئیسفادەش چنە هورگێرانە .

مشۆم هێزە مییاننەتەوەییەکێ فشار وزا سەرو دۆڵەتو تورکیای هەنگامە بنیۆ

بایک ئاماژەش پانەیەدا پێشئامایەکێ دماو داواکارییەکەی جەە مێڏانو مییاننەتەوەیینە ئەرێنیێ بێنی، بەڵام مشۆن ئی هێزێ پەیوەس بە داواکارییەکەی جە ئەرەیاوناکاشانە، جە پراکتیکەنە ئەرک و وەرپرسیارێتی وێشا جابەجێ بکەرا و ئینەش واش: "چارەسەرو پرسو کوردی و دیموکراتیکبییەو تورکیای و وەرکەوتوو مییامینی تەنیا بە ڕابەر ئاپۆی، تەڤگەرو ئازادی کوردی و گەلوو کوردەواریۆ لگەدریا نییا. بەڵکوم گرڏ کەسێ مشۆم وەرپرسیارێتی هورگێرۆنە. وەرو ئانەی ئارۆ مییانو جەنگو جەهانی یەرەمی وەرکەوتوو مییامینین و چاکە ونی مچیۆنە. ڕابەر ئاپۆ گەرەکشا ڕاگیری چا ون متەیە گێرۆنە. گەرەکشا دیموکراتیکبییەی پەرەپنەدۆنە، ئینە جە چوارچێوەو بەرژەوندی گرڏ کەسێن. حەر پۆکەی پەنەوازا گرڏ کەسێ جە پراکتیکەنە هەنگامەی پەنەوازە بنیۆنە. پەی پێکئاردەو داواکارییەکەو ڕابەر ئاپۆی مشۆم گرڏ کەسێ ئەرک و وەرپرسیارێتی وێش جابەجێ بکەرۆنە. مشۆم داوا جە دۆڵەتو تورکی کریۆنە هەنگامە بنیۆنە.

جەمیل بایک جە بەردەوامی قسەکاشەنە سەرنجش وست سەرو بڕی مەترسیێ دەوروبەر و دۆسا پەیوەس بە پڕۆسەکەی. بایک ئاماژەش پانەیەدا، ئێشی فرە بییەن و دەسکەوتێ فرە گۆرێ بە دەسئامێنێ و هیچ کەسێ گەرەکش نییا ئی دەسکەوتێ لاوازێ کریانە و واتش، رابەر ئاپۆ ئی دەستپکەوتا پارێزنۆنە و زیاتەر وەڵێشا وسۆنە و پی جۆرە بەردەوام بێ : "ئیسە ڕەنگە بڕی کەسێ حەقیقەتو ڕابەر ئاپۆی خاس نەیاوانە و وەرو ئینەی بەمەترسیدار وینانەش. ئینە ئاساییا، بەڵام ئینانی چا باوەڕێنە چنی ویەردەو کاتی ئی مەترسیێ ڕەویاوە. وەرو ئانەی وەڵتەر دلێ گەلی چن جارێ ئی مەترسییێ ڕووەشادێنە و دماتەر بەرکەوتەن بەڕاسی ئی مەترسیێ بێ مەڵامەتێ بیێنێ. چونکە ڕابەر ئاپۆ گرڏ جارێ ئەوەکۆشای زیاتەرش پەرەپنەدان و فراوانتەرش کەردەن. حەر پۆکەی گەلوو دۆسەکێش متمانەی فرەشا بە ڕابەر ئاپۆی هەن. پێسەو ئانەی مادام ڕابەر ئاپۆ بڕێ هەنگامێ منیۆنە، هەرکاتێ جە چێوێ دڵنیا بۆنە ویرش چنە مکەرۆوە و خوڵقنۆنەش،. تاوەکو ئیسە فریوش نەواردەن."

جەمیل بایک داواش جە گرڏ کەسێ کەرد پەشتگیری داواکارییەکەو ڕابەر ئاپۆی بکەرا، خاوەندارێتیش چنە بکەرا و ئەرک و وەرپرسیارێتی وێشا جابەجێ بکەرا .

هورسەنگنایەکێ جەمیل بایکی پی جۆرەنێ:

"ڕابەر ئاپۆ مانیفێستۆو سەدەو ٢١یەکەمیش گیانا. بە ڕاسی مشۆم جە جەوهەرو ئی مانیفێستۆیە خاس یاومێنە. ئینە هەم ئێمە، هەم گەلەکەیشما گێرۆوە. هەڵبەتە هەوڵمڏەیمێ خاس جە ڕابەر ئاپۆی یاومێنە و پەیوەس پی پڕۆسەیە، ئەرک و وەرپرسیارێتی پڕۆسەکەی یاومێنە و جابەجێش کەرمێنە.

ڕابەر ئاپۆ گەرەکشا چەمکێوە کارا جە سۆسیالیزمەنە پەرە پنە بڎۆ

ڕابەر ئاپۆ پی مانیفێستۆ بڕۍ جە گرفتە سەرەکییەکا و چارەسەری ئی گرفتاشە وستەن ۋەردەمو گرڎ لایۍ. بە هۊرسەنگنای و بانگەوازییەکاش پېوەس پی مانیفێستەیۆ، دوور وستەیۆ پرسو کوردی جە جەنگی مەرامش ئانەنە جە ڕاو ڕامېیاری و دیموکراسییوە چارەسەر بکریۆ. ڕابەر ئاپۆ هەر جە سەرەتاوە تا ئیساتۍ بەردەوام هەوڵو چارەسەری پرسو کوردی مڎۆ. ئیساتۍ نیشانەو گرڎ لایێش دان کە چنی پرسو کوردی چارەسەر بۆ. پۊکەی نامێش نیان پارادایمو ئاشتی و گلېرگەی دیموکراتیکی.

هەرپاسە مۆدێرنیتەو سەرمایەداری دژو گەلا ۋەرکۊتوو مېیامینی دەسوەردایش کەرد. پی دەسوەردایچە ئەغلەبیەتو چێوەکا جە ۋەرکۊتوو مېیامینینە فاڕیایشا سەرەرە ئاما. ئینەیچ هەڵای بەردەواما. ڕابەر ئاپۆ کۊشش و گەلیش جە دژو ئا دەسوەردایا وەڵێوست. ئا ڕا و ئامرازێشە پێشکەش کەرڎۍ کە گەلاو ۋەرکۊتوو مېیامینی متاوا ۋێشا سەرو ئا بنەمایۍ ئازاڎ بکەرا و ۋەرکۊتوو مېیامینێوە دیموکراتیک بنیات بنیا. ڕوانگەو ئینەیچ پێشکەش بە گەلی کریا.

هەرپاسە پی مانیفێستهیە مەڵامەتەکۍ وڕای سۆسیالیزمی ڕئالی و بنەماکاو پەرەپنەدای چەمکی و ئەوەکۊشای سۆسیالیستیش جە یاگێشەنە ئاشکرا کەرد. سۆسیالیزمی ڕئال بە پلەی یووەم بە مەڵامەتوو دلېینەی وڕا. چانەینە مەڵامەتوو جبەریچ خێراتەرش کەردەبۆ. بەڵام مەڵامەتی سەرەکی ئی وڕایە دلېینە بۍ. بە چەمکو دۆڵەت، دەسەڵات و نەتەوە، هەرپاسە پەیوەندی بە چەمکو پارتەکەیشۆ پەیوەندیش هەن. ڕابەر ئاپۆ پی مانیفێستەیە گەرەکشا کاریگەرییەکاو سۆسیالیزمی ڕئالی نازۆ و چەمکێوە سۆسیالیستی ڕاس و کارامەتەر پەرەپنە بڎۆ. بە وڕنای سۆسیالیزمی ڕئالی جە یۊبیەی سۆڤیەتینە، ئا حکومەت و پارت و ڕێکوزیۍ کە سەرو بنەماو سۆسیالیزمی ڕئالی پێکئامێ بێنۍ، گرڎ هۊرشێویێوە.

چنی متاویۆ چەمکێوە سۆسیالیستی دروستتەر و کارامەتەر پەرەش پنە بڎریۆ؟ هەر چا چوارچێوەنە ڕابەر ئاپۆ چەمکو ۋێش جە ۋەرا ۋەرو هێزە سۆسیالیستەکا، گرڎو ئا ڕێکوستەی و مېیانانە کە ئەوەکۊشای سۆسیالیستی بەرەو وەڵۍ بەرا، بەکار بەرۆ. گەرەکشا سەرو ئی بنەمایۍ پێگە بە سۆسیالیزمی بڎۆ.

جە بنەڕەتەنە، ئاڎ پی مانیفێستەیۆ کە هەڤاڵا ژەنی بە دروسی پېسە ڕێنسانسێوە هۊرسەنگنایشا پەی کەرڎ دەسش پنەکەرڎەن. کەسایەتی ڕابەر ئاپۆی ئازادی و دیموکراسییا. چەمکو ئازادیش سەرو ئازادی ژەنۍ ئەرەمەرزنان. بە ڕۊشنی نیشانەش دان کە بەبێ وەڵێکۊتەی ئازادی ژەنۍ حیچ ئازادیێوە بە ئەنجام نمەیاوۆ. گرڎو ئازادییەکاش سەرو ئازادی ژەنۍ بنیاڎ نیان. بە ڕۊشنی پەیوەندی بەینو ژەنۍ و سۆسیالیزمی، ژەنی و دیموکراسی، ژەنی و ئازادی، ژەنی و سۆسیالیزمی ئاشکرا کەردەن. هەرپاسە نیشانەش دان کە ئانۍ ئامانجشا کۆمۆنیزم، ئازادی، دیموکراسی و سۆسیالیزما، مشۊم هەرمانە و ئەوەکۊشایشا سەرو ڕزگاری ژەنۍ بنیاڎ بنیا. ڕێبازو ژەنۍ و ڕێبازو هێڵۊو ئازادیی ژەناش پېسە پیمەرێوە پەی سروشتو سۆسیالیست بیەو کۊششکارۍ و کەسایەتیێوە وستەن ڕووە.

پی مەعنۍ ڕابەر ئاپۆ مانیفێستو سەدەو ٢١یش سەرو ئا بنەما بنەڕەتییا نیانەرە و پێشکەش بە گرڎلایێش کەرڎەن. هەرپاسە جمېیەرەکەما سەرو ئینیشا پاگیری مکەرۆ و هەوڵ مڎۆ ئەنجامی پەنەواز چا بارۆ بەدەس بارۆ و پا جۆرە درێژە بە ئەوەکۊشایش مڎۆ.

ڕێکۊتەی تاریخی گەلاو کورد و تورکی

ئەرەنیشتەبیەی تورکەکا جە ئەنادۆڵەنە بە ڕێکەوتەی بەینو گەلاو کورد-تورکی ئەنجام دریا. هەرپاسە وەڵێوستەی ئیمپڕاتۆڕیەتیچ جە لایەنو تورکاوە ۋێش پی ڕێکەوتەیە مسپارۆ. دۊلەتو تورکی، دۊڵەتو عوسمانی و گەلو تورکی هە ر وەختۍ ڕووبەڕوو مەترسی جدی بیێباوە، دیسان جە سەیەو ئی ڕێکەوتەی و پاڵپەشتی گەلوو کوردیۆ ئا مەترسیێشا ۋېیەرنێنۍ. ئینە حەقەتینا مزانیۆ. حیچ کەسێوە نمەتاوۆ ئی حەقەتینا پەشتگۆش وزۆ و دلېشەنە بەرۆ.

هەر جە سەرەتانە ڕێکەوتەی چنی سوڵتان سەنجەری وەڵۍ وزیابۍ. ئی ڕێکەوتەیە دماتەر جە مازگرت و چالدران و جە پەرەئەسای ئیمپراتۆریەتو عوسمانینە دەورو ۋێش گێڵنا. دماتەر کاتێ عوسمانییەکۍ ڕووبەڕوو وڕای بیێوە، کاتێ دۆڵەتو تورکی و گەلو تورکی ڕووبەڕوو مەترسیی گۊرەی بیێوە، دیسان موسەفا کەمال ۋێش بە ڕێکەوتەی چنی گەلاو کورد-تورکی ئەسپارا و دیسان چا کاتەنە پاڵپەشتیش جە سۆڤیەتی هۊرگێرت، دۆڵەتو تورکی و گەلو تورکی ۋێشا چا ئاژەیە ڕزگار کەرڎ. لۆزان پېوەس پینەیۆ وەڵێکۊت.

تاوەکو لۆزان دۊڵەتو تورکی گرنگیێوە فرەش دا بە گەلوو کوردی. بە پاڵپەشتی گەلوو کوردی ۋێش جە ئاژە خراپەکا ڕزگار کەرد و لوا دلۍ لۆزانی. تاوەکو ئا کاتەیچە پەی کوردەکا ۋێڕاوەبەری دڎانش نریا پۊرە. هەرپاسە سەبارەت پینەی چڼین نوویستەیۍ هەنۍ. دیسان یاساو بنەڕەتی ٢١ هەن. دماتەر کاتێ دۆڵەتو تورکی جە لۆزانەنە تاپۆش هۊرگېرت و مەترسییەکۍ جە ۋەرا ۋەرشەنە نەمەنۍ، ئیجارەیچ خیاڵش کەرڎۆ کە پەنەوازیشا بە پەشتگیری گەلوو کوردی و سۆڤیەتی نییا و پېوەس بە یاسای بنەڕەتی ٢١ەمیوە بڕۍ چێوێشا فاڕۍ. پا مەعنۍ ڕێکەوتەی گەلوو کوردیشا شێونا. پەی ئانەی ڕووە ۋنەو گەلوو کوردی بکەرا، جە ساڵۊو ١٩٢٤ینە سەرەتا یاساو تەقریری سوکوونیشا بەرکەرڎ و پېوەس پینەیۆ یاساو بنەڕەتی ساڵۊو ١٩٢٤یشا بەرکەرڎە، دماتەر چڼین چێوێشا وەڵێوستۍ.

هەڵبەتە مۆدێرنیتەو سەرمایەداریچ کاریگەریش سەرو ئینەی هەن. ۋەرو ئانەی مۆدێرنیتەو سەرمایەداری تێگەو دۊڵەت نەوەتەوەیش وست وەردەمو تورکیای. بە تەنیا پەی وەڵۍ وستەی ئینەی تورکیاش ئەرکدار نەکەرد، جە هەمانکاتەنە ئەرک و وەرپرسیاری وەڵێوستەی تێگەو دۊڵەت نەتەوەیش جە ۋەرکۊتوو مېیامینینە پنە دا. دۊڵەتو تورکیچ پی مەڵامەتۆ یەکپەرەسیش جە تورکیانە بە بنەماگێرت. پا مەعنۍ دۊڵەتو تورکی ئاوەزیەتۍ فاشیستی پېسە یەک نەتەوە، یەک ئاڵا و یەک زوانیش بە بنەماگېرت. نکۆڵیکەردەی جە گەلوو کوردی و دلېنەبەردەی گەلوو کوردی جە ئەنجامو ئینەینە بەرکۊت و بەردەواما. چڼین کۆمکووژیۍ پېوەس پینەیۆ وەڵێ وزیۍ.

پەیوەندیی بەینو گەلاو کورد-تورکی جە بنەڕەتەنە دماو ئەرەمەرزنای دۊڵەتو تورکی کەم بیۆ. ئینەیچ بە تەمامی ئەنجامو ئاوەزیەتو دۆڵەت نەتەوەیا کە جە لایەنو سەرمایەدارییوە بنیاڎ نریان. چونکی دۊڵەت نەتەوە یەکپەرەسی بە بنەما گێرۆ. دلېنەبەردەی گرڎو کەلتووری، گەل و زوانەکا و وەشکەردەی یەک نەتەوەی بە بنەما گێرۆ. ئا چێوەی کە دۊڵەتو تورکیچ بە بنەما هورش گېرتەن، ئینەنە. ڕێکەوتەی درێژخایەنو گەلا کورد-تورکی ژەعراوی کریا. گوزرێوە گۊرێشا جە پەیوەندیی بەینو گەلا کورد-تورکی دا.

دۊڵەتو تورکی و حکومەت گرڎ کاتۍ گەلوو کوردی تاوانبار مکەرا. پڕوپاگەندەی پېسە گەلوو کوردی خیانەتش چایشا کەرڎەن و گەرەکشانە وڵاتی بەش بەش بکەرا. پېوەس پینەیچ گلېرگەی ژەعراوی مکەرۆ. واڵە-برایەتی و یۆبیەی دلېنە بەرۆ. جە ۋەرا ۋەرو گەلوو کوردینە دژمنایەتی وەڵۍ وزۆ.

جە کاتێوە فرە گرنگەنە کورد پاڵپەشتی گەلوو تورکیایش کەرڎ

بەڵام ئانۍ کە خیانەت مکەرا و دابەشکاری مکەرا، ئانە ۋێشانۍ. کاتێ سەرنج جە تاریخی مڎەیمۍ، جە گرڎ کاتە گرنگەکانە کورد پاڵپەشتی فرە گۊرەشا جە گەلوو تورکی کەردەن. بە پاڵپەشتی کوردا گرڎو مەترسییەکاشا ۋېیەرنێنۍ. ئەر تورکیا ۋێش کەردەن بە وڵات، ئینە جە سەیەو کورداوە بیەن. موینمۍ کە ئی حەقەتینە پێچەوانە مکریۆوە. ئەر پەیوەندییەکۍ خراپۍ بیێنۍ، واڵە و برایەتی نەمەنەن، کورد نە خراپنانش، دۊڵەتو تورکی، حکومەتە تورکییەکۍ ۋێشا مەڵامەتوو ئینیشا بیێنۍ، سیستەمو مۆدێرنیزمو سەرمایەدارییا کە ئاڎۍ پەشتیش پنا بینا خراپشا کەردەن. ئینە ئاوەزیەتو دەوڵەت-نەتەوەیا.

جە ڕۊزگارو ئارۊیمانە ئاوەزیەتو دەوڵەت-نەتەوەی بە تایبەتی جە ۋەرکۊتوو مېیامینینە هۊرشێویۆوە. ۋەرکۊتوو مېیامینی شێویێۊنە و سەرجەنۆ بنیاڎ منریۆوە. دیار نییا ئینە چنی کریۆ. پی مەڵامەتیچۆ ئیسە دۆڵەتو تورکی ڕووبەڕووو قۆناغێوە جدیی بیەنۆ. ئیتر نمەتاوۆ پېسە وەڵتەری پاگیری جە دەوڵەت-نەتەوەی بکەرۆ. هەڵای پاگیرا، بەڵام ئیتر چڼە پا گێرۊرە ئی ئاژە جە دماوە مەنۆ. ئینە مشۊم گرڎ کەسۍ عال بیاوۆشەنە. ڕەنگە دیسان پەیوەندییەکۍ تورک-کوردی سەرڕاسۍ باوە و چارەسەری و ئەنەیاوای نەتەوەی دیموکراتیکی بە بنەما هۊرگیریۆ. تا ئەنەیاوای نەتەوەی دیموکراتیک بە بنەما هۊرنەگیریۆ، تاوەکو سەرو ئی بنەمایۍ فاڕیایۍ زیهنی ڕووەنەڎۆ، ئەگەر سەرو زیهنیەتی کۆنەپەرەسی پاگیری بکەرا، واتە پاگیری سەرو دەوڵەت-نەتەوەی بکەرا، بێگومان نمەتاویۆ ئی پەیوەندیۍ سەرڕاسۍ بکریاوە. ڕابەر ئاپۆ ۋەرو ئینەی تاریخو کورد-تورکیش سەرجە نۆ وست ۋەرو چەما گرڎ کەسی. واڵە وبرایەتی و یۆبیەی کورد و تورکی تەنیا بە دڎانیای پۊرەی بە بیەی و مافەکا گلېرگەو کوردی پێک مۍ. بە قبوڵکەردەی مافە سروشتییەکا گەلوو کوردی و وەڵێوستەی نەتەوەی دیموکراتیکی متاویۆ چارەسەر بکریۆ. جە بنەڕەتو بانگەوازییەکەی و مانفیستۆو ڕابەر ئاپۆینە وەڵێوستەی ئینەی بیەیش هەن.

ھیواڎارێنمۍ دۊڵەت و حکوومەتو تورکی، بە تایبەتیچ ئانۍ تورکیاشا وەش مسیۆ، وڵاتپارێز، گەلو تورکی ئی حەقەتینیە بوینا و دەس جە پاگیری نکۆڵیکەردەی-دلېنەبەردەی هۊرگېرا و پەیوەندییەکاشا چنی کوردا کە خراپ نابۍ، سەرجەنۆ سەرو بنەماو سیاسەتو دیموکراتیکی بنیاڎشا بنیاوە.

ڕابەر ئاپۆ، گەلوو کوردی و تەڤگەرو ئازادی پەی ئانەی ئی پەیوەندیۍ جارێوەتەر وەشۍ بکریاوە ھەوڵ مڎا ئا ۋەرپرسیاریە تاریخیەی کە گنۆ سەرشا جارێوەتەر جابەجێش بکەرا. ھیواڎارەنا کە دۊڵەت و حکومەتو تورکی و بە تایبەتیچ گلېرگەو کوردی ئی ۋەرپرسیاریە تاریخیە جابەجێ بکەرا.

ئەوەکۊشای چەکڎاری پەی ئانەی زەمینەو سیاسەتو دیموکراتیکی بکریۆوە پەرەش ئەسا

چا کاتۆ کە سیاسەتو نکۆڵی و دلېنەبەردەی سەرو گلېرگەو کوردیرە جابەجێ کریۍ، گرڎو ئا چێوا کە هینۍ کوردی بێنۍ دلېنە شیۍ. گلېرگەو کوردی ڕووبەروو دلېنەشیەیۍ یەکجاری بیۆ. ڕابەر ئاپۆ چا کاتەنە دەسوەردایۍ تاریخیش کەرد. چونکی ئا ئاژەی کە ئاما ئاراوە تەنیا بە زەرەرو کوردی نەبۍ، بەڵکم بە زەرەرو تورکیچ بۍ. ڕابەر ئاپۆ فرەو وەختی ئی مژارەشە وروژنا. واتش: "تورک بەبێ کوردی نمەتاوۆ بژیۋۆ و کوردیچ بەبێ تورکی نمەتاوۆ بژیۋۆ. فرەو وەختی پەرەش پی مژارەیە دا. پا جۊرەی کە گرڎو ڕایەکا وزیێرە و گەل و گلېرگەو کوردی ڕووبەڕوو مەترسیێوە گۊرەی و دلېنە شیەی بیۆ، ڕابەر ئاپۆ ناچار بی ئەوەکۊشای چەکڎاری دەس پنەبکەرۆ پەی ئانەی زەمینۍ پەی سیاسەتو دیموکراتیکی وەش بکەرۆ. حیچ ڕێوە نەمەنۍ بۍ پەی ئانەی کورد ۋێش پارێزنۆ مەگەر جە ڕاو پەرەپنەدای ئەوەکۊشای چەکڎارییوە گرڎو ڕایەکا وزیێبێنێرە؛ پەی ڕاوەبەردەی سیاسەتو دیموکراتیکی، پارېزنای بوونیەو ۋێش فرە گرنگ بۍ. تەنیا بە پارێزنای بیەو ۋێش تاوۍ ئی ڕۍ بکەرۆوە.

هەتا گەشمەرڎەبیەو هەڤاڵ حەقیقی قەراری، ئامانجو پەرەپنەدای ئەوەکۊشای چەکڎاری جە ئارانە نەبیەن. تا ئا کاتە هەرمانە دلۍ گلېرگەینە کریۍ. ئا هەرمانۍ کە کریا هەرمانێوە سیاسیە بۍ. دماو تیرۆرکەردەی هەڤاڵ حەقیقی قەراری، بەرکۊت کە پەی ئانەی پرۆسەکەی بە ئەنجام بیاونی، مشۊم ۋێت پارێزنی. چونکی حیچ ڕێوەتەر نیا. ئەوەکۊشای چەکڎاری چا سەردەمەنە کۊت ڕۆژەڤو ئێمۆ. ئامانج چنەش وەشکەردەی دەرفەتێوە سیاسی بۍ پەی کوردی؛ وەشکەردەی کەشێوە سیاسی و یاسایی بۍ. ئی زەمینە بە ئەوەکۊشای چەکڎارییوە وەش بیەن. پی مەعنۍ ئەوەکۊشای چەکڎاری دروس و ڕەوا بۍ. گەلوو کوردی زیڼە بیۆ، سەر جە نۆ ژیۋاوە، هۊرئێست و بە ئەرەپڕایەکاشۆ، بی بە گەلوو نەورۆزی.

ئیدامەش هەن.....