شارو سلێمانینە دەربارەو گرنگی بانگەوازە تاریخیەکەو ڕابەر ئاپۆی کۊنیشتێوە پەی مامۆساو زانشتگەی نیکۆلا ئەشرەفۍ ڕێکوزیا، چنەشەنە واتش: " پەیامەکەو ئېژا ئۆجاڵانی ئاژەو کوردی سەرجەنۆ بەرەو عالتەر فاڕۆ جە ناوچەکەنە".
ئارۆ جە دەزگاو ڕۆشنۋیری شارو سلێمانینە دەربارەو بانگەوازو "ئاشتی و گلېرگەی دیموکراتیک"ـی ڕابەر ئاپۆی، کۊنیشتێوە پەی مامۆساو زانشتگەی و چەمڎارەی ڕامیاریە نیکۆلا ئەشرەفۍ ڕێکوزیا.
نیکۆلا ئەشرەفە ئەرەیاۋناش ئی بانگەوازە جوابو ئا فاڕیایانە کە جە ۋەرکۊتوو مېیامینینە ڕووە مڎا، واتش: "گرنگی پەیامەکەی ئینا چانەینە کە ئاژەو کوردی سەرجە نۆ جە ناوچەکەنە فاڕیۆ، هەرپاسە ئاژەو کوردی بەرۆ وەڵێوە، پا شەرتەی سەرکردەکێما و پارتە سیاسییەکۍ کوردی بە شێوێوە حەکیمانە و فرەلایان مامەڵە چنی ئی قۆناغە ئاڵتونیەو گەلەکەیما بکەرا".
هەرپاسە واتش: "پەی سەروستەی پڕۆسەو ئاشتیی جە تورکیا و جوابدایۆ پەیامو سەدەو ئېژا ئۆجاڵانی پەنەوازا تورکیا ۋەرپرسیاری هۊرگېرۆ و بە کرداری هەنگامە بنیۆ بەشێوۍ یاسایی، سیاسیی و کۆمەڵایەتیی ئینە جە کاتێنە ڕەگەزپەرسی جە تورکیانە تا ئاستو فاشیزمی لووان، جە ئیساتێنە پەنەوازا تورکیا ۋێش چنی پەیامەکەو ئېژا ئۆجاڵانی گونجنۆ تورکیا ناچارا هەنگامەی کرداریە بنیۆ.
پەیامەکە بیەن بە ئامڕازێوە پەی پارێزگاریکەردەی جە ۋەرنیشتوو کوردەسانی تەنانەت ئەزموونو ۋێڕاوەبەریش پارێزنان، هەرپاسە واوەی کاریگەریش سەرو بەهێزبیەیۆ پانیشتوو کوردەسانی بیەن، پېسە بە دەمۆ ئامای لایەنە کوردییەکا پەی پەیامو ئاشتیی سەدەی موینیۆ".
