٣٧ ساڵ بەر لە ئێستا ڕژێمی بەعسی عێڕاق، بە چەکی قەدەغەکراوی کیمیایی هەڵەبجەی بۆردوومان کرد و بە هۆیەوە لە چەند خولەکێکدا ٥٠٠٠ هاوڵاتی کورد کە زۆرینەیان ژن و منداڵ بوون کۆمەڵکوژ کران و بەهەزارانی دیکەش بریندار و بێسەروشوین بوون،  ئەم بۆردوومانە بوو بە برینێکی ساڕێژنەبوو بە جەستەی هەڵبجە و هەموو کوردستانەوە، بۆیە ساڵانە لە ١٦ـی ئاداردا بە مەراسیمی جەماوەریی یادی ئەو کیمیاباران و کۆمەڵکوژییە دەکرێتەوە.

کەمێک پێش ئێستا مەراسیمی ٣٧ـەمین ساڵیادی کیمیابارانکردنی شارەكە، بە ڕێپێوانێک کە خەڵکی هەڵەبجە و دەیان کەسایەتی و خەڵکی ناوچەکانی دیکە تێیدا بەشدارییان کردووە، لە بەردەم باخی گشتی هەڵبجەوە دەستی پێکرد و تا مۆنۆمێنتی هەڵەبجە بەردەوان دەبێت.

جێی ئاماژەیە مەراسیمی ئەمساڵ ماوەی سێ ڕۆژ دەخایەنێت و لە ڕۆژی یەکەمدا چەند وتارێک و بەرهەمی هونەریی و لاوانەوە پێشکەش دەکرێت.

هەروەها لە دوو ڕۆژی داهاتووشدا چەندین پانێڵ و سیمینار لەسەر کیمیاباران و کۆمەڵکوژی هەڵەبجە ئەنجام دەدرێت و لەوە بارەوە چەند کتێبکیش بڵاودەکرێتەوە.