جەنگاوانەو یەپەژەی هاڤین قامیشلۆ جە بەرەکا وەڵێوە مڏرامانو قەرەقۆزاقینە، واتش: "پێسە چنین جە کۆبانێنە وەرا وەرو چەتەکا داعشینە جەنگما کەرد و تاریخما نویستۆ، بەنداو تشرینی و سردەو قەرەقۆزاقیچەنە تاریخو مڏرامان منویسمێ و شکس بە دژمنی مارمێ".".
دۆڵەتو ئەرەگیرو تورکی ٨ و کانوونو یوەمو ٢٠٢٤ ـ نە بە چەکی قورس و فڕۆکەی بێ فڕۆکەوان هرووژم مکەرۆ سەرو قەرەقۆزاقی و تشرینی. جەنگاوەرا قەسەدەی و یەپەژەی و ئەنجوومەنو سەروازی مەنبەجی وەراوەرو هرووژمە ئەرەگیرەکانە مڏرامان مکەرا.
جەنگاوەرا یەپەژەی جە بەرەو قەرەقۆزاقینە وەراوەرو دۆڵەتو ئەرەگیرو تورکی ئینێ سەنگەرەکا وەڵێوە. جەنگاوانەو یەپەژەی هاڤین قامیشلۆ کە چا قۆڵەنە یاگێ گێرۆ، پاسە هورسەنگنایشا پەی مڏرامانو هێزەکاشا کەرد:
"پێسەو جەنگاوەرا قەسەدەی و یەپەژەی وەراوەرو هرووژمەکا دۆڵەتو تورکی جوابی بەهێز مراوە. ئی مڏرامانە پاسەش کەرد سوپاو دۆڵەتو ئەرەگیرو تورکی نزیکو هەرێمەکاما نەبۆوە و پاشەکشێ کەرۆ. هەڤاڵا ڕاشا نەڏا دوژمن پا وسۆنەدلێ بەنداو تشرینی و سردەو قەرەقۆزاقی. چی دمایانە ژمارەو چەتەکا دۆڵەتو تورکی زیاتەربی. بەڵام ئێمە جە قەرەقۆزاقەنە وەراوەرو هرووژمەکا مڏرامانێ گۆرە مکەرمێ. دوژمن هەرچنە گەرەکش بۆ خاکەکەیما ئەرەگیر بکەرۆ هەوڵەکێشا شکس مارا.
پەی ئانەی دوژمن پا نەوسۆ دلێ خاکەکەیما، قەولو و پاگیریما واوەی مکەرمێ. نەک هەر گەلو وەرنیشتی، پەنەوازا گرڏ بزانا ئێمە شۆنکەوتەو هەڤاڵە گەشمەرڏەکاما بیمێ و پاشەکشی مەکەرمێ. هەڤاڵێما گەشمەرڏێ با پەی ئێمە بۆ سەرجەمەو پاگیری جە سەرکەوتەی. پێسەو جەنگاوەراو پارێزنەرو هەرێمەکەی، وەراوەرو هرووژمەکا دوژمنی جوابی بەهێز مرەیمێ و شکس بە دوژمنی مارمێ.
پێسە چنین جە کۆبانێنە وەراوەرو چەتەکا داعشینە جەنگما کەرد و تاریخما نویستۆ، بەنداو تشرینی و سردەو قەرەقۆزاقیچەنە تاریخو مڏرامانی منویسمێ و شکس بە دوژمنی مارمێ".
