جەنگیز چیچەک ئاماژەش بە هەنگامە پەنەوازییەکا پرۆسەکەی کەرد و واتش: "یۆ جا هەنگامە گرنگا بێگومان ئازادی جەسەیی ئێژا ئۆجالانی و هەموارکەردەیۆ و فاڕییاو هەلومەرجو هەرمان کەردەیشا. ئینەیچ داواو پەکەکەین"
پەرلەمانتارو دەم پارتی جەنگیز چیچەک ئاماژەش پانەیەدا، ئەردۆغان وەڵتەر نکۆڵی جە ڕێککەوتنامەکەو دۆڵمەباخچەی کەرێ واتش: "پرۆسەکە بە گلیرۆبییەی چنی ئەردۆغانی ویەرد پەی قۆناغێوە جیاوازی. گلێرۆبییەو شاندو ئیمراڵێ چنی ئەردۆغانی گرنگ و کاریگەربێ. چی بابەتەنە دووێ ئەزموونێ چارەسەرێ هەنێ؛ پرۆسەو ئۆسلۆی و پرۆسەو ئی دماییەو ئیمراڵی. خاڵی هامبەششا هەن. حەر وێش وەرو چەنەو گلێرگەیۆ چێوەکێ ڕووەمڏا. جە ڕێککەتننامەو دۆڵمەباخچەلینە ئێژا ئەردۆغان وێش واتش، 'ئاگادارو ئا ڕێککەوتنامەیە نییەنا، دانەش پۆرە مەنیەو' پی قسێ بەشێوێ ڕەسمی دمایش بە ڕێککەوتننامەکەی ئارد. دماو ئانەی ١٠ ساڵی بەردەوام گلێرگە جە گرژی و پشێوینە بێ جە گرڏ ڕووێوە. دماو فشارەکا چی پرۆسە تازەنە گلێرۆبییەو شاندو دەم پارتی و ئێژا ئەردۆغانی نیشاندەرو ئانەین جە ڕووانگەو تاریخیۆ وەڵکەوتەی گرنگ هەن. ئینەیچ بە ماناو بەرهەمداری ئەوەکۆشای مێ."
فاڕییاو هەلومەرجو هەرمان کەردەی ئێژا ئۆجالانی هەنگامەی ۆەنەوازییەی سەرەتاییەن'
چیچەک جە بەردەوامیینە سەرنجخ وست سەرو پەنەوازی ئا هەنگامێ کە پەنەوازا پەی پرۆسەکەی نریۆ و بە ئاماژەدای با فاڕییایە کە پرۆسەکە ئاردەنش مەێڏان جەختش سەرو ئازادی و فاڕیاو هەلومەرجو هەرمان کەردەو ڕابەر ئاپۆی کەردۆ و واتش: "خودو ئاشتی دلێ ئا هێزانە ئەنجام دریۆنە کە ئینێ جەنگ کەردەی چنی یۆتری. بەشێوی ئاسایی دوور وستەیۆ پرۆسەو کوردی جە جەنگی و پرۆسەو چەک نییارەی پەنەوازیش بە بڕێ هەنگامێ هەنێ. بێگومان گرنگترین ئا هەنگامێ جابەجێ کەردەو هەلومەرجو ئازادی جەسەیی ئێژا ئۆجالانی و هەموار کەردەو یاساکا پەیوەس بە هەلومەرجو هەرمان کەردەین."
'مشۆم ئێژا ئۆجالان بەشداری کۆنگرەی بۆنە'
چیچەک ئاماژەش بە ئەرەیاونا و قسێ پەکەکەی کەرد پەیوەس پی بابەتەی و دەستنیشانش کەرد ئانەی پەکەکە جەختش سەرو کەرۆوە و پەنەوازی بەستەو کۆنگرەیشا حەر ئا مەرجێنێ و واتش: "پەی ئانەی کۆنگرە پی جۆرە تاریخییە ئەنجام دریۆنە، مشۆم ئێژا ئۆجالان بەشداری پرۆسەو بەستەو کۆنگرەی بۆنە. وە مشۆم ئۆپراسیۆنە چەکدارییەکێ جەنگی مدرنا. جە پانیشتوو کوردەسانی و یاگەکێ تەرێ ئۆپراسیۆنەکێ بەردەوامێنێ، بەڕاسی جە دۆخێ چانەنە هیچ گرنتییێ ئەمنی نییا پەی بەستەو کۆنگرەی. حەر وێش وەرپرسێ پەکەکەیچ چنین جارێ ئاماژەشا پی خاڵا کەردەن. ئانەی گنۆنە ئەستۆما ڕەخسناو هەلومەرجو ڕوەبەردەی پرۆسەکەین. پەنەوازا ئینە داواو سیاسەت و گرڏو لایەنە کوردییەکا بۆنە، نەک بە تەنیا خواستو دەم پارتی. بابەتی کوردی ئیتر پەرسەو گرڏ کەسین، پەنەوازا جە کوردی یاوانە. ناچارەسەرکەردەو پرسو کوردی کاریگەری نەرێنیش سەرو ژیواو گرڏ کەسێ نییانەرە."
جە دماین و قسەکاشەنە جەنگیز چیچەک پەڕلەمانتارو دەم پارتی ئاماژەش پانەیەدا پەنەوازا گرڏ پارتێ و بە تایبەت ئۆپۆزسیۆنیچ بەشداری کاریگەرو پرۆسەکەی بانە.
