مێرسیننە "کۆبییەیوە چەنی ژەنا" کریا. دەم پارتی جەختش کەردۆ جە یۆبییەی ژەنا دژوو دەسملەرەگێرتەی ئیرادەی. سیاسەتمەدارەو کوردی سەباحەت تونجەلە بەشداریی چالاکییەکەیش کەرد. سیستموو هامسەرۆکایەتی و کاریگەرییش سەروو ژیوای ژەنا تاوتۆ کریا.
مەجلیسوو ژەناو پارتوو یەکسانی و دیموکراسیی گەلا (دەم پارتی) بە بەشداریی سیاسەتمەدارەو کوردی سەباحەت تونجەلێ مێرسیننە " چەنی ژەنا" کوێ بیێوە. یاگێ چالاکییەکەینە وەردەموو ڕێکوستەی دەم پارتی مێرسینینە، بە ولی و درووشمێ خێرامای سەباحەت تونجەلێ کریا، پەرلەمانتارەو دەم پارتی پەریهان کۆجا و نوێنەرەو ڕێکوزیایەکاو ژەنا بەشدارێ بێنێ. کۆبییەیوەکەینە، سیاسەتوو قەیومی، کێشە ڕوانەییەکاو ژەنا، پراکتیکوو کۆشیای دژوو هجووموو سەروو ژەنا تاوتۆ کریا.
پەرلەمانتارەو دەم پارتی پەریهان کۆجا تیشکەش وستە سەروو کۆشیای دژوو دەسملەرەگێرتەی ئیرادەی، کە زیاتەر جە مانگێوەن بەردەواما، واتش درێژە بە کۆشیای مدانە و خاوەندارێتیی جە ئیرادەو وێشا مکەرا، ئاماژەی کەرد بە ڕاپیمایەکەو وانی و واتش: "گرد یاگێوی وەڵاتینە مدرامانێوی گەورە هەن دژوو شەپۆلەو یەرەموو قەیومی".
سەباحەت تونجەلەیچ واتش یوەمین بەهانێ نیایرەی قەیومی، سیستموو هامسەرۆکایەتیین، چونکوم هامسەرۆکایەتی دلێنەبەردەی سیستموو پیاسالاریین، بەشداریکەردەی ژەنان جە میکانیزمەکاو قەراری و بەیاگەیاوناینە، بییەی یەکسانی ژەنێن گردوو بوارەکاو ژیواینە، هامسەرۆکایەتی دەسکەوتێوی گەورەن پەی ژەنا، پەوکای مشۆم خاوەندارییش وەنە بکریۆ و جوابوو هجومەکا بدریۆوە.
تونجەلە واتش ڕژێموو قەیومی ئا ئەم دەسکەوتا جە ژەنا زەوت مکەرۆ، حەر چەنی ئامای قەیومی ٤٣ ئەرەمەرزیێ ژەنا وزیێرە و پیێ چا نریێرە. ئەوەخوایش کەردۆ، قەیوم هجوومێوی ئایدۆلۆژیین دژوو خەتەو ئازادیوازەو ژەنا، بانگەوازش کەرد پەی کۆشیای دژوو ئی هجوومەیە.
