کۆنگرەی نەتەوەیی کوردستان کەنەکەی، ٢٦و ئایارو ١٩٩٩ شارو ئەمستردامو هۆڵەنداینە کۆنگرەو ئەرەمەرزنایش لکی دا، کەنەکە ماوەو ٢٥ ساڵان پەی یۆبییەی بەینو پارتە کوردییەکا چوار بەشو کوردستانینە ئینا هەوڵێ و کۆشیایینە.

کەنەکە پەی کەردەی ٢٢ـەمین کۆبییەیۆ کاتیی ئەنجومەنی کوێ بیێوە، کۆبییەیۆکە ماوەو ٢ ڕوا خواینۆ، بەشدارێ کۆبییەیۆکەی نزیکەو ٢٠ کەسا بانێ کە چوار بەشاو کوردستانیوە بە دەیان نوێنەرێ پارت، ئەرەمەرزیا سیاسییەکا، نویسەرا، ڕۆشنویرا و کەسایەتییە نامدارەکا بەشداریی کۆبییەیۆکەینێ.

هەرپاسە پارێزگارو سلێمانی هەڤاڵ ئەبوبەکر بەشدارییش کۆبییەیۆکەینە کەرد.

'مشۆم پێوە دژو هجوومەکا مردمێوە'

وتارو ئەوەڵو کۆبییەیۆکەی، لاو ئەندامو ئەنجوومەنو کەنەکەی د. شێرکۆ محەمەد ئەمینی و ئەندامەو کۆمیتەو ڕاوەبەریی کەنەکەی شەهلا حافیدێوە، بە دروشمو " جە کۆشیای پەی ڕزگاری و ئازادیی کوردستانی، ڕاو سەرکەوتەی یۆبییەین" دەسش پەنە کەرد.  

دماو وتارو دەسپەنەکەردەی کۆبییەیۆکەی، ورچنییەی دیوانی پەی ڕاوەبەردەی کۆبییەیۆ ٢ ڕۆییەکەی کریا.

ژاڵانە نەقشبەندییە، بە نامێ گۆران هیوا ناسێحیوە، جە ڕاوەبەراو زەحمەتکێشا هیوا سەید سەلیم، جە ڕاوبەراو یۆبییەی دێرسیم زند، نارین بە نوێنەرایەتیی پارتو ئەلباڤێ، بە نامێ قسەکەرو پەیوەندییەکاو بەروو کەنەکەی نیلوفەر کۆچە پەی دیوانو ڕاوەبەریی کۆبییەیۆکەی ورچنیێ.

نیلوفەر کۆچە، کە بە سەرۆکەو دیوانی ورەچنیا واتش، کە پێسەو کەنەکەی جە وەختێوی ئاوارتەنە کۆبییەیۆکاشا مکەرانێ و واتش: "تورکیا هجووم مکەرۆنێ سەرو پانیشتو کوردستانی، هەرپاسە پێویسا سیاسەتەکاما چەنی ئینەیە ڕێک بوزمێن."

  'دوژمنێ هجووم کەرا سەرما'

  هەرپاسە زەینەب مورادە و ئەحمەد کارامووس هامسەرۆکاو کەنەکەی واتشا: " وەرکەوتی دلێڕاسیننە و جیهاننە قەیرانێوی جیددی هەن. دوژمنێما، ئێمە پەی بەرژەوەندیی وێشا بەکار مارانێ و گەرەکشانە هجووم بکەرانە سەرو گەلەکەیما. پلانەکێشا ئینێ چا چوارچوەنە.  گەرەکشانە ئا پلانێشا کە سەدان ساڵێن نەتاوناشا گەلەکەماش پنە بەرانێ دلێنە ئیساتێ بیاوناش یاگێ. سەرمەشقو ئی کۆکوشییا دەوڵەتو تورکیاین. ئێران، سوریا و عێراقییچ بەشێونێ چی پیلانێ. ئێمەی کورد مشۆم یۆبییەی وێما وەراوەروو ئا گردو کۆکوشییانە بنیات بنیەیمێ. پێویسا ئێمە پێسەو  کەنەکەی هەڵوێستو وێما وەراوەرو ئۆپراسیۆنە سەروازییەکاو دەوڵەتو تورکینە  دژو گەلو کوردی و پارتە کوردییەکا نیشانە بدەیمێ. پێویسا ئاگادارێشان بکەرمێوە کە خاکو کوردستانی کەرامەتو گردو کوردان و پێویسا گرد لایێوی بپارێزناش.

زەینەب مورادە وتارەکەشنە واتش، کە پێویسا دژو گۆشەگیریی سەرو ڕابەرو گەلو کوردی عەبدوڵا ئۆجالانی کۆشیای بەرز بکریۆوە.

'مشۆم پەدەکە نەبۆ بە شەریکو تاوانەکاو تورکیای'

ئەحمەد کەرەمووسییچ واتش: "بەتایبەتی ئارۆ ٤ دەوڵەتێ ئەرەگیرکەرێ وچەوسنەرێ یۆشا گێرتەنە  و هجووم مکەرانێ سەرو دەسکەوتەکاو گەلو کوردی. گەلو کوردی قبووڵ نمەکەرانێ. پەوکای پلان و بەرنامەی گڵیاو مجانێرە. تورکیا کوردستاننە تاوان دژ بە ئینسانیەتی مکەرۆ. بە بەکارئاردەی چەکی کیمیایی سەلەمنەرو ئینەینە. ئارۆ وەرنیشت و شەنگالنە هجوومێ کریانێ سەرو خەڵکی بێتاوانی. پێسە هەوڵێ مدانێ خاکەکەیما ئەرەگیر بکەرا."

ئەحەمەد کەرەمووس وتارەکەشنە داواش کەردە پەدەکەی و واتش: "ئارۆ دوژمنەکێما دژو ئێمە یۆشا گێرتەن و هجووم مکەرانێ سەرما، گردو لایەنەکا پەییۆبییەی گەلو کوردی جوابو بانگەوازو کەنەکەیشا دانوە. بەڵام پەدەکە بە هیچ شێوێوی جوابش نەدانەوە. من ئی بانگەوازییەم پەی پەدەکەین؛ "مشۆم پارتی دیموکراتو کوردستانی جە کوشتەی و پیلانە گڵیاوەکاو تورکیاینە بەشداری نەکەرۆ، پێویسا پەی بەرژەوەندی و یۆبییەی گەلو کوردئ بکۆشیەیمێ. ڕزگاریی گەلەکەیما ئینا چینەینە."