دماو ئانەی سەرو بەنڎو ڕیفراندۆمە شکستوارەکەو هەرێمو کورڎسانی مەسعود بارزانى پېسە ئانەی بناغېۋە  پتەوو دەوڵەڎ دارى و چېرخانېۋی ئابورىش بنیاڎ نیابۊ، بێ منەتانە بە پەی لوۋاو ۋێش تەپڵو سەرکەوتەیش دانۋنەو  ملەملانۍ و جەنگش دژوو دۆسی و دوژمنی ئەرەیاۋناو موزیڕبۍ سەرو ئانەی ڕیفرۆندۆم ئەنجامبڎۊ و ۋاتش حساب پۍ حیچ کەسۍ مەکەرمۍ.

ئەنجام داو ڕیفراندۆمی سەرو ئی بنەمۍ بۍ " گەر سەرش گرت ئانە عالا، ئەر سەرش نەگرت سوارو سەرەو ۋێش بۊ، بەڵام نەک سوارو سەرەو ۋێش نەبی بەڵکم خاک و نشتیمانشا سەرو سینیېۋی ئاڵتوونی پێشکەش بە بەغڎای کەرڎ، ئیسەیچش سەر بۊ ئا خانەۋاڎە  پۍ کورڎی و کورڎسانی بیېنۍ بە بەڵا و حەر جارە و بەجۆرێۋە دەسکۊتەکا جە بەین بەرا.

ئەر ڕیفراندۆم شکسو سیاسى و خاک ورەتەی بۊ، جە ئیسەیچنە جە سایەو ئا خانەۋاڎەینە ئاژەو ئابورى و قەوارەو هەرێمی ئینا ۋەردەمو شکستېۋی گەورەینە.

دماو ئانەی جە جەژنەو نەورۆزینە،وەزارەتو جبەرو ئەمریکای گوزارشتەو ۋێش جە بارەو ئاژەو هەرێمو کورڎسانی ئەرەیاۋنا، نامیەتەرین ڕۆچنامەو ئا وڵاتیە حکومەتو هەرێمو کوردستانیش بە کارتۆنى نامۍ بەرد و هۆشداریشا دا کە ئینا کەنارو وڕاینە، پەدەکە و خانەۋاڎەو بارزانى دوور جە گرڎ ئەتەکێتێۋی دیبلۆماسى و نێم دەوڵەتى ئەمریکا و گوزارشتەکېشا ڕەڎکەردۊ، بەجۆرێۋە کە "دیندار زێبارى" ڕێکوزو ڕاسپاردە نێم دەوڵەتییەکا جە حکومەتو هەرێمیەنە ئەرەیاۋناش، گوزارشتەکۍ  ئەمریکای  درۋێۋ، دووە ڕووى و ناڕۊشنیش چنەن .

جە ۋەران ۋەرو ئی جوابەو حکومەتو هەرێمینە ئەمریکا بێ دەنگ نەبی و جوابۍ تنش داۋە ئاڎیچ جە ڕاو کۆنسولى ئەمریکای هەرێمنە کە گوزارشتەکۍ گۆڤارو "فۆڕن پۆڵسى" نامیەتەرین میدیایى ئەمریکاىش چېرو نامونیشانو حکومەتە کارتۆنییەکەو هەرێمی جە کەنارو وڕایەنە شەیرکەردەبۍ، بەڵام چانەی مشۊ ۋەرپەرسا هەرێمی و بەتایبەت خانەۋاڎەو بارزانى گەرەکشا نیا چا ڕاستییا یاوانە و هۆشدارییەکا مەگېرانە گۊش.

چەمڎارێچ  ماچا نادیدە گېرتەو ئی هۆشدارییا ئەمریکای جە لایەنو خانەۋاڎەو بارزانیۊ مەتەرسی و قەیرانۍ تەرێش ئینۍ شۊنیۊ .

ئانەیچ جە ۋەختېنە کە خانەۋاڎەو بارزانى نەک هۆشدارییەکا ۋەرو چەما مەگېرا چنی ئانەیچ کەوتېنۍ تۆمەڎ بەخشایۊ بە نەیاراو خانەۋاڎەی و ۋێچشا کەرڎەن بە خانەۋاڎێۋە نەتەوەیی .

مەسرور بارزانى جە تازەتەرین پەیامشەنە ماچۊ؛ ئا کەسۍ کە جە ئیسەنە نیەنۍ چنیما با  دماتەریچ ۋێشا نەکەرا بە ساحیبو دەسکۊتەکاما، بەڵام یاگۍ ۋێشا چېگەنە پەرسمۍ کام دەسکۊت؟ کێن هەرێمش پی ئاژەیە یاۋنان، کێن قەوارەکەش وستەن مەتەرسیۊ، کۍ بۍ حیچ ئەرزشێۋەش پۍ ورچنیای ناستۊ، کۍ بۍ سەرخان و چېرخانو ئی وڵاتیشە تاڵانکەرڎ، کۍ بۍ متمانەو هامۋڵاتیاش ناست ۋەران ۋەر بە ئە زموونو حوکمڕانی و، ھەرمانە یاوا ئانەی ھومېڎەوارێبا کە بێگانە حوکمشا کەرۊ، کۍ بۍ سازشش  سەرو خاکو نیشتمانی کەرڎ دەسش چنی دوو ژمنا و نەیارا تێکەڵ کەرڎ.

جە گرڎو ئینیشا خراپتەر ۋەرمو سەڎان ساڵەی ۋەڵینگەیی گەلیشا بەدەسو دەسەڵاڎ داراو کوردی و کورڎسانی نیا قەبرە، ئەشۊ نەوەکېما چنی ئی تاریخیە بۋاناۋە چنی ڕووەشا بۍ شانازی بە حکومەت و دەستکەوتێوە کەرا کە سەرو خاکێۋی دۊڵەمەنڎی و چېرخانېۋی پېسە ئاڵتونی و خەزێنېۋە نەک هەر ئیسە ئایندەو ئاڎیشایچشا کاولکەرڎ چنی ڕووەشا بۍ، ۋاچا دماو پەنج خولا پەڕلەمانی و نۆ کابینۍ حوکمڕانی جە کورڎساننە مایە پوچو دەست بەتاڵ و قەر زارۍ بیۍ، جە ۋەختېنە هەرێمی دۊڵەمەنڎ جە نەوتە و سامانی ۋێڕسکەنە جە خاکێۋی بەپیتی کشتوکاڵینە جە ئاوۍ فرێو کەشێۋی گونجیانە  ئەنجامەکەش قەرزاربیەی و دۆڕیای و ئیفلاس بیەی و تەسلیم بیەیۊبۍ بەدوژمنا و نەیارەکاما.

ھ.ش