خه‌ڵكوو مه‌خمور، به ڕاپیماێوە جه‌ماوه‌ری هه‌ڕه‌شۍ و گۊشه‌گیریی سه‌روو ڕابه‌روو گه‌لوو كوردی، عه‌بدوڵا ئۊجالان-یشا شه‌رمه‌زار كەرد و واتشا، تا ئازاڎ کریۊ، درێژه به چالاكییه‌كاشا مڎا.
ئەرەنیشتاو كه‌مپوو په‌نابه‌راو گەشمەرڎە رۊسته‌م جودی (مه‌خموور)ی، به ڕاپیماێوە جه‌ماوه‌ری هه‌ڕه‌شۍ و گۊشه‌گیری سه‌روو ڕابه‌روو گه‌لوو كوردی، عه‌بدوڵا ئۊجالان-یشا شه‌رمه‌زار كەرد. ڕاپیمایە‌كه به كۊبییەیۊ خه‌ڵكی وه‌رده‌موو بیناو ڕێكوزیاو بنه‌یانەو گەشمەرڎانە ده‌سش پەنە کەرد و تا بیناو نه‌ته‌وه‌یۊگێرتەکا کەمپەکەنە درێژەش کێشا.
دلێشەنە پۊسته‌ره‌كاو ڕابه‌روو گه‌لوو كوردی، عه‌بدوڵا ئۊجالانی به‌رزۍ کریێوە و دروشمه‌كی په‌یوه‌سۍ بێنۍ به ڕابه‌روو گه‌لوو كوردیوە کە وچیێنێوە، دماتەر وه‌رده‌موو بیناو نه‌ته‌وه یۊگێرتەکانە، ئەرەیاوناێوە جە ڕاو سه‌عید چۊمله‌كی، ئه‌نداموو كۊمیته‌و هەرمانوکاروو جبەریوە ونیاوە.
سه‌عید چۊمله‌ك ئانەشەوات کە، ماوه‌و ٢٥ ساڵان، ڕابه‌روو گه‌لوو كوردی، عه‌بدوڵا ئۊجالان ئیمرالینە ئینا هه‌لومه‌رجێوە دژوارنە کریان زیندان و واتش: بارودۊخوو زیندانوو ئیمرالی نۊعێوەن كه نموونه‌ش دنیانە نییا. ئا دۊخه دژواره کە ملوو ڕابه‌ر ئاپۊیرە سه‌پیان، نایاسایی، نادادپه‌روه‌رین و دوورا جە مافه‌كا و بێویژدانیێوە گه‌وره‌ن، ئینەیچ هه‌رگیز لاو گه‌لوو كوردهیوه قبووڵ مەکریۊ.
چۊمله‌ك واتیچش، وەروو ئانەیە ڕابه‌روو گه‌لوو كوردی، ئۊجالان بتاوۊ به‌ئازاڎانه گلێرگەنە بژیوۊ، گرد نۊعە چالاكیێوە کەرا و چالاكییه‌كایچ قەوەتتەر کەرا.
ئا ئه‌ندامه‌و كۊمیته‌و هەرمانوکاروو جبەروو كه‌مپوو مه‌خموری واتیچش: پەی ئانەیە بزانیۊ چی ڕابه‌روو گه‌لوو كوردی ئیمراڵینە کریان زیندان، پەنەوازا گه‌لوو كوردی خاس جە دلێنەو په‌یماننامه‌و لۊزانی بیاوۊنە، واتیچش: ئیسە جە ١٠٠ه‌مین ساڵەو په‌یماننامه‌و لۊزانی نزیكۍ بیمێوە. په‌یماننامه‌و لۊزانی به‌شكەرڎەی جوگرافیاو كورڎستانی و گه‌لوو كوردین. دلێشنە قەرار دریان کورد و کورڎسان جیهانەنە سڕیاوە، سه‌رده‌مێوە چینەنە ڕابه‌ر ئاپۊ به فكر، بیرڎۊز، فه‌لسه‌فەو وێشۊ دژوو ئا سیستمه‌یە مرڎاوە. پەوکای سیستمی سه‌رمایه‌داری ڕابه‌ر ئاپۊشا گێرت و داساوە بە ده‌وڵه‌تەە توركی ئەرەگیری.
چۊمله‌ك واتیچش، ئانە کە ئیساتۍ کریۊ، دژوو گه‌لوو كوردین و جه كه‌سایه‌تیی ڕێبه‌رایه‌تینە، گه‌لوو كوردی سزا مدریۊ و واتش: ده‌سه‌ڵاتدارۍ و سه‌ركرده‌كاو دنیۍ قەرارشا دان كۊشیای پەی ئازاڎیی كورڎستانی شكس پەنە بارا و گرد نۊعە هامكارۍ ده‌وڵه‌توو توركی با. پەوکای مشۊم ساعیبۍ قەراری و ئیرادێوە ئازاڎی و قەوەتی بیمۍ. چا بڕوێوە جە ڕابه‌ر ئاپۊیۊ ورما گێرتێنە، متاومۍ تا ئاخیر ڕووبه‌ڕووۍ گردئەرەگیریێوە بیمێوە. چونكوم ڕابه‌ر ئاپۊ پەیما ژیواین و ژیوای بۍ ڕابه‌ر ئاپۊی بێمانان.
ئەرەیاونیا‌كه به دروشمه‌كاو "بژیوۊ سه‌رۊك ئاپۊ" و"بۍ سه‌رۊكی ژیوای مەبۊ" دماییش ئاما.
س.ز
