بە سەرپەرشتی عیماد حسن و گەیلان تاھیر و یاریدای حەیدەر مەقسود-ی، یۆوەمین خولی فەرمی تۆپوپای (فوتبۆڵی) پەی گەنجاو دەگاو هەورامانی خەرپانی بە جوانتەرین شێوە لوا راوە و کۆتاییش ئاما. ئانەی چی خولەنە بەدی کریا و شایەنو ستایش کریا؟بە؟ئی جۆرەنە:

تیپە بەشداربییەکێ بەنامێ یاگە کۆن و دیارەکاو دەگاکێ بەشداریشا کەرد، پێسە ھانەو سوفیەلێ، مەرعە. یەوەجەرێ، ھانە ھەلوچێ و ....

بەکارئاردەو زوانی ھەورامی جە گردو بابەتەکاو خولەکەیەنە پەی پارێزنای و پەرەدای بە زوانی ھەورامی.

ئەنجامداو کۆنگرەی رۆچنامەوانی وەلێ گردو گەمەکانە پەی سەرپەرشتیار و کاپتن و یاریزانەکاو تیپەکا و بە ئامانجو ڤاس کەردەی ئامادەکاری و پلانەکاشا.

فارایۆ گردو گەمەکا بەشێوەو راستەوێ و زینڎە و بە کۆمێنتاری ھەورامی جە دیجیتاڵ میدیانە کە ئی بەشە زیاتەر چێژش دابێ بە گورموگوری خولەکەی.

ئامادە بییەی کەسایەتییە وەرزشیەکی دەگای پەی دیاری کەردەی عالتەرین گەمەکەری جە گردو گەمەکانە و پێشکەش کەردەی خەلاتی پەنەش دماو گەمەکا.

بەکارئاردەو سیستمو ڤاری پەی یۆھەمین جاری جە خولێ دلێوێیەنە، کە ئینەیچ خولەکەش زیاتەر رەسمی تەر و زەریفتەر کەرد کە حەکەم (داوەر) تاواش بە سود وورگێرتەی چی سیستمەیە بریاری دروست و یەکلاکەرەوە بڎۆنە.

دروست کەردەو چن گۆشێوە رۆژنامەوانی کە ونەدوای و داتاو ھەوالەکاو خولەکەیش چەنە وەڵاوێ کریاوە و چەنی گۆشەو کۆمێنتو ھاندەرا کە تاموچێژێ تایبەتش دابێ بە خولەکەی جە وەختە ئیسراحەتەکانە.

سازدای مەراسیمو کۆتایی خولەکەی بەشێوێ پرۆفیشنالانە و دابەشکەردەو خەلاتەکا سەرو پاڵەوانو خولەکەی و یاریزانە؟خاستەرینەکاو خولەکەی بە ئامادەبییەو چنڎان کەسایەتی دێرینێ و وەرزشوانێ دەگاو خەرپانی و ھەلەبجەی و ھەورامانی.

ئامادەبییەو ھاندەرانێ فرەی پەی تەماشاکەردەو گەمەکا کە ئینەیچ هۆکارەکەش مەگێڵۆنەوە پەی ئانەیە کە وەڵتەر باس کریێ و خەڵکو دەگاو خەرپانی و بەرو خەرپانی بە تامەزرۆییەوە ئێنێ و نیشێنرە بەدیارو گەمەکاوە.

سپۆنسەری کەردەی خولەکەی جە لایەن کۆمپانیاو زانا ئاسیای کە بی یۆ جە هۆکارەکا تا خولەکە بە عالتەرین و زەریفتەرین شێواز ببریۆنە ڕاوە.

ئی خالێ کە باسشا کریا بە جوانی و رێکوپێکی جە خولەکەنە بەدی کریێ کە ھامشێوەو خولە بەناوبانگە جیھانییەکان هەنێ، بەڵام بە جیاوازی ئانەی ئی خولە خولێوە دلێوێیی و سەرو ئاستو دەگایێوەنە بێ کە بەتامتەر و بەچێژتەربێ جە چامپیۆنزلیگو ئەوروپای.

سەرکەوتەی خولەکەی گێلۆوە پەی دلسۆزی و خوەموەری سەرپەرشتیاراو خولەکەی (گەیلان، عیماد و بەھامکاری حەیدەر)ی و ئەکاونتو فەرمی خولەکەی خولو خەرپانی و پەیجو دەگاو خەرپانی کە تاواشا نمونێ زەریف نیشانەو خەڵکی بڵا (بڎانێ) کە دەنگش جە پارێزگاو هەڵەبجەی و سەرتاسەر پانیشتو کوردستانییەنە داوە.

تەمامو یاریزانە بەشداربیەکێ و تیپەکێ جەخولەکەنە کارێشا کەرد بە بێ ھیچ تونڎوتیژییە گردو گەمەکا بەرانێ راوە کە ھیچ خولێوەنە ئینە بەدی نەکریان.

خولەکە بە بەشداری ١٢ تیپێ و ١٢٠ یارێزانێ خەرپانەیی جە ماوەو مانگەو رەمەزانییەنە لواڕاوە و دماجار ھانە ھەلوچێ و ھانەو سوفیەلێ یاوێ گەمەی دمایین و ھانەو سوفیەلی تاواش گەمەکەی بەرۆوە و بۆ بە پالەوانو یۆوەمین خولی فەرمی گەنجاو خەرپانی.

ڕۆچنامەوان جیھاد ھەورامی