وڵاتا ئەندام جە یەکێتی ئەوروپاینە ٦ پەی ٩و حوزەیرانی هۊرچنیەی پەی پەرلەمانوو ئەوروپای مکریۆ. پەی ئی هۊرچنیەیە کە ٧٢٠ ئەندام پەرلەمانۍ ئەوروپای هۊرچنیا، ٣٦٠ ملیۆن دەنگەدەرۍ مافوو دەنگدایشا هەن.

پەیوەس پا هۊرچنیەیۆ کەجەدەکە-ئە وەڵۍ هۊرچنیەکەینە ئەرەیاۋنېوەش وەڵاکەردۆ و ئاماژەش پانەی دا کە فرەتەربیەی ڕاسڕەوە تنڕوەکا جە تەماموو ئەوروپاینە کاریگەری فرەش سەروو هۊرچنیەکا پەرلەمانوو ئەوروپای وەشکەردەن و واتش، "مەترسیېوە فرە هەن ڕاسڕەوە تنڕەوەکۍ ژمارەشا جە پەرلەمانوو ئەوروپاینە فرەتەر بۆ، ئا مافۍ پەی کۆچبەرا تەرخانکریێنۍ جە پەرلەمانوو ئەوروپاینە سنودارۍ بکەرا و فاڕیای جە پەرلەمانوو ئەوروپاینە وەشبکەرۆ و ئەوروپای بەرەو قۆناغێوە قەیراناوی بەرۆ."

کەجەدەکە-ئە ئاماژەش پانەی دا هۊرچنیەکۍ پەرلەمانوو ئەوروپای ڕاسەوخۆ پەیوەندیشا بە گەلو کوردسانیوە هەن و پی جۊرە بەردەوام بی: "ئانە حەقەتینەن کە پەرلەمانوو ئەوروپای هەم جە ڕوو ماڕای گۆشەگیری سەرو ڕابەر ئاپۆی و هەم جە بواروو دژ مردایۆ جە وەرا ۋەروو سیاسەتەکا تاوانبارکەردەینە جە دژوو کۊشیای ئێمە دەورېوە ۋەرچەمش هەن. ۋەروو ئانەی پێویسا هەڵوێسما نیشانە بڎەیمۍ.

حەقەتینا کە ئەنجومەنوو ئەوروپای و سی پی تی دژوو گۆشەگیری سەرو ڕابەر ئاپۆی ئەرکوو ۋېشا جابەجێنەکەردەن. بێدەنگیچشا بیەن بە ئامرازێوە پەی بەردەوامیدای بە گۆشەگیری.

حەرپاسە جە ڕوو ئەرەیاۋنایۆ بەربڕیەیما پەی ڕای گرڎینی و نیشاندای ناڕازایبیەی دیموکراتیکانەی دژ بە گۆشەگیری، فرە گرنگا دەنگما بڎەیمۍ پا کاندیدا کە جە هۊرچنیەو پەرلەمانوو ئەوروپاینە چنی ئەرەکۊشای مافدارانەو گەلو کوردی کۆکېنۍ و بەڕەواش موینا.

پېسە کەجەدەکە-ئەی داوا جە گرڎ کەسۍ مکەرمۍ پەی هۊرچنیەکا پەرلەمانی ئەوروپای جە ئەرەکۊشای گەلو کوردینە پەی ڕای گرڎینی بانۍ بە ڕۆژەڤ، دەنگشا بڎا پا کاندیدا کە تەرەفڎارۍ مافەکاو مرۆڤی، دیموکراسی گەلو کوردینۍ. پی بۊنۆ داوا جە گەلەکەیما مکەرمۍ بلانۍ سەرو سنوقەکا دەنگدای و دەنگوو ۋېشا بڎا."