کەجەکە ئەرەیاۋناش، سەردەمێوە تازە جە سوریانە دەسشپنەکەردەن و ئانەش وست ڕووە، "سەرەکیتەرین چێوۍ کە گەلاو سوریای تامەزرۆشەنۍ، وەڵێکۊتەی سوریاین بە شێوێوە دیموکراتیک. چارسەرو گرفتەکا بە هۆشمەندی نەتەوەی دیموکراتیکی مسۆگەر مەبۆ ".
هامسەرۆکایەتی دەسەو ڕاوەبەری کەجەکەی ئەرەیاۋناش، "جە ئەنجامو پەرەئەسایەکا دووە حەفتەی ۋېیەردەینە جە سوریا، رژێمو بەعسی وڕا. چنی وڕای رژێمەکەی، جە سوریانە سەردەمێوە تازە دەسشپنەکەرڎەن. هیواڎارێنمۍ ئا ئاژە تازە بۆ بە مایۍ ئانەی گرڎو گەلا سوریای پێوەرە و بە شێوێوە یەکسان و ئازاڎ بژیوا. گەلا سوریای ماوەو ١٠ ساڵان پەی وەشکەردەی سوریایۍ دیموکراتیکی و پەی چەسپنای ژیۋای ئازادی، دیموکراتیکی و واڵەو-برایەتی ئەرەکۊشا و پەی ئانەیچ قوربانیۍ قورسشا دان. گەلا سوریای کە ئەرەکۊشایۍ گۊرەشا کەردەن، لایەقۍ ئانەینۍ. قەناعەتما چامنەن کە گەلاو سوریای خاوەن ئا ئەزمون، زانابیەی و هۆشمەندیەینۍ کە ئانەی جابەجێ بکەرا. هیواما ئامای دی ئاواتەکاو گەلا سوریاین".
جە ئەرەیاۋناکەینە ئامان کە وڕای رژێمو بەعسی جارێوەتەر سەلەمناشۆ کە سیستەمو نەتەوە-دۆڵەتی کە جە لایەنو سیستەمو سەرمایەدارییوە سازکریان و هێزەکاو مۆدێرنیتەی سەرمایەداریچ ئا سیستمەشا هەناردەو ۋەرکۊتوو مېیامینی کەرڎەن. ئا سیستەمە مەڵامەتی سەرەکی گرفتە کۆمەڵایەتیەکان جە ۋەرکۊتوو مېیامینینە. مۆدێلو نەتەوە- دۆڵەتی کە دلۍ گلێرگەینە تاکڕەوی بە بنەما مگێرۆ، دژ بە حەقەتینو مرۆڤەکان. ئینە جە ڕاو گەشە ئەسایەکا ۋەرکەوتو مېیامینیۆ، جارێوەتەر بە ئاشکرا ڕۊشن بیەنۆ. رابەر ئاپۆ راسی نەتەوە-دۊڵەتو تاکڕەویش، بە قووڵی هۊرسەنگنان و ئەرەیاۋنانش کە ئا سیستمە دژو مرۆڤی و گلێرگەین، ئیتر گلێرگە نمەتاوۆ ۋەرا ۋەر پا سیستمە تاکگەراییە دڎان گێرۆ ۋێشەرە و ئا سیستمە موېیەرۆنە، جە ئاکامو ئانەینە جە ۋەرکۊتوو مېیامینینە ڕا ۋەردەمو دیموکراتیکبیەینە مکریۆوە. ئا پەرەئەسایۍ جە سوریانە ئامێنۍ ئاراوە، ئا حەقەتینە تاریخیە سەلەمنۆ کە جە لایەنو رابەر ئاپۆیۆ دەسنیشان کریێنۍ. رژێمو بەعسی جە ماوەو ١٤ ساڵا ۋېیەردەینە سەرەڕاو ئا گرڎو پەرەئەسایا کە سوریانە رووەشا دا، ئا حەقەتینشە نەوینا، پاگیریش سەرو سیستەمو نەتەوە-دۆڵەتی تاکپەرسی کەرد، ۋێش دیموکراتیک نەکەرد و جە ئاکامیچەنە دمایی ۋێش وینا".
ئانەی گەل تامەزرۊشا، وەڵێکۊتەی سوریای دیموکراتیکین
جە ئەرەیاۋناکەو هامسەرۆکایەتی دەسەو ڕاوەبەری کەجەکەینە ئامان:
"پېسە کەجەکەی پەی ئانەی سوریا سیستەمو نەتەوە-دۊڵەتی تاکپەرسی وېیەرنۆ و پەی وەڵێکۊتەی هۊرچەرخنای دیموکراتیکی، سەرەمڕە کۊششما کەرڎەن. ئێمە ئانەما فرەو وەختی هەم بە زارەکی و هەمیچ بە نوسیای بە حکومەتو سوریای ئەرەیاۋنا. واتما کە مشۆم جە سوریانە دەسبەردارۍ ئاوەزیەتو تاکپەرسیی نەتەوە-دەوڵەتی بانۍ و پەی پەنەوازیەکا هۊرچەرخنای دیموکراتیکی جە سوریانە هەنگامە بنریۆ. پەی ئانەی قۆناغەو هۊرچەرخنای دیموکراتیکی سوریای فرە نەخواینۊ و گەل زیاتەر مەینەت نەچەشۆ، فرە گرنگیما پانەی دا. پەی ئانەیچ کۊششی فرەما وست گەڕ. گەلوو کوردیچ بە ئەرەکۊشایۍ کە پەرەش پنەدان، گەرەکش بیەن سوریێوە دیموکراتیک وەڵۍ گنۆ، بناغەو ئانەیش چەسپنان. ئێمە مزانمۍ کە ئیدارەو ۋێڕاوەبەری سەرنیشتوو-ۋەرکۊتوو سوریایچ پەی دیموکراتیکبیەی سوریای کۊشش وستەبۍ گەڕ. بەڵام رژێمو بەعسی پاگیر بۍ سەرو ئاوەزیەتو نەتەوە-دۊڵەتی تاکپەرسی. جە ئاکامیچەنە قەیرانەو سوریای قووڵتەرە بیۆ، چارەسەرکەردەی گرفتەکا هۊرپەساریۍ و گەلا ئێش و مەینەتی فرەتەرشا چەشت.
جە ئیسە بە دماوە ئا چێوەی گەلا سوریای ئاواتشانە، وەڵێکۊتەی سوریێوە دیموکراتیکین. دلۍ سوریێوە دیموکراتیکینە گرڎو گەلا سوریای، پێکئاما و لایەنە ئاینییەکا، زوانە جیاوازەکا، مەزهەب و کولتووری جیاواز پێوەرە، جە ئازادیی و یەکسانینە بژیۋا. جە سوریایۍ پی جۊرەنە ئەگەرو چارەسەرکەردەی پرسەکا هەن. کورد، عەرەب، دروزی، تورکمان، سوریانی، ئێزدی، ئەرمەنی، نوسایری، سونی و گرڎو لایەنە جیاوازەکا سوریای پی جۊرە ژیۋایۍ تازە سەرپا وزا. پێوەرە متاوا بە شێوێوە ئازاد و واڵەو-برایەتی پێوەرە بژیوا و سوریایێوە بنیاڎ بنیا کە مافو گرڎ کەسێوە چنەشەنە دەسەبەربۆ. وەڵێکۊتەی سوریانە جە هەمان کاتەنە کاریگەریش سەرو گرڎو ۋەرکۊتوو مېیامینی مەبۆ و ئیسفاڎێوە فرەش مە بۆ پەی دیموکراتیکبیەی ۋەرکۊتوو مېیامینی. گەلو کوردی بە ئەرەکۊشایش ئانەش نیشانەدا کە هێزێوە دینامیکی ئی دیموکراتیک بیەینە. پېسە کەجەکەی هەڵوێس و ئەرەکۊشای نەتەوەیی دیموکراتیکما بەردەوام مەبۆ، بە هۊرچنیەی ژیۋایۍ پی جۊریە، ڕێزگێرتەی جە جیاوازییەکا و پێوەرە ژیوای بنەماو ئینەینە. جە ۋەرا ۋەرو دەوڵەت-نەتەوەینە کە سەرچەمەو گرڎو گرفتەکان، ئیمکانو چارەسەریی گرفتەکا و پێوەرە ژیۋای، یەکسانی، دیموکراتیکی و ئازاد ژیۋایکەردەی گرڎو گەلان بە هۆشمەندیی نەتەوەیی دیموکراتیکی.
ئازادیی کۆمەڵایەتی بە ئازادکەردەی ژەنۍ مۍ ئاراوە. ئازادی ژەنۍ بەربڕو جەوهەر و ماناداریی کۆمەڵایەتیی بیەین. سوریای تازە بنیاڎ بنریۆ، دەرەنجام بە وەڵێکۊتەی ئازادیی ژەنۍ متاوۆ دیموکراتیک و ئازادیواز بۆ. هیچ کاتێ سازشکەردەی جە هێڵۊو ئازادیی ژەنۍ نمەکریۆ و پاشەکشەکەردەیش نییا.
دۊڵەتو تورکی کۊسپێوە گۊرەن ۋەردەمو سوریایۍ ئازادینە
دۊڵەتو تورکی کۊسپێوە گۊرەن ۋەردەمو سوریایۍ دیموکراتیکی و ئازادینە کە ئاواتو گەلین. پەی ئانەی ڕا جە وەڵێکۊتەی ژیۋای ئازادی و دیموکراتیکی جە سوریانە گێرۊنە، ماوێوە فرەن ئینا هرووژم و ئەرەگیرکەردەی سوریاینە. سەرەڕاو ئانەی ڕژێمو بەعسی وڕان، هەڵای دۊڵەتو تورکی سەرو ئی هەڵوێسەیشە بەردەواما. دۊڵەتو تورکیچ هامشێوەو ڕژێمو بەعسی هۊرگیرو ئاوەزیەتو دۊڵەت-نەتەوەیی تاکپەرسیا. بە بەردەوامیدای بە هرووژمەکاش مەرامش درێژەداین بە چەمکو دیکتاتۆری و سیستەمی تاکلایەنەی جە سوریانە. مەرامو دۊڵەتو تورکی بە تەنیا قڕکەردەی کوردا نیا، جە هەمانکاتەنە گەرەکشا ڕا جە فاڕیای دیموکراتیکی جە سوریانە بگێرۆ، درێژە بە سیستەمو دەوڵەت نەتەوەیی تاکلایەنی مڎۆ. ئاشکران کە دۆڵەتو تورکی درێژە بە مەرامێوە پی جۊرەیە مڎۆ و سەرو ئی بنەمایۍ درێژە بە هرووژمەکا سەرو سوریای مڎۆ. پی مەرامۆ سوپێوەش ئەرەمەرزنێنە بە نامۍ سوپاو نەتەوەیی سوریای. هەم ۋێش هرووژم مکەرۆ، هەمیچ پاسە مکەرۆ بە دەسو سوپاو نەتەوەیی سوریای هرووژمەکا ئەنجام بڎریا. دۊڵەتو تورکی پی نزیکایەتی و مەرامەیۆ هرووژم مکەرۆ سەرو یۊبیەی و یەکپارچەیی سوریای و هەڕەشۍ مکەرۆ سەرو وەڵێکۊتەیەکا سوریای. مشۊم گرڎو گەلا و هێزە تەرەفڎارەکا سوریایی تازەی و ژیۋایۍ دیموکراتیکی و ئازادی پێوەرەیی جە سوریانە، ئی نزیکبیەیۆ تورکیای قبوڵ نەکەرا و جە دژو هرووژمەکا دۆڵەتو تورکی و سوپاو نەتەوەیی سوریای هەڵوێس هۊرگێرا. مشۆم پاڵ بڎا پاڵو مڎرامانوو گەلوو کوردی و گەلا سەرنیشتی و ۋەرکۊتوو سوریایۆ. هەرپاسە داوا مکەرمۍ هێزە دیموکراتیکییەکا جەهانی جە دژو هرووژمەکا دۆڵەتو تورکی ئەرەگیری و قڕکەری هەڵوێسشا بۆ. هامشانۍ گەلی قارەمانو کوردی و گەلا سوریای با و پەرە بە هەڵوێسێوە قەوەتی بڎا.
بە دڵنیاییوە مڎرامانو گەلا سەر گنۆ
مشۊم گرڎو گەلا سەرنیشتی و ۋەرکۊتوو سوریای و بە تایبەت گەلوو کوردی مڎرامانی قەوەت بکەرا جە دژو هرووژمەکا دۊڵەتو تورکی و سوپاو نەتەوەیی سوریای کە بە نامۍ دۆڵەتو تورکیۆ جماوە. مشۊم گەلەکەما سەرو بنەماو جەنگو گەلی شۆڕشگێڵنیی ڕێکوزیۍ با و ۋێشا پارێزنا. سەرو بنەماو ۋێبەڕێکوستەکەردەی ، بەدڵنیاییوە مڎرامان و ئەرەکۊشای گەلا جە دژوو گرڎ جۆرە هرووژمێوە سەرکۆتە مەبۆ.
گەلوو کوردی پا ئەرەکۊشایە پەرەش پنەدان هامکاریێوە گۊرەش جە ماڕای سیستەمو دۊڵەت نەتەوەیی تاکپەرسی و پێگەو ڕاوەبەری دەسپۆتیکیش جە ۋەرکۊتوو مېیامینینە کەرڎەن و دەورێوە یەکلایی کەرەوەش گێڵنان. ئەر زەمینێوە پەی وەڵێوستەی سوریایۍ تازەی و دیموکراتیکی پەرەش پنەدریابۆ، ئانە جە سەیەو ئا ئەرەکۊشاینە کە جە لایەنو گەلوو کوردیوە پەرەش پنەدریان. نەک بە تەنیا جە سوریانە جە هەمانکاتەنە جە ۋەرکۊتوو مېیامینینە بەشێوەن جە بەرکۊتەی وەڵێکۊتەیۍ پی جۆرەیە و سەرمەشقایەتی مکەرۆ. ئەر حەقیقەتو کوردی نەوینیۆ و دڎان نەنریۆ مافەکاشەرە ئانە سوریا و ۋەرکۊتوو مېیامینی بیەیش نمەبۆ. بە دڵنیاییوە مشۊم یاگۍ کوردی جە سوریا و ۋەرکۊتوو مېیامینینە بۆ.
پی جۊرە مبارەکبایی جە گرڎو گەلا سوریای مکەرمۍ، قەناعەتما هەن گرڎو گەلا سوریای پێوەرە سوریێوە یەکسان، دیموکراتیک و ئازاد ئەرەمەرزنا و داوا جە گرڎی مکەرمۍ سەرو ئی بنەمایۍ جماوە.
